1 JUAN 2

1Hex xahan ay wu ti'an, chin tz'ib'n̈etoj hunk'aan ti' teyetan yun̈e macheyacoj he mul. Yaja' ta ay hunecoj chon̈ ay yin̈ co mul, ay hune' mac cha' sb'a jin̈ tet Comam Dios, hune' tu' ha' Comam Jesucristo stoholaln̈e chu. 2Ha' scamical Comam xtohlan co mul, matn̈etaj co mul stohla, to ha'hun smul sunil anma ay satyib'an̈k'inal ti' stohla paxoj. 3Ta ẍco yijye schejb'anil Comam Dios, johtajxa Comam chaltu'. 4Yaja' ta ẍjala to caw johtajxa Comam, yaja' mach co yijye schejb'anil, lek'ti'on̈, b'oj mat t'in̈anoj jecoj. 5Wal ta ẍco yijye tzet chal Comam, yeli caw ẍjoche Comam. Hactu' chu johtajn̈eni to hun je b'oj Comam. 6Ta ẍjala ta hun je b'oj Comam, yilal jehc'oj haca' xu yehc'oj Comam Jesucristo. 7Hex xahan ay wu ti'an, hune' chejb'anil ẍwal teyet ti'an, matoj sb'ab'elto ẍhal-laxi, to xaxtic'a hal-lax heyab'e' yet xquex oc tzujnuj yin̈ Comam Dios. 8Yaja' haca' ac'to chu walni teyetan, haxca syeloj sb'a yin̈ Comam Jesucristo, b'oj lan̈an syeniloj sb'a jin̈. Lan̈an yec'toj ak'b'al, wal sajilk'inal caw syelal, lan̈an spujnayi. 9Ta ẍjala to ayxacoj sajilk'inal yin̈ janma, yaja' yehn̈e schiwacoj co c'ul yin̈ heb'ya' jetb'i, aytocoj k'ejholo yin̈ janma chaltu'. 10Ta ẍjoche heb'ya' jetb'i, ayxacoj sajilk'inal yin̈ janma chaltu', mach mac ẍja' lectaoj. 11Mac ẍchiwacoj sc'ul yin̈ hunuj ya' jetb'i, aycoj k'ejholo yin̈ yanma, b'oj haca' to xol k'ejholo ẍb'elwi, toxan̈em ch'ec' tzab'tzoni, haca'tic'a ch'a'lax tan̈oj smujlub'al yu k'ejholo. 12Hex haca' unin hexto, chin tz'ib'n̈e hune' ti' teyetan, haxca xax ya' tan̈oj Comam Dios he mul yu Comam Jesucristo. 13Hex haca' mame mi'e hex, chin tz'ib'n̈e hune' ti' teyetan, haxca heyohtajxa Comam ayxatic'a yet x'ichitij. Hex haca' tzehtaj b'oj hex k'opotaj, chin tz'ib'n̈e pax hune' ti' teyetan, haxca xax ay naj matzwalil heyu.Hex haca' unin hexto, chin tz'ib'n̈e hune' ti' teyetan, haxca heyohtajxa Comam ay satcan̈. 14Hex haca' mame mi'e hex, chin tz'ib'n̈e hune' ti' teyetan, haxca heyohtajxa Comam ayxatic'a yet x'ichitij. Hex haca' tzehtaj b'oj hex k'opotaj, chin tz'ib'n̈e hune' ti' teyetan, haxca ay he yip b'oj cheyacoj Stzoti' Comam Dios yin̈ he c'ul, b'oj xax ay naj matzwalil heyu. 15Macheyacoj heyanma yin̈ tzetet say anma satyib'an̈k'inal ti', b'oj hej tzetet chalte satyib'an̈k'inal ti' jet. Ta ẍjacoj janma yin̈ hunk'aan tzetet tu', mach ẍjoche Comam Dios yin̈ hactu'. 