1 CORINTIOS 4

1Xja' he yohtajn̈ean to ẍchejab'n̈e Comam Cristo jean. Ton̈e ab'il co chejb'anil yin̈ ja'ni stzoti' Comam Dios tet anmaan, hune' lan̈an yal-laxc'oj xol anma ti'. 2Mac b'ay ch'a'lax hune' chejb'anile, yilal yijyom chute sb'a. 3Yaja' walinan, mach wacoj yin̈ hin c'ulan ta ayex xb'isb'oncoj he c'ul win̈an, mato hunujxa maca. Hasta hayinan mat hun nanoj wuan ta ay ninoj hin c'ulalan. 4Waxan̈ca mach b'ay chin lecta yin̈ hin munil ti' ẍwab'ean, yaja' matoj yu, mach b'ay chin lectaan, to han̈c'a Comam Jahaw chu yalni ta c'ul ch'elcoj hin munil ti'an mato machoj. 5Yuxin mach cheyi'coj heyetoj yin̈ anma tinan̈. Echmawej yul Comam Jahaw, hato Comam ch'anojiltij yin̈ hab'an tzet ewan ye yin̈ janma hununon̈. Hato tu' cha'a' Comam ohtajn̈elaxoj hej tzetet ib'il yu janma hununon̈, cat ya'noj Comam stzalab'al co c'ul hantaj stzujchaapnoj ju co chani. 6Hex wuẍtaj hex wanab', yu sc'ulaloj heyet ẍwanicoj hin b'a haca' satojan b'oj ya' Apolos yu co yenilojan. Ẍwal hune' ti'an yun̈e chex k'ayiloj machex palc'on yib'an̈ tzet tz'ib'n̈eb'ilcanoj, yun̈e machex cheyacoj smay hunujxa heb'ya' jetb'i, yaja' mach yelapnoj ye hunujxa heb'ya' yul he sat. 7Mach hunujon̈ chu janicoj lolo'al jin̈ ẍjalni ta k'a' c'ulon̈ sataj hunujxa maca, haxca hantaj ẍju, Comam Dios ch'a'ni jet, yuxin machu janicoj co may. Machu jalni ta scan̈il je yeyi, to ha' Comam ch'a'ni jet. 8Ham heyalni ta tz'ajan lahanxa heyeyi, sunilxa tzet cheyoche ayxa teyet, haca'xa yahawex heyalni, yaja' hayon̈ti'an mat yahawojon̈ teyin̈an. Tzettam sak'al ta yahawex, ta hactu' aymi joc yin̈ tzet ayexan. 9Haca' wilniti'an, to hayon̈ apóstolon̈ ti'an chon̈ yacoj Comam Dios haca' anma aycoj yin̈ sn̈ehaloj hun hojan anma, haca' mactaj ẍpotx'laxoj yila' anma. Haca'tic'a chon̈ alaxcoj yin̈ sat sunil anma ay satyib'an̈k'inal ti' yu co matz'elax yu heb'naj ángelesan, b'oj anma. 10Yu sya'iloj Comam Cristo chon̈ hal-lax sucalan, yaja' walex caw helanex yin̈ Comam Cristo heyalni. Hayon̈ti'an haca' quewa' jean, walex caw can̈ heyeyi. Mach co pixan tet anmaan, walex caw ay he may heyalni. 11Yehn̈e jab'en wahil b'oj tajin̈ti'alan b'oj man̈ xilk'apeal, chon̈ smak' anmaan, mach pax jatut b'ay ayon̈an. 12Chon̈ siqui co munlaan, yin̈ co k'ab' ẍcawxi co c'ulan. Caw b'ahb'ilon̈ yu anmaan, yaja' sc'ulal sc'ul Comam Dios ẍjal spajoj tetan. Ay b'ay chon̈ scaj anmaan chon̈ syahnian, yaja' ch'ijcha juan. 13Tx'oj ẍhalot jetan yaja' yak'lob'al sc'ul anma tu' ẍja'an. Hasta tinan̈ yahb'ilon̈an b'oj stz'ilal satyib'an̈k'inal ti' je tet anmaan. 14Matoj yu hex wa'ni tx'ixwojan yuxin chin tz'ib'n̈e hune' ti'an, to yun̈e xtxumni sb'a he c'ul haxca haca' hex wuninal ocheb'il wuan. 15Waxan̈ca ay lahun̈eb'oj mil he cuywaom chex cuyni yin̈ Stzoti' Comam Cristo, yaja' hayinn̈e haca' mame we teyetan, haxca hayin b'ab'el xwa' tzoti' yet colb'anil teyetan, yuxin xeya' yuluj he c'ul yin̈ Comam Cristo Jesús. 16Yuxin chin k'an teyetan ta tzujan hex yin̈ tzet ẍwuan. 17Yuxin ẍwatoj ya' Timoteo te xolan, ya' ti' haca' hin c'ahol caw ocheb'il wu ye ya'an, b'oj yijyom ya' yin̈ Comam Jahaw. Ha' ya' ẍnanojtij teyet tzet chu wehc'oj haca' caw chal sc'ul Comam Cristoan. Ha' hune' ti' chin cuy tet hej iglesia yul hunun con̈ob'an. 18Ay mac caw nimej hitzanxa yab'en sb'a aycoj te xol, matxam chin apnoj hin cacha' heb'naj yalnian. 19Yaja' ta chal sc'ul Comam Jahaw, chin tojna hex wila'an. Hato tu' ẍwilnojan ta ay scan̈il ye hunk'aan heb'naj lolo' tu', mato ton̈e stzotel heb'naj. 20Haxca mataj han̈c'a tzetet ẍjala, ha' ẍyeniloj ta ayon̈coj yul sk'ab' Comam Dios. To ha' scan̈il ye Comam Dios aycoj jin̈, ha' ẍyeniloj ta ayon̈coj yul sk'ab' Comam. 21Yuxin, ¿tzet taxca hunuj cheyoche ẍwub' teyin̈an yet chin apnoj hex wilnojan? ¿Tox ẍwa'noj hunoj sya'tajil heyila'an, mato c'ulch'an ẍwute' hin c'ul teyin̈an?


Copyright
Learn More

will be added

X\