1 CORINTIOS 7

1Tinan̈ chin pajtzetoj k'amb'eb'al xeyatij wet yul heyuman yib'an̈iloj mohilal. K'a' c'ul mi ta machi' heb'naj winaj yixal, quexchi. 2Yaja' ẍwal teyetan, yuxa xtx'ojal ye swi' naj winaj b'oj ix ix, yuxin yet ay yi'ni heb'naj winaj yixal, b'oj heb'ix ix yet ay yi'ni heb'ix yichamil. 3Ha' ye naj winaj ha' ye ix ix, yilal syijyen scawan̈il tzet yelapnoj ye mohilal. 4Ix ixale matxa yetoj ix snimanil schuquil, to yet-xa naj ichamile ye ix, hactu' pax naj ichamile, matxa yetoj naj snimanil schuquil, to yet-xapax ix ixale ye naj. 5Yuxin matxa chu yechemn̈en sb'a tet hunun, han̈c'a ti' ta k'umlab'il sb'a yu scachni sb'a hayeb'oj tz'ayicalil yu yoc yin̈ oración. Yaja' lawitu' yilal shunb'an sb'a hunecxa, haxca taj mach ẍc'oji syijyen sb'a, cat yoc lemna naj matzwalil yin̈ hunuj ix ix mato naj winaj cat yanicoj smul. 6Hunk'aan tzet ẍwal teyet ti'an mat chejb'aniloj, ton̈e ẍwal teyetan yu he txumni b'aytet k'a' c'ul ch'elicoj. 7Ay wala'an sunil mac ẍcan haca' we ti'an, yaja' nanann̈e tzet ye co nab'al hununon̈ yu Comam. Ay mac mach yeẍtooj ẍmohyi, ay mac mach'ijcha yu. 8Ẍwal tet hantaj mac maẍto ẍmohyian b'oj tet hantaj mac camnajxa yetb'i, k'a' c'ul ta mach ẍmohyinayi, ta ẍcan haca' we ti'an. 9Yaja' ta mach'ijcha yu yehc'oj schuquil, k'a c'ul ta sayna yetb'i sataj ton̈c'a ẍnanon sc'ul yin̈ hej xtx'ojal. 10Yaja' tet mac mohyinajxa, ẍwa' chejb'anile tetan, mat wetojan, to schejb'anil Comam Jahaw yeyi: Ix ix mach stin̈chacan ix yichamil. 11Yaja' ta stin̈chacan ix yichamil, canojab' ix yin̈ hacn̈eti', mato ẍmeltzo ix sc'atan̈ yichamil tu'. Hactu' naj winaj machu spohni sb'a naj b'oj yixal. 12Ẍwal tet hunk'aanxa heb'ya'an, yaja' wet yul hin wi'an, mat schejb'aniloj Comam Jahaw. Ta ay hunuj naj jetb'i ayxacoj yin̈ Comam, yaja' maẍtocoj yixal naj yin̈ Comam, ta sak'al ye ix c'atan̈ naj chab'e, mach sleyal ta spoh sb'a naj b'oj ix. 13Maca hunuj ix jetb'i ayxacoj yin̈ Comam, yaja' maẍtocoj yichamil ix yin̈ Comam, yaja' ta c'ul chil sb'a naj b'oj ix, mach sleyal ta stin̈chacan ix naj. 14Waxan̈ca machcoj yichamil ix tu' yin̈ Comam, yaja' ay yoc naj yin̈ scon̈ob' Comam Dios haxca hun ye naj b'oj ix ayxacoj yin̈ Comam tu'. Hactu' ye hune' ix machcoj yin̈ Comam, ay yoc ix yin̈ scon̈ob' Comam haxca hun ye ix b'oj naj ayxacoj yin̈ Comam tu'. Ta machoj, lahan mi ch'elcoj yuninal hunk'aan tu' b'oj yuninal mac machcoj yin̈ Comam Dios, yaja' machoj, ay yoc yuninal hunk'aan tu' yin̈ scon̈ob' Comam. 15Yaja' ta naj ichamile mato ix ixale maẍto ch'oc tzujnuj yin̈ Comam choche spoh sb'a b'oj yetb'i, spohab' sb'a. Yin̈ hune' tu' matxa yoc yin̈ hunun, naj tzujanxa yin̈ Comam mato ix tzujanxa yin̈ Comam, haxca choche Comam Dios ta chex ehc'oj yin̈ ak'anc'ulal. 16Haxca hex ixale hexti' machu heyalni ta schab' heyichamil tu' scolb'anil ta mache yacanoj. Mato hex ichamile hexti', machu heyalni ta schab' heyixal tu' scolb'anil ta mache yacanoj. 17Yuxin haca'tic'a jeyi yet xcon̈ yawten Comam Dios hununon̈, yin̈ hune' tu' chon̈ cani, haca' xu ya'ni Comam Jahaw jet. Ha' ti' chejb'anil ẍwa' tet hunun iglesiaan. 18Ta chawte Comam Dios hunuj mac chab'il circuncisión yu, mat yeẍtooj sc'ay hune' yechel tu' yin̈. Ta ay hunuj mac mat chab'iloj circuncisión yu yet xawten Comam, mat yeẍtooj scha circuncisión tu'. 19Haxca ha' ti' k'a' yilal yeyi, ha' co yijyen schejb'anil Comam Dios, mach yoc yin̈ ta chab'il circuncisión ju mato machoj. 