1 CORINTIOS 6

1Yet ay hunuj he howal b'oj hunujxa heyetb'i ayxacoj yin̈ Comam Dios, ¿tzet yuxin tet hune' naj alcal maẍto tzujanoj yin̈ Comam chex oqui? ¿Tzet yuxin mataj yin̈ sat mac ayxacoj yin̈ Comam che watx'e he b'a? 2Johtaj to hayon̈ ayon̈xacoj yin̈ Comam Dios ẍji'a'tij cuenta yin̈ anma satyib'an̈k'inal ti' b'ak'in̈. Yuxin ta hayon̈ ẍji'a'tij cuenta yin̈ anma b'ak'in̈, ¿tox machu he watx'en hunk'aan tzetet caw comonaln̈e ye ti' xin? 3Johtaj to hasta hej ángel ẍji'a'tij cuenta yin̈ b'ak'in̈. Hajxam hej tzetet ay satyib'an̈k'inal ti', ¿tox machu co watx'eni? 4Yuxin ta ay he howal yin̈ tzetet yet satyib'an̈k'inal ti', ¿tzet yuxin heb'naj alcal mach yoc yin̈ iglesia che say heyila'? 5Ẍwal hune' ti'an yun̈e he tx'ixwi ninoj: ¿Tox mach hunuj mac te xol ay stz'ajanil sc'ul swatx'en he howal tu' xin? 6Tx'ixwub'al he ya'ni howal b'oj heb'ya' jetb'i ayxacoj yin̈ Comam, yaja' k'a' tx'ixwub'alto he to tet heb'naj alcal maẍto tzujanoj yin̈ Comam Dios. 7Caw mat c'uluj ta owaln̈e che yu, ¿tzet yuxin mache yijleaytoj cheya'ni nimanc'ulal yin̈ hunuj heyetb'i ch'etlicoj teyin̈? ¿Tzet yuxin mat ton̈eoj cheyila ch'elk'ancoj hunujxa mac teyin̈? 8Hajxa, to hextic'a caw che poh sb'elal b'aytet mat st'in̈aniloj, hasta hex hun chex elk'ancoj yin̈ heyetb'i. 9- 10Johtaj to anma tx'oj, machu yoc yul sk'ab' Comam Dios. Mache ya' sub'u he b'a, haxca anma ch'ixli b'oj heb'ix sayni swinaj, mach'ocoj hunk'aan tu' yul sk'ab' Comam. Mac ẍhak'en hej tioẍ, mac ay yixal cat sayni hune'xa ix yin̈, mac ẍpaq'uicoj yin̈ yet-winajil, mac elk'om, mac pek'melyu, mac scamtze swi' yu te' uq'ue, mac ẍhob'nican̈ lek'ti'al yin̈ yetb'i, mac sajsajil ch'elk'ani, mach'ocoj hunk'aan ti' yul sk'ab' Comam. 11Ayex hactu' heye yalan̈to, yaja' tinan̈ tx'ahb'ilxa heyanma, hex yet-xa Comam Dios b'oj ab'ilexxacoj yin̈ sc'ulal yul sat Comam yu Jahaw Jesucristo, b'oj yu Yespíritu Comam. 12Ay mac ẍhalni to chu juni b'aytet chal co c'ul. Yeli, yaja' mat suniloj yet ay juni. Chu wuten b'aytet chal hin c'ulan, yaja' mach wa' ayoj hin b'a yul sk'ab' tzetet chin aniayojan. 13Ẍhalot paxoj: Ita yet co c'ul yeyi, co c'ul yet ita yeyi, ẍi. Yeli hactu', yaja' sc'aya'loj Comam Dios scab'il. Yaja' wal co nimanil ti' mat yuoj yixli, mat yuoj sayni swinaj, yuxin xwatx'i, to yu yocnicoj yu Comam Jahaw yuxin xwatx'i. Ha' xin Comam ch'a'noj tzet ch'ocnicoj yu co nimanil ti'. 14Haca' xu spitzc'ancan̈ Comam Dios Comam Jahaw, hactu' hon̈ spitzc'a'nojcan̈ Comam yu scan̈il yeyi. 15Johtaj to co nimanil ti' ay yoc yin̈ snimanil Comam Cristo. ¿Tox yet ay jinitoj hanic'oj snimanil Comam, cat co to janojcoj yin̈ snimanil hune' ix tx'oj ye swi' xin? ¡Machoj! 16Johtaj to yet shunb'an sb'a hune' naj b'oj hune' ix tx'oj ye swi' hunexan̈e nimanileal chucan naj b'oj ix. Haxca chal Yum Comam Dios: Hune'xan̈e nimanileal chucan scawan̈il, ẍi. 17Wal mac ẍhunicoj yin̈ Comam Jahaw, hune'xan̈e espíritu chucan b'oj Comam. 18Yuxin tinan̈, nann̈e heyu yin̈ hej ixloj maca he sayni he winaj. Tzantzet hunujxa smul anma saya, mat chetatoj snimanil, yaja' mac chacoj smul yin̈ hej ixloj mato sayni swinaj, chacoj smul yin̈ snimanil. 19Johtaj to yatut Comam Espíritu Santo ye co nimanil ti', Comam ab'il jet yu Comam Dios yu yehcoj jin̈. Mat jetoj co b'a co chuquil, 20haxca lok'b'il hon̈xa yu Comam Dios. Yuxin ja'awejcoj smay Comam yin̈ co nimanil.


Copyright
Learn More

will be added

X\