1 JUAN 2

1Walex caw xahan ay wuti'an, chintz'ibn̈etojan huntek'an ti' teyet, yun̈e mach cheyaco hemul. Yaja' tato ay hunujon̈ chijaco comul, ay hune' mac chak' isba jin̈ tet Comam Dios. Hune' mac tu', ha' ton Comam Jesucristo. Wal Comam tu', caw istoholaln̈etic'a chiswatx'e Comam. 2Ha' iscamical, ha' tohlancano sunilal comul. Maẍn̈etaj xin comul han̈on̈ ti' istohlacanto Comam, to ha' hun ismul sunil anma ay yul sat yiban̈k'inal ti'. 3Ta chicoyije cuybanile ak'bilcano yu Comam Dios, chal yelapnoj hune' tu' ta xajohtan̈elo Comam. 4Yaj tato chijala ta caw johtaxa Comam Dios, yaj ta mach chicoyije cuybanile ak'bilcano jet yu Comam, caw lek'ti'on̈ chal tu', hac tu' xin caw mach c'ulo jehicoj. 5Wal tato caw chicoyije tzet chal Comam tu' xin, caw yeli chijoche Comam Dios. Hac tu' xin chiyu johtan̈eniloj tato caw hunxa je yeb Comam. 6Ta chijala tato caw hunxa je yeb Comam Dios, caw yilal cobeybaln̈en haca' tzet iswatx'e Comam Jesucristo yet yec' Comam yul sat yiban̈k'inal ti'. 7Wuẍtaj, wanab, hune' chejbanile chiwaltojan teyet ti', caw mach ac'to heyabeni. Caw xatic'a hallax heyabe' yettaxtic'a heyanico heba yul isk'ab Comam Dios. Caw xin heyohtaxa hune' chejbanile ti', hune' chihalni tato caw yilal coxahann̈en coba hununon̈. 8Walca xin payxa ak'bilcano hune' chejbanile ti', yaj haca' hunu caw ac'to chiwute walnitojan teyet, yuto ha' Comam Jesucristo hul watx'enocano yin̈ caw ist'in̈anil. Lan̈anpaxo xin isyenilo isba hune' cuybanile ti' texol, yuxin haxa hune' issajilk'inal, ha'xa chimujli yin̈ heyanma, hac tu' xin chu yelcano k'ejholo teyin̈. 9Tato chijala ta caw ayxaco issajilk'inal Comam Dios yin̈ janma, yaj ta chito chiwa coc'ul yin̈ hunu juẍtaj maca janab, caw aytoco k'ejholo yin̈ janma. 10Wal tato caw xahan chijil juẍtaj yeb janab, caw ayxaco issajilk'inal yul janma, matxa tzet chon̈ak'ni ayc'ayoj. 11Yaja' ta chichiwa coc'ul jin̈ hununon̈, chaliloj ta ayon̈toco xol k'ejholo, yeb ta lan̈an cobelwi xol k'ejholo tu', mach johtajo bay caw cotocoj yuto k'ejholo tu' chiak'ni tan̈o comujlubal. 12Hex xahan ay wuti'an, caw chintz'ibn̈etojan huntek'an ti' teyet, yuto xa'el hemul teyiban̈ yu Comam Jesucristo. 13Hex mame mi'e, caw chintz'ibn̈etojan hune' ti' teyet, yuto caw heyohtaxa hune' Comam ayxatic'a yet yalan̈tocano maẍto chiwatx'i yul sat yiban̈k'inal ti'. Hac pax tu' xin hex tzehtaj, caw chintz'ibn̈epaxtojan hune' ti' teyet, yuto caw xaquexk'oji yin̈ naj matzwalil. 14Walex ac'to hex yin̈ Istzoti' Comam Dios, caw chintz'ibn̈etojan hune' ti' teyet, yuto heyohtaxa Comam ay bey yul satcan̈. Hex mame mi'e, chintz'ibn̈epaxtojan hune' ti' teyet, yuto caw heyohtaxatic'a Comam ayxatic'a yet yalan̈to maẍto chiwatx'i yul sat yiban̈k'inal ti'. Hex tzehtaj, caw chintz'ibn̈epaxtojan hune' ti' teyet yuto caw ay heyip heyanico Istzoti' Comam Dios yin̈ heyanma. Yu hune' tu' xin, quexk'oji yin̈ naj matzwalil. 15Wal xin mach cheyaco heyanma yin̈ hune' sat yiban̈k'inal ti', yeb sunil tzet ay sat. Tato cheyaco heyanma yin̈ tzet ay sat yiban̈k'inal ti', mach ayoco heyanma yin̈ Comam Dios, chal tu'. 