1 CORINTIOS 8

1Tinan̈ chin oc wala tzet yelapnoj ye no' chib'e ẍhaltelax xahanb'alil tet hej tioẍan. Yeli co hunilon̈ johtaj ta matzet chaliloj hej tioẍ, yaja' ta yin̈n̈e tzet johtaj ẍcawxi co c'ul, co mayn̈e ẍjacoj chaltu', yaja' ta ẍjoche jet-anmail, co t'in̈b'acoj chaltu'. 2Ta ay mac chacoj smay chalni ta caw ay tzet yohtaj, ha' ch'elicoj, matzet yohtaj. 3Yaja' mac ch'ochen Comam Dios, caw ohtajb'il yu Comam chaltu'. 4Wal yin̈ co c'uxni no' chib'e halteb'il xahanb'alil tet hej tioẍ, johtaj ta matzet ch'elicoj hunk'aan tu', haxca hej tioẍ tu' mach yanma. Hune'n̈e Comam Dios aya. 5Waxan̈ca chal anma ta tx'ihal tioẍ ay satcan̈, b'oj sat tx'otx'otx' ti', yin̈ hactu' caw tx'ihalmi hej tioẍ chaltu' b'oj caw tx'ihalmi mac yahaw. 6Wal jet hayon̈ ti', hune'n̈e Comam Dios aya, co Mamwejpaxoj, ha' yichob'anil hej tzetet, b'oj yetn̈e Comam jeyi. Hune'n̈e pax Jahaw aya, ha' Comam Jesucristo. Yu Comam sunil tzetet aya, b'oj yu Comam yuxin ayon̈. 7Yaja' mat suniloj heb'ya' jetb'i ohtajn̈e hune' ti'. Ay heb'ya' ẍtic'a hak'en hej tioẍ payxa, maẍto snab'al, yuxin yet sc'uxni no' chib'e halteb'il xahanb'alil tet hej tioẍ tinan̈, ẍto xiwi haxca chacoj smul chab'e. 8Yaja' mataj tzet ẍco lo chon̈ anicoj c'ulal yul sat Comam Dios. Matoj k'a' c'ulon̈ haxca ẍco lo hunk'aan tu', matoj k'a' tx'ojon̈ haxca mach ẍco lo. 9Waxan̈ca matzet chaliloj ẍjab'e ẍco loni sunil hej tzetet, yaja' ayto jetb'i maẍto snab'al, chu yetantoj sb'a ju. Yuxin nann̈e ju ẍjuni hej tzetet yin̈ sat jetb'i. 10Hexti' heyohtajxa ta matzet chaliloj hunk'aan tu', yuxin chex ay tz'on̈noj wa'oj yatut hej tioẍ, yaja' ay heb'ya' jetb'i maẍto snab'al ch'ilni, hacatic'a che yijb'a heb'ya' sc'uxni no' chib'e halteb'il tet hej tioẍ tu'. 11Yin̈ hactu', yu tzet heyohtaj, lan̈an sc'aynitoj sb'a hune' ya' jetb'i maẍto snab'al, yaja' ha'hun ya' tu' b'ay xa' camoj sb'a Comam Cristo. 12Ha' chetantoj sb'a hunuj heb'ya' juẍtaj maẍto snab'al, hex hun cheyacoj he mul yin̈ Comam Cristo. 13Walinan ta yu hin c'uxni no' chib'ean yuxin ẍlecta hunuj wetb'ian, k'a' c'ul mi ta machnab' chin c'uxna chib'ean, yun̈e mach mac chetatoj sb'a wuan.


Copyright
Learn More

will be added

X\