1 CORINTIOS 9

1Yin̈ caw yeli ay woc yin̈ tzet ye hunk'aanxa heb'ya' apóstolan haxca apóstolin paxan, haxca xwil Jahaw Jesúsan. Hexti' ayexxacoj yin̈ Comam yu hantaj xax quin munla te xol yin̈ smunil Comam Jahaw tu'an. 2Waxan̈ca ay mac ẍhalni ta mat hin apóstolojan, yaja' walex heyohtaj, haxca wuan ayexxacoj yin̈ Comam Jahaw, ha' ẍhalniloj ta yeli apóstolinan. 3Hacti' hin pajtzen tet mac tx'oj ẍhalni win̈an. 4Yet mi ay hin chani tzet chin loan, 5b'oj winic'oj hunuj wixal win̈an, hunuj ix ayxacoj yin̈ Comam, haca' chute ya' Pedro b'oj hunk'aanxa heb'ya' apóstol, b'oj heb'ya' yuẍtaj Comam Jahaw. 6¿Mato hayinxan̈e b'oj ya' Bernabé machu ya'lax stohol tzet ẍco lo yet lan̈an jalnic'oj stzoti' Comaman? 7¿Tox ay hunuj mac cha' soldadoal, ha'tic'a' ẍlok'ni yec'b'al yu xin? ¿Tox ay hunuj mac stz'un hunuj slob'eal, yaja' mach sat te' chab'le? ¿Tox ay hunuj naj tan̈eom nok' machuc'ni slech no' nok' stan̈e tu' xin? 8Yaja' taj cheyala ta hayinn̈e hactu' walnian, hactu' yalni pax sley ya' Moisés. 9Macheyacoj yet sti' no' buey xan̈niltij sat ixim trigo, ẍiayoj. Hune' tu' matzet chala ta no' buey aycoj yin̈ sc'ul Comam Dios, 10to hayon̈ chon̈ yacoj Comam yin̈ sc'ul, yuxin xal Comam hune' tu'. Yuxin ha' ye naj patxom tx'otx', ha' ye naj xan̈omiltij sat trigo, ta ẍmunla heb'naj, to haxca ẍcawxi sc'ul heb'naj schanoj yet yin̈ hantaj ixim ch'ahoj. 11Yuxin hayon̈ xco tz'un stzoti' Comam Dios yin̈ heyanmaan, ¿tox mat yetwanoj ay he ya'ni ninoj yec'b'al juan xin? 12Ta ay hunmajanojxa heb'ya' che yam yec'b'al yu, hajxam hayon̈an yetwanoj mi co chani ninoj tzet cheya' jetan.Waxan̈ca yet ay co chani yec'b'al ju teyetan, yaja' maẍtic'a hunecoj xco k'anan to xjijleaytojan, hayon̈ caw chon̈ munlaan yun̈e mach ẍtuqui yal-laxc'oj stzoti' Comam Cristo. 13Heyohtaj ta mac ẍmunla yul yatut Comam Dios, hat ẍwa'coj yin̈ tzet ẍhaltelax yul yatut Comam, ha' ch'elicoj to naj sacerdote ẍhalten xahanb'al sat altar ay yoc naj yin̈ tzet ẍhaltelax b'etu'. 14Hactu' ye mac ch'ec' halnojc'oj tzoti' yet colb'anil. Halb'ilcan yu Comam Jahaw ta hatic'a anma b'ay ẍhal-laxc'oj stzoti' tu', ha' ẍyamni yec'b'al yu naj. 15Yaja' walinan, waxan̈ca yet ay hin chani yec'b'al wu teyetan, yaja' mach hunecoj xin k'anan. Mataj yu heya'ni yuxin ẍwatoj hune' wum ti' teyetan. K'a' c'ulmi ta chin camnaan sataj hin k'anni hunuj tzetet teyetan, haxca mach sje' hin c'ulan ta ay mac ch'iniloj hune' tzalalal ti' wetan. 16Hayin ti'an mat yetoj ay yoc hin mayan haxca chin ec' wala'c'oj tzoti' yet colb'anil tet anmaan, haxca chejb'il wub'an. ¡C'antajinan ta machin ec' wala'c'oj hune' tzoti' ti'an! 17Ta wet yul hin wi' wec' walnojcoj tzoti' ẍwalcoj ti'an, hattic'am chin chana spaj b'eti'an. Yaja' machoj, to hin chejb'anil ye wec' walnojc'oj yu Comaman. 18Waxan̈ca yet ay hin k'anni yec'b'al wu yin̈ hune' munil walnic'oj tzoti' yet colb'anilan, yaja' spaj chin chaan, ha' hin tzalalal yu mach tzet chin k'an yu hin munil ti'an. 19Machincoj yalan̈ schejb'anil hunuj anmaan, yaja' ẍwa' hin b'a haca' chejab' tet sunil anmaan yun̈e stzujcha wi'ni hantaj mac ch'oc tzujnuj yin̈ Comam Cristoan. 20Yet ayin xol wetcon̈ob' israelan, haca' israel ẍwute hin b'aan yu stzujcha wi'ni haywan̈ojan. Chin yijye tzet chal leyan, yaja' yin̈ st'in̈anil machincoj yalan̈ hune' ley tu'an. Hactu' ẍwute hin b'aan yun̈e ẍcolcha hej wetcon̈ob' tu'an. 21Hactu' yet ayin xol anma mat israeloj machcoj yalan̈ leyan, haca' ye heb'jetb'i tu' ẍwute hin b'aan yun̈e stzujcha wi'ni haywan̈oj heb'jetb'ian. Yaja' yin̈ st'in̈anil ayincoj yalan̈ sley Comam Diosan, haxca lan̈an hin yijyen schejb'anil Comam Cristoan. 22Hactu' yet ayin xol anma maẍto snab'alan, haca' ye heb'jetb'i tu' ẍwute pax hin b'aan, yun̈e stzujcha wi'ni haywan̈ojan. Lahan ẍwute hinb'a haca' sunil anmaan yun̈e ta ay tzet chu scolcha haywan̈oj wuan. 23Sunil hunk'aan tzetet ti' walaj wunian yu hune' tzoti' yet colb'anil ti', haxin̈wal hayin hun chin tz'atoj yin̈an. 24Hexti' heyohtaj, yet ay hunuj an̈e, sunil mac ch'an̈ewi, yaja' hune'n̈e mac ch'i'wayi. Haca' chute heb'naj ch'an̈ewi tu', hactu' cheyute yin̈ yet Comam Dios, haxin̈wal chex i'waoj. 25Hantaj mac scuy sb'a yin̈ hunuj sajach, scach sb'a yin̈ hej tzetet ch'a'ni alb'oj snimanil, yun̈e yi'wayi. Hune' tzet chi' tu' mach steye. Wal tzet ẍji' hayon̈ ti' maẍtic'a ẍtan̈ojiloj. 26Hactu' ye hune' ti'. Haca' ye naj an̈ewom tu' chitij naj yanma yin̈, hactu' wean. Ẍwa' howalan yaja' mat haca'oj mac nab'an̈e ch'eltoj sk'ab', 27to chin cach hin b'aan, ẍwanicoj hin nimanil ti' syijyenoj b'aytet ẍwochean, haxca taj lawi wawtencoj anma yin̈ hune' ti'an cat walaxojiltoj yin̈tajilojan.


Copyright
Learn More

will be added

X\