1 JUAN 1

1- 2Chintz'ibn̈etojan hune' carta ti' teyet yun̈e heyohtan̈en tzet caw yelapno ye Comam Tzoti' chiak'ni cok'inal. Comam ayxatic'a yet maẍto hunu tzet ye tu' chiwatx'i yul sat yiban̈k'inal ti'. Wal xin han̈-caw-on̈an̈ jabehan̈ tzet caw yal Comam tu', jilnipaxicojan̈ yin̈ Comam. Nahatil jil cobahan̈ yeb Comam, cotzabnipaxojan̈ Comam. Comam chiak'ni k'inale ti' isye isba jetan̈, yuxin chijaco cobahan̈ jalnilojan̈. Tinan̈ xin chijalan̈ teyet ta ha' Comam chiak'ni cok'inal mach istan̈bal. Isc'atan̈ Comam Dios ay Comam, yaj xin hulic'o yul sat yiban̈k'inal ti' isyeni isba jet. 3Yuxin Comam jiltu'an̈ yeb jabehan̈ tzet yala, ha' chijaltojan̈ teyet yun̈e heyoc jetbihojan̈, hac tu' xin hunxan̈e chijucano yin̈ Comam Dios Mame. 4Yuxin chicotz'ibn̈etojan̈ huntek'an tzoti' ti' teyet yun̈e caw tz'ajan chiyucanico tzalahilal yin̈ janma. 5Wal tinan̈ xin, chijaltojan̈ teyet yin̈ cuybanile yalcano Comam Jesucristo jetan̈. Yal Comam Jesús tato Comam Dios caw issajilk'inal yehi, machi nich'ano k'ejholo yin̈. 6Tato chijala ta hunxa je yeb Comam Dios, yaj tato chito cowatx'e istx'ojal, chaliloj tato ayon̈toco xol k'ejholo, yuxin yin̈ haca' tu' caw lek'ti'on̈, mach c'ulo cobeybal. 7Comam Dios issajilk'inal yehi, yuxinto yin̈ issajilk'inal Comam Dios tu' chon̈belwi, caw jetbixa coba hununon̈. Ha' xin ischiq'uil Comam Jesús, Isc'ahol Comam Dios, ha' chon̈sajn̈en yin̈ sunil comul. 8Tato chijala tato machi comul, han̈-caw-on̈ chijak' subchaho coba cochuquil, mach xin ayon̈ico yin̈ isyelal. 9Tato chijalati comul tet Comam Dios, chiyak'cano tan̈o Comam comul jiban̈. Sunil comachiswalilal chiyicanilo Comam jin̈, yuto istoholal chiswatx'e Comam, yeb xin sunil tzet chal Comam masan chij isba. 10Tato chijala ta machi comul chijacoj, lan̈an jalni ta lek'ti' Comam Dios, caw machi Istzoti' Comam yin̈ janma haca' tu'.

will be added

X\