1 JUAN 1

1Ẍco tz'ib'n̈e teyetan yin̈ mac ayxatic'a yet yalan̈to, Stzoti' Comam sb'ih, Comam Ch'a'ni K'inale. Hayon̈ caw xjab'e stzotelan, caw xjil yu sb'ak' co satan, nahatil xjil Comaman, b'oj xcon̈ oc tzab'noj yin̈an. 2Ha' Comam A'om K'inale tu' xyelax co xol yu Comam Diosan, hayon̈ caw xjilan, yuxin ẍja' co b'a yin̈an. Lan̈an jalni teyetan to ha' Comam ch'a'ni co k'inal mach stan̈b'al huntic'a yecoj yin̈ Comam Dios, ha' xyelaxcan̈ jet tinan̈an. 3Ha' Comam xjil tu'an b'oj xjab'e tzet xalan, ha' ẍco tzote teyetan, yun̈e co hunicoj jin̈ hununon̈, haxca yin̈ caw yeli hayon̈ ti' hune'xan̈e je b'oj Comam Dios, b'oj Sc'ahol Jesucristo. 4Ẍco tz'ib'n̈e hunk'aan ti'an, yun̈e tz'ajan chucancoj tzalalal yin̈ janma. 5Tinan̈ ẍco tzote teyetan tzet xal Comam Jesucristo jetan. Xalni Comam ta Comam Dios sajilk'inal yeyi, mach ninoj k'ejalholo aycoj yin̈. 6Yet ẍjalni ta hune'xan̈e je b'oj Comam Dios, yaja' haca' xol k'ejholo chon̈ eq'ui, ha' chaliloj ta hej tzetet tx'oj ẍju, yin̈ hactu', lek'ti'on̈, mat st'in̈aniloj ẍju. 7Comam Dios sajilk'inal yeyi, yuxin ta yin̈ sajilk'inal chon̈ ehc'oj, hune'xan̈e jewej, ha' schiq'uil Comam Jesús Sc'ahol Comam Dios, ayn̈etic'acoj xtx'ahniloj sunil hej co mul. 8Ta ẍjala ta mach co mul, hayon̈tic'a ẍjeta'ab'ix co b'a, b'oj mat st'in̈anil stzoti' Comam jin̈. 9Ta ẍjalatij co mul tet Comam Dios, cha'can tan̈oj Comam co mul. Sunil co tx'ojal chiloj Comam, haxca stoholaln̈e chu, b'oj tzettic'a chala chij sb'a. 10Ta ẍjala ta mach co mul, lek'ti' mi Comam chaltu', b'oj maẍtom ẍja' yuluj co c'ul yin̈ Stzoti' Comam.


Copyright
Learn More

will be added

X\