1 CORINTIOS 8

1Wal tinan̈ xin, chiwaltojan teyet yin̈ huntek'an itah chihaltelax tet ej tioẍ. Caw yel haca' yallaxi. “Caw ay cohelanil cosunil,” ẍi. Yaja' cohelanil tu' ay ismay jinican̈ coba yu. Wal ta xahan chijil coba hununon̈, chon̈ch'ib yin̈ yet Comam haca' tu'. 2Tato ay hunu mac caw ay isnabal chute istxumni, maẍto isnabal hune' mac tu' yin̈ haca' caw yelapno yehi. 3Wal mac ayco yanma yin̈ Comam Dios, caw ohtabil yu Comam. 4Wal yin̈ islolax huntek'an itah chiak'lax yin̈ xahanbalil tet ej tioẍ, caw matzet chaliloj yuto huntek'an tioẍ tu' caw johtaj tato caw matzet chal yelapno yul sat yiban̈k'inal ti', yuto hune'n̈ech'an Comam Dios. 5Yaja' waxan̈ca xin ay mac chihalni ta ay tx'i'al dios satcan̈, yeb yul sat yiban̈k'inal ti' ta hac tu' tx'i'al dios, yeb tx'i'al yahaw yul sat ebnaj. 6Yaja' wal han̈on̈ ti', hune'n̈ech'an coDiosal, ha' ton Comam Dios mame. Ha' Comam tu' yichebanil sunil tzet ye tu', yetpaxo Comam je han̈on̈ ti'. Hune'n̈ech'anpaxo Jahawil, ha' ton Comam Jesucristo. Yu Comam tu', yuxin ay sunil tzet ye tu', yeb yu Comam yuxin ayon̈. 7Yaja' mach sunilo ebnaj juẍta chinachalo hune' ti' yu. Yuto ay ebnaj chi-tic'a-yiyo isba tet tioẍ yet yalan̈tocanoj, yuxin yet chisc'uxni ebnaj no' chibe haltebilxa yin̈ xahanbalil tet tioẍ tu', chito cabcon isc'ul, chistxumni ebnaj ta ch'etaxto ebnaj yu. 8Yaja' maẍtaj yu tzet chicolo yuxin chon̈can c'ulal yul sat Comam Dios, maẍtaj yu chicolo huntek'an itah tu' yuxin chon̈c'ulbiloj, maca yu mach chicolo yuxin chon̈can tx'ojal. 9Caw cheyil heba, tajca yu chisje heloni yuxin cheyak' ayc'ayo hunu mac maẍto yip yin̈ yet Comam. 10Tajca yu heyohtaxa ta mach txahulo heloni huntek'an itah tu', yuxin chexay tz'on̈no wa'o yul yatut tioẍ, yaja' ta ay ebnaj juẍta chexilni yin̈ haca' tu', mach ismunil hex cawex cheyijba ebnaj isloni huntek'an itah haltebil tet tioẍ tu'. 11Ta hac tu' cheyute, cheyak' ayc'ayo hunu mac maẍto yip yin̈ yet Comam, wal xin ha' yin̈ hune' mac tu' campaxo Comam Jesús. 12Yuxin tato heyu yuxin chietaxto isnabal hunu heyuẍta maẍto yip yin̈ Comam, cheyaco hemul yin̈ haca' tu' yul sat Comam Jesucristo. 13Yuxin ta yun̈e inc'uxnihan no' chibe yuxin chiwak' ayc'ayojan hunu wuẍtajan, k'ac'ul tom mach chinc'uxan no' chibe tu', haxinwal machi hunu mac chaco ismul wuhan.

will be added

X\