1 CORINTIOS 3

1Hex wuẍtaj hex wanab', yet xquin ec' te xolan, mach xquin tzotel teyet haca' tet mac yijyom tet Yespíritu Comam Diosan. To xquin tzotel teyet haca' tet anma aycoj yuni b'aytet chal sc'ulan, haca' tet niẍtej unin yin̈ hej tzetet yet Comam Cristo. 2Mat ayojcan̈ smalil xu hin tzotel teyetan yet xquex hin cuynian, haxca haca' to ye niẍtej unin ẍto txutxwi, ime to ch'a'lax tet, maẍto chu ya'lax ita tet, hactu' heyeyi. 3Ẍwal hune' ti'an haxca haca' to ye anma aycoj yuni b'aytet chal sc'ul, hactu' heyeyi. Haxca cheya' howal yin̈ heyoc swi'aloj, hat syeltoj sb'a to lahan cheyute b'oj sunil anma. 4Haxca yet che teyen he b'a cheyalni: Hayon̈ ti'an yin̈ ya' Pablo ayon̈cojan, quexchi. Hunmajanxa mac ẍhalni: Walon̈an yin̈ ya' Apolos ayon̈cojan, ẍipaxoj. Yet cheyalni hactu', lahan chex elcoj b'oj anma mach yohtajoj Comam Dios. 5Yaja' txumwejc'anab'i: ¿Tox k'a' ay yelapnoj ye ya' Apolos? ¿Mato k'a' ay yelapnoj wean? Hajxa, schejab'n̈e Comam Dios jean, yun̈e heya'ni yuluj he c'ul yin̈ Comam Jahaw, yuxin chon̈ tzotelan. Han̈c'a munil ẍa' Comam jub' hununon̈an ha' ẍjuan. 6Yet xquin ec' walnoj stzoti' Comam te xolan, haca' hunuj hin̈at xin tz'unan, ya' Apolos, haca' mac ẍhayeni. Yin̈ caw yeli Comam Dios x'a'ni ch'ib'oj stzoti' yin̈ heyanma. 7Yuxin matzet chaliloj naj stz'untz'uni ni naj xhayeni, to han̈c'a Comam Dios can̈ yeyi, haxca ha' Comam ch'a'ni ch'ib'oj stzoti'. 8Lahan naj stz'untz'uni b'oj naj ẍhayeni, yaja' hantajtic'a ẍmunla hunun heb'naj, hactu' stohol heb'naj cha'a' Comam. 9Hayon̈ ti'an jetb'i co b'a yin̈ smunil Comam Diosan, hexti haca' stz'unub' Comam b'ay lan̈an smunla heyeyi.B'oj haca' hune' n̈ah lan̈an yanican̈ Comam, hactu' heyeyi. 10Hayin ti'an haca' naj ijb'alom aomcan̈ n