1 CORINTIOS 7

1Tinan̈ xin chiwatojan ispaj huntek'an hek'ambebal heyati yul hecarta wetan. C'ul tato mach chik' ebnaj winaj yixal. 2Yaja' yun̈e mach chiayc'ay ebnaj maca ebix ix yin̈ mule, yuxin yilal yik'ni ebnaj yixal, yeb yik'nipaxo ebix ix yichamil. 3Naj ichamile yilal yochen naj yixal, hacpax tu' ix ixale yilal yochen ix yichamil. 4Yuto ix ixale matxa yeto isba ix ischuquil, walxinto yetxa yichamil ix yehi. Hacpax tu' naj ichamile, matxa yeto isba naj ischuquil, to yetxa yixal naj yehi. 5Yuxin mach chu heman̈c'on heyochelen heba hununex, cachan tato lahti'xa ye heyu heman̈c'on heba teyet hununex yin̈ hayebo tz'ayic yu hetxahli tet Comam Dios yin̈ sunil heyanma. Yaja' xin yilal hehunbanpaxo heba hunelxa, yuto c'uxantaxca mach chitecha heyu yin̈ tzet choche henimanil, cat yoc naj matzwalil quexyilwenoj cat heyayc'ayi cat heyanico hemul. 6Huntek'an chiwaltoti'an mach caw chejbanile chucanicoj, wal xin ton̈e chiwaltojan teyet yu heyilni tato chu heyijeni. 7Wal inti'an, ay wala'an sunil mac chican haca' weti'an, yaja' nananta conabal hununon̈ yu Comam Dios. Yuto ay mac mach choche chik' yixal, aypaxo mac mach ch'ec' yu tato mach chik' yixal. 8Chiwalan tet mac maẍto chimohyi, yeb tet ebix camnaxa yichamil, c'ul tato mach chik' yetbi haca' weti'an. 9Yaja' ta ay mac mach chitecha yu ye ischuquil chabe, yilal ismohyi sata ton̈e choche chiec' ixloj maca winajloj. 10Yaja' wal tet mac mohyinaxa xin, chiwak'an huntek'an chejbanile tet, huntek'an chejbanile ti' mach wetojan, to yet Comam Dios yehi. Hex ixale mach chepohle heba yeb heyichamil. 11Yaja' tato ay hunu ix ix chispohle isba yeb yichamil, matxa chu yik'ni ix hunuxa winaj, cachann̈e yeb yichamil ix tu' chisje ishunban isba hunelxa. Hacpax tu' naj ichamile, mach chu ispohni isba naj yeb yixal. 12Wal tet hunmajanxa xin chiwaltojan huntek'an ti', yaja' mach ischejbanilo Comam Dios, to haninan chiwaltojan: Tato ay hunu naj juẍtaj maẍto chaco isba yixal yul isk'ab Comam Dios, yaja' tato chitzala isc'ul ix isc'atan̈ naj, hune' naj juẍta tu', mach chu ispohni isba naj yeb ix. 13Yeb xin tato ay hunu ix janab, maẍto chaco isba yichamil yul isk'ab Comam yaja' chitzala isc'ul naj yeb ix, mach chu ispohni isba ix yeb naj. 14Yuto waxan̈ca maẍto ayoco yichamil ix yul isk'ab Comam, yaja' hacojtam yetxa Comam Dios ye naj, yuto hun ye naj yeb hune' ix ix ayxaco yul isk'ab Comam Dios. Hacpax tu' ix maẍto ayoco yul isk'ab Comam, hacojtam yetxa Comam Dios ye ix, yuto hun ye ix yeb hune' naj ayxaco yul isk'ab Comam. K'inalo ta maẍto yeto Comam ye iscawan̈il lahanmi chielico yuninal haca' yuninal anma maẍto ayoco yul isk'ab Comam Dios, walxinto haca'xa yuninal Comam Dios yehi. 15Yaja' ta naj ichamile maca ix ixale maẍto ayoco yul isk'ab Comam tu', choche ispohle isba yeb yetbi, ispohab isba. Yin̈ haca' tu' chicancano naj juẍtaj maca ix janab tu' yin̈ ak'anc'ulal, yuto choche Comam Dios tato chexec' yin̈ ak'anc'ulal. 16Yuto hach ixale hach ti' maẍto hawohtajoj tato chicolcha hawichamil tu' yu isc'ulal chabeybaln̈e, maca hach ichamile hach ti' maẍto hawohtajoj tato chicolcha hawixal tu' yu isc'ulal chabeybaln̈e, wal xin c'ul ta mach chepohle heba. 17Wal hununon̈ xin, haca'tic'a jehi yet con̈yawten Comam Dios, hac tu' chu coyijen yin̈ tzet xayak' Comam jet. Hac tu' chejbanil wak'an tet macta ayxaco yul isk'ab Comam yul hunun con̈ob. 18Tato ay hunujex ayxaco circuncisión yin̈ henimanil yet quexyawten Comam, machojab cheyeba hune' circuncisión tu'. Maca tato maẍto circuncisión teyin̈ yet quexyawten Comam, matxa yilalo cheyak' circuncidar heba. 19Yuto ha' hune' caw yilal yehi ha' heyijen ischejbanil Comam Dios, machi yoc yin̈ ta ayxaco circuncisión teyin̈ maca machoj. 