1 CORINTIOS 6

1Hayet ay howal texol, ¿tzet yin̈ yuxin ha' tet ebnaj alcal yul sat yiban̈k'inal ti' chextohi yu iswatx'enayo ebnaj hune' howal tu'? ¿Tzet yin̈ xin maẍtaj tet yuninal Comam Dios chextohi? 2¿Tom mach heyohtajo xin tato han̈on̈ ayon̈xaco yul isk'ab Comam ti', han̈on̈ chon̈oc jila' yin̈ tzet chielico anma ay yul sat yiban̈k'inal ti'? Yuxin tato chon̈oc jila' yin̈ tzet chielico anma yet bak'in, ¿ha' tom xin niẍte howal ch'ah texol, mach chu hewatx'enayoj? 3¿Tom xin maẍto heyohtajopaxoj tato han̈on̈ ti' chon̈oc jila'paxo yin̈ tzet chielico ebnaj ángel yet bak'in? Hajxam tzet ye tu' yul sat yiban̈k'inal ti', ¿tom mach chu cowatx'enayo heyalni? 4Yuxin yet ay howal ch'ah texol, ¿tzet yin̈ xin sata ebnaj machi yoc yin̈ yuninal Comam Dios chexto hewatx'eyoj? 5Chiwaltojan hune' ti' teyet yun̈e hetx'ixwican̈. ¿Tom machi hunu mac texol chu iswatx'enayo howal ch'ah xol ebnaj juẍtaj tu'? 6Wal xin mach ton̈e cheyak'le howal, to chek'anlepaxo teyin̈ sata ebnaj alcal, ebnaj yul sat yiban̈k'inal ti'. 7Hayet cheyak'ni howal teyin̈ hununex caw tx'oj hune' tu' yul sat Comam Dios. ¿Tzet yin̈ xin mach cheyak' techahoj tato ay hunu mac chiwatx'en istx'ojal teyin̈? ¿Tzet yin̈ xin mach cheyak' nimanc'ulal tato ay hunu mac chielk'anilo hunu tzet ye tu' teyet? 8Walxinto hextic'a chewatx'e tzet ye tu' mach c'uloj, cat heyelk'awipaxo yin̈ ebnaj juẍtaj. 9- 10¿Tom mach heyohtajo xin tato mac chiwatx'en istx'ojal mach chu yoc yul isk'ab Comam Dios? Wal xin mach cheyak' subchaho heba, yuto mac chiixli yeb mac chiwinajli, yeb mac chisjahba isba sata tioẍ, yeb mac ay yixal cat issayni hunuxa ix, yeb mac ay yichamil cat issayni hunuxa winaj, yeb ebnaj winaj chi-la-uten mule yeb yet winajil, yeb xin mac elk'om, yeb mac pek' melyu, yeb mac uc'um te', yeb mac hobomcan̈ tzoti' yin̈ yet anmahil, yeb mac chiik'ni ismelyu yin̈ lek'ti'al, mach chu yoc yul isk'ab Comam Dios. 11Ayex ti' hac tu' heyeco yet yalan̈tocanoj, yaja' wal tinan̈ sajxa ye heyanma yeb yetxa Comam Dios heyehi. Xaquexoc c'ulal yul sat Comam Dios yu Comam Jesucristo, yeb yu Yespíritu Comam Dios. 12Ay mac chihalni, tato chisje cowatx'en sunil tzet chal coc'ul, caw yeli yaja' matxa jeto ye cowatx'en sunil tzet ye tu'. Haninti'an chisje inwatx'enan sunil tzet chal inc'ulal, yaja' mach chiwak'an hamanil tet huntek'an tu' yun̈e mach chioc quinyijba'an yin̈ tzet chala. 13Aypaxo mac chalni haca' ti': “Ha' tzet chicolo yet coc'ul yehi, ha' coc'ul tu' xin yet tzet chicolo yehi,” ẍi. Yeli hac ton tu' yehi, yaja' tzet chicolo tu' yeb coc'ul tu' chiapni istz'ayical bay chitan̈ilo yu Comam Dios. Wal conimanil xin mach yeto ixloj maca winajlo yehi. Walxinto yetxa Comam Jesucristo Jahawil ye conimanil ti', yetxapaxo conimanil ye Comam. 14Haca' yu yak'ni itzitzbocan̈ Comam Dios Comam Jesucristo Jahawil xol camom, hac tu' chu con̈yak'ni itzitzbocan̈ Comam yu yip. 15¿Tom mach heyohtajoj tato hune' conimanil ti' caw yetbixa isba yeb isnimanil Comam Jesucristo? ¿Tom xin chu jinito isnimanil Comam tu' cat cohunban yeb isnimanil hunu ix ix tx'oj ye iswi'? ¡Machoj! 16¿Tom mach heyohtajo xin, tato yet chishunban isnimanil hunu naj yeb hunu ix ix tx'oj ye iswi', hunxan̈e anmahil chucano naj yeb ix? Yuto chal yul Yum Comam Dios haca' ti': “Hunxan̈e anmahil chucano iscawan̈il,” ẍiayoj. 17Hayet chijanico coba yul isk'ab Comam Dios hunxan̈e chijucano yeb Comam. 18Wal xin nann̈e heyu, machojab cheyak' hamanil tet ixloj maca winajloj. Tzijxan̈e istx'ojal chaco hunu mac maẍtaj isnimanil chetatoj, yaja' wal mac chiixli maca chiwinajli, caw ha' yin̈ isnimanil chaco ismul. 19¿Tom mach heyohtajo xin, tato yatutxa Comam Espíritu Santo ye henimanil, Comam ak'bil teyet yu Comam Dios yun̈e yeh yul heyanma? Yuxin matxa heyeto heba hechuquil. 20Wal xin lok'bilexxa yu Comam Dios, yuxin watx'ewe isc'ulal yin̈ henimanil, haxinwal chioc ismay Comam Dios heyu.

will be added

X\