16Yuto istx'ojal chiyak' yul sat yiban̈k'inal ti', yettic'a yul sat yiban̈k'inal ti' yehi, maẍtaj yin̈ Comam Dios chitita. Ha' huntek'an ti' xin chiyalte yul sat yiban̈k'inal ti': istx'ojal tzet choche conimanil, ha' tzet chijila chijochecoj yaj mach chitzala Comam yin̈, yebpaxo cololo'n̈en coba yin̈ tzettaj ay yul sat yiban̈k'inal ti'; sunil ti' yet yul sat yiban̈k'inal ti' yehi. 17Hune' yul sat yiban̈k'inal ti' yeb sunil istx'ojal chak'a, chiapni istiempohal bay chitan̈iloj, yaj tato ha' tzet choche isc'ul Comam Dios chicowatx'e, wal tu' ay cok'inal mach istan̈bal. 18Hex caw xahan ay wuti'an chiwalan teyet, caw ayon̈xaco yin̈ islahobal tiempo. Hex ti' xaheyabe ta chihul naj Anticristo, naj ayco ishowal yin̈ Comam Jesucristo. Yaja' tinan̈ xin tx'i'alxa ebnaj ayco ishowal yin̈ Comam xaisyelo isba, yuxin chiconaloj tato caw yin̈ xaislahobal tiempo ayon̈. 19Caw coxol elna huntek'an ebnaj tu', yaj yin̈ caw yeli mach jetbiho coba yeb ebnaj. K'inalo tato jetbi coba yeb ebnaj, caw machim ispohilo isba ebnaj coxol, caw jetbimi coba yeb ebnaj tinan̈. Yaj caw ispohilo isba ebnaj coxol yun̈e isyenilo isba tato caw mach jetbiho coba yeb ebnaj. 20Wal xin xayak' Comam Jesucristo Comam Espíritu Santo jet, yuxin caw cosunil johtaxa isyelal Comam Dios. 21Caw chintz'ibn̈etojan hune' incartati'an teyet, maẍtaj yu mach heyohtajoj baytet caw isyelal Comam Dios, to caw heyohtaxa; caw heyohtaxapaxoj tato machi hunu lek'ti'al chiilcha xol cuybanile caw t'in̈an yecoj. 22Chiwalan teyet macta caw lek'ti'wom tu', ha' ton mac chihalni tato Comam Jesús mach Cristohoj. Ha' ton mac tu' ayco ishowal yin̈ Comam, yuto mach chiyayto yul yanma yin̈ Comam Dios, yeb yin̈ Isc'ahol Comam. 23Ha' mac chihalni tato mach Isc'aholo Comam Dios ye Comam Jesucristo, caw mach ayayto Comam yul yanma. Walpaxo mac chihalni tato Isc'ahol Comam Dios ye Comam Jesucristo, ha' hune' mac tu' yet Comam yehi. 24Ha' hune' cuybanile ti' jabe yettax janico coba yul isk'ab Comam Dios, caw xin yilal wal yeco yul janma. Tato caw wal yeco hune' cuybanile tu' yul janma, wal tu' huneln̈e jeco yin̈ Comam Dios, yebpaxo yul isk'ab Isc'ahol. 25Ha' hune' k'inal mach istan̈bal, ha' haltebilcano yu Comam Jesucristo tato chiyak' jet. 26Caw chintz'ibn̈etojan huntek'an ti' teyet, yuto ay mac choche quexyak'a subchahoj. 27Walex hex ti', ak'bilxa Comam Espíritu Santo teyet yu Comam Jesucristo, yuxinto mach yechelto ay mac chexcuyni; yuto ha' Comam Espíritu Santo chexcuyni yin̈ sunil tzettaj ye tu'. Ha' xin cuybanile chak' Comam Espíritu Santo caw yeli, machi nino lek'ti'al ayco yin̈. Yuxin caw huneln̈ehojab cheyutecanico heba yul isk'ab Comam Jesucristo, haca' chute yalni Comam Espíritu Santo jet. 28Tinan̈ xin hex caw xahan ay wuti'an, caw huneln̈ehojab jeco yin̈ Comam Jesucristo yun̈e mach chon̈xiw tet Comam yet chihul hunelxa yeb mach chon̈tx'ixwican̈. 29Wal xin johtaxa tato istoholaln̈etic'a tzet chiswatx'e Comam, yuxin tato caw yin̈ istoholal chon̈belwi, ha' chiyeniloj ta yuninal Comam jehi.

will be added

X\