20Haca'ojab heye yet quexyawten Comam Dios yuninaloj, hacojab tu' cheyucanoj. 21Tato ay hunu mac ayicto yalan̈ yip hunu maca yet yawtelax yu Comam, machojab chitac isc'ul yin̈ hune' tu', yaja' tato ay tzet chu yelti yalan̈ yip hune' mac tu' caw c'ultopaxoj. 22Ha' mac ayicto yalan̈ yip hunu maca yet yawtelax yu Comam, tinan̈ xin yetxa isba ischuquil yin̈ isyijen tzet chal Comam Dios. Hacpax tu' xin mac mach chejabo yehi yet yawtelax yu Comam, tinan̈ xin ischejabxa Comam yehi. 23Wal xin caw ay istohol ak'bilex yu Comam, yuxin mach cheyacto heba yalan̈ yip hunuxa maca. 24Tinan̈ xin, hex wuẍtaj hex wanab, ha' yul sat Comam Dios c'ul cocancano haca'tic'a jehi yet con̈yawten Comam Dios yuninaloj. 25Wal mac maẍto mohyinajoj machi chejbanile yak'cano Comam wetan yin̈, wal huntek'an chiwaltoti'an xin yul wetan chiwitijan, yaja' yilal caw ay yelapno yul hesat, yuto yu isc'ulal isc'ul Comam Dios win̈an yuxin yak' hune' inmunilti'an yin̈ incuywahan. 26Yul wetan, tato ay hunu naj maẍto yixal, c'ul ta mach chik' naj yixal, yuto huntek'an tiempo bay ayon̈ tinan̈ caw ya'taxa. 27Ha' mac ayxa yixal, machojab chispoh isba yeb yixal. Ha' mac maẍto yixal, c'ul ta mach chisay yixal. 28Tato ayex chexmohyi, mach muleho hune' tu'; taca hunu ix k'opo chimohyi xin, mach tx'ojopaxo hune' tu'. Yaja' wal mac chimohyi caw ay isya'tajil chila. Ay wala'an mach chak'le huntek'an isya'tajil tu'. 29Hex wuẍtaj, hex wanab, ha' chalilo huntek'an chiwaltoti'an to hanic'xan̈e tiempo ayon̈ic'oj, yuxin hex ay heyixal, machojabn̈etaj yin̈ heyixal cheyaco henabal, wal xin yilal heyak'ni hamanil yin̈ yet Comam. 30Haxa mac bisc'ulal ye xin, haca'ojtam ayco yin̈ tzalahilal, haxa mac ayco yin̈ tzalahilal xin, haca'ojtam ayco yin̈ bisc'ulal. Ha' mac chilok'ni hunu tzet ye tu' haca'ojtam mach yeto tzet chislok' tu'. 31Haxa mac chiocnico tzet ay yul sat yiban̈k'inal ti' yu, haca'ojtam mach lan̈an yocheni yuto hune' yul sat yiban̈k'inal ti' chitan̈iloj. 32Ay wala'an matzet cheyaco yin̈ hec'ul. Yet maẍto chik' yixal hunu naj tzeh, yin̈n̈e yet Comam ayco yanma naj, han̈e tzet chal Comam ha' chisyije naj. 33Wal hunu naj ayxa yixal xin, haxa yin̈ tzet ye tu' ay yul sat yiban̈k'inal ti' ha' chaco yin̈ isc'ul, yeb yu iswatx'en naj yin̈ tzet choche isc'ul yixal, hac tu' xin cabxa chielico isnabal naj. 34Hacpax tu' ebix k'opo maẍto chimohyi yeb ebix maẍtic'a yichamil, ha' yin̈ yet Comam bay ayco yanma ebix yeb sunil isnabal. Wal ebix ay yichamil xin, ha' tzet ay yul sat yiban̈k'inal ti', yeb tzet choche yichamil, ha' ayco yin̈ isc'ul ebix iswatx'eni. 35Chiwalan huntek'an ti', yaja' maẍtaj yu quexincachnihan, to yu isc'ulalo teyin̈, yeb yu hebeybaln̈en haca' choche Comam Dios, cat hemunla yin̈ ismunil Comam yin̈ sunil heyanma. 36Ta ay hunu naj juẍta choche chimohyi yeb hunu ix janab yuto istiempohalxa yik'ni yixal, chisje ismohyi, mach tx'ojo hune' tu'. 37Yaja' xin ta ay hunu mac mach chisje isc'ul chik' yixal, chi-xin-ist'in̈baco yin̈ yanma yec' yu ischuquil, k'ac'ul ta mach chimohyi. 38Yuxin ta chimohyi hune' mac tu', c'ul, yaja' ta mach chimohyi xin, ec'bal c'ultopaxoj. 39Yet itzitzto yichamil hunu ix ix, aytocto ix yalan̈ ischejbanil yichamil. Yaja' ta chicam naj xin caw yetxa isba ix ischuquil, xaisje ismohyi ix yeb mac bay chal isc'ul, yaja' tan̈e yeb hunu mac ayxaco yul isk'ab Comam. 40Yaja' wal intxumnihan, ec'balto sak'al yet ix ta mach chik' yichamil ix. Hac tu' chiwute walnihan yuto ha' hun Comam Espíritu Santo ayco wetbiojan, ha' chak'ni wala'an.

will be added

X\