16Haxca anma mat tzujanoj yin̈ Comam, k'a' aycoj yin̈ sc'ul sayni hej tzetet tx'oj choche snimanil, b'oj hej tzetet caw sak'al choche ya'a'coj yetoj, k'a' aycoj yin̈ sc'ul sayni yoc smay yun̈e caw ay yelapnoj yab'en sb'a. Yaja' hunk'aan tzetet ti', mat yetoj Comam Dios, to yetn̈e satyib'an̈k'inal ti' yeyi. 17Satyib'an̈k'inal ti' b'oj hunk'aan tzetet lan̈an jalni ti', ẍtan̈ojiloj, yaja' ta hej tzetet choche Comam ha' ẍju, waltu' chon̈ ehojc'oj stohb'alk'inal. 18Hex xahan ay wu ti'an, slahub'alxa tz'ayic ayon̈. Cuyb'ilexxa yib'an̈iloj tzet chub' syenojcan̈ sb'a naj ẍpac'ojcoj yin̈ Comam Jesucristo. Hactu' tinan̈, tx'ihalxa anma hactu' ye yanma, ẍpaq'uicoj yin̈ Comam, yuxin johtaj to slahub'alxa tz'ayic ayon̈. 19Co xoltic'a x'eltoj hunk'aan tu', haxca mat jetb'ioj. Ta jetb'i, mach mi xiloj sb'a co xol. Ha' xiniloj sb'a hunk'aan tu', syeniloj to mat jetb'ioj. 20Walon̈, Comam Jesucristo x'a'ni Comam Espíritu Santo jet, yuxin co hunil ẍco txum b'aytet st'in̈anil. 21Yuxin chin tz'ib'n̈etoj hune' wum ti' teyetan, matoj haxca mat heyohtajoj b'aytet st'in̈anil, to haxca heyohtajxa. Heyohtajpaxoj to mach hunuj lek'ti'al ẍwayiloj yin̈ hune' cuywab'al st'in̈anil ye ti'. 22Chu walni teyetan mactaj lek'ti'. Ha' hunk'aan mac ẍhalni ta mataj Comam Jesús ha' Cristo, ha' hunk'aan tu' ẍpaq'uicoj yin̈ Comam, haxca macha' yuluj sc'ul yin̈ Comam Dios Padre b'oj Sc'ahol. 23Mactic'a ẍhalni ta mat Sc'aholoj Comam Dios ye Comam Jesús, hunk'aan tu' machcoj Comam Dios Padre yin̈. Wal mac ẍta'wen yala' ta Sc'ahol Comam Dios ye Comam Jesucristo, waltu' aycoj Comam Dios Padre yin̈. 24Ha' hune' cuywab'al xjab'e yet xcon̈ oc tzujnuj yin̈ Comam Dios, yilal jehc'oj yin̈. Ta huneln̈e ẍjutecoj janma yin̈, waltu' huneln̈e ẍjucancoj yin̈ Comam Dios Padre b'oj yin̈ Sc'ahol. 25Ha' hune' k'inal mach stan̈b'al ti' halteb'ilcan jet yu Comam. 26Chin tz'ib'n̈etoj hunk'aan ti' teyetan yu mac chal hex etanojtoj yalni. 27Walon̈, ab'ilxacan Comam Espíritu Santo jet yu Comam Jesucristo, yuxin mach yeẍtooj ay hunujxa mac chon̈ cuyni, haxca yeli aycoj Yespíritu Comam jin̈. Ha' chon̈ cuyni yin̈ sunil hej tzetet. Ha' hune' cuyb'anile ti' caw syelal yeyi, mach lek'tial aycoj yin̈. Yuxin chex hunicanicoj yin̈ Comam Jesucristo, haca' xute Comam Espíritu yalni jet. 28Hex xahan ay wu ti'an, huneln̈e ẍjuwejcanicoj yin̈ Comam yun̈e machon̈ xiwi, machca ẍco tz'aj tx'ixwoj co b'a yet chuluj Comam hunecxa. 29Johtaj to caw tohol snab'al Comam Dios, yuxin ta yin̈ stoholal chon̈ b'elwi, yuninal Comam je chaltu'.


Copyright
Learn More

will be added

X\