20Yuxin haca' jeyi yet xcon̈ yawten Comam yuninaloj, hactu' ẍjucanoj. 21Ta ay hex txon̈b'il he b'a tet hunuj maca yet quex oc tzujnuj yin̈ Comam, mach stac he c'ul. Yaja' ta ay tzet chu he colchayi, k'a' c'ulto paxoj. 22Mac txon̈b'il, yet xawten Comam yetoj, tinan̈ colchanajxa yu Comam Jahaw. Wal mac yet sb'a yet xawten Comam Dios yetoj, haca' txon̈b'il chucan tet Comam Cristo. 23Haxca lok'b'il hon̈xa yu Comam Dios, yuxin matxa ẍco txon̈toj co b'a schejab'oj anma. 24Tinan̈ hex wuẍtaj hex wanab', hacatic'a jeyi yet xcon̈ yawten Comam, hactu' ẍjucanoj. 25Yin̈ heb'ix maẍto mohyinajoj, mach hunuj chejb'anile xa' Comam wet yin̈ hune' tu'an. Yaja' chu wanicoj ninoj wet yin̈an, haxca sc'ulal sc'ul Comam Jahaw xa'ni hin chejb'anil hin cuywaan, yuxin yetwanoj aya caw ay yelapnoj chucanoj yul he sat. 26Yuxin ẍwalan ta ẍcan naj winaj haca' ye tu' yu sya'tajil lan̈an yul jib'an̈ tinan̈. 27Ta ayxa heyixal, mache poh he b'a b'oj heb'ix, taca maẍto heyixal, k'a t'in̈an mache say heb'ix. 28Ta chex mohyi mach he mul cheyacoj, ta ay hunuj ix k'opo ẍmohyi, mach smul ix chacoj. Yaja' maquex chex mohyi caw ay sya'tajil cheyila', yu hune' tu' ay wala'an machex mohyi. 29Hex wuẍtaj hex wanab', ha ch'elicoj tzet ẍwal ti'an to lan̈an stzujcha stz'ayicalil. Yuxin mac mohyinajxa, mat han̈c'aoj xtx'inb'acoj yin̈ sc'ul. 30Mac b'isc'ulal ye yu scamom, mat han̈c'aoj hune' tu' chacoj yin̈ sc'ul. Mac k'in̈ yeyi, hacojtam mat k'in̈oj yeyi. Mac ẍlok'ni hunuj tzetet, mat yin̈ojn̈e chacoj yanma. 31Mac ch'ocnicoj hej tzetet ay satyib'an̈k'inal ti' yu, mach palc'on yochen chala, haxca ha' yeltich'anil satyib'an̈k'inal ti' tinan̈ lan̈an yec'nitoj. 32Wocheb'alan matzet che tx'inb'acoj yin̈ he c'ul. Yet maẍto yixal hune' naj tzeh, yin̈ hej tzetet yet Comam Jahaw aycoj yanma naj, han̈c'a hej tzetet choche Comam aycoj yin̈ sc'ul naj yuni. 33Yaja' naj ayxa yixal, ha' hej tzetet yet satyib'an̈k'inal b'ay aycoj yanma naj, b'oj ha' tzet choche yixal naj ha' k'a' aycoj yin̈ sc'ul naj yuni, yuxin cab' yetoj yanma naj. 34Hactu' ye heb'ix k'opo matto mohyinajoj, mato ix maẍtic'a xmohyicoj. Chu yanicoj heb'ix hej tzetet yet Comam Jahaw yin̈ sc'ul haxca han̈c'a tzet choche Comam Dios choche heb'ix yub', wal yin̈ yanma, wal yin̈ snimanil. Yaja' ix mohyinajxa, ha' hej tzetet yet satyib'an̈k'inal ti' aycoj yin̈ sc'ul ix, haxca b'aytet choche yichamil ix aycoj yin̈ sc'ul yuni. 35Ẍwal hune' ti' teyetan, yaja' matoj yu hex hin cachnian, to yu sc'ulaloj heyet b'oj yun̈e k'a' cheyacoj yin̈ he c'ul heyijyen Comam, haca' caw yub'anil. 36Yuxin hex mame mi'e ta ay hunuj he k'opo lan̈an yec'nitoj smohyi, matxa ch'ijcha sk'opoal yu, k'a' t'in̈an smohyi, ta k'a' c'ul yin̈ hactu' cheyab'e mak'b'il smohyi, mat xahanoj. 37Yaja' ta ayex ay hunuj he k'opo matzet chal sc'ul smohyi, k'a' c'ul mi ta mach ẍmohyi. Chu heyuni b'aytet k'a' c'ul ch'elicoj teyet cheyab'e. 38Yuxin ta ẍmohyi he yix unin tu', c'ul, taca mach ẍmohyi, k'a' c'ulto paxoj. 39Yet itzitzto yichamil hunuj ix ix, aytocoj ix yalan̈ schejb'anil naj. Taca ẍcam naj, chu smohyi ix b'oj hunujxa naj chal sc'ul, yaja' tan̈e ayxacoj naj yin̈ Comam. 40Yaja' k'a' eltich'an mi ta matxa chi' ix yichamil, hactu' ẍwute walnian, haxca ha' Yespíritu Comam Dios aycoj win̈an, ha' ch'a'ni wala' ẍwab'ean.


Copyright
Learn More

will be added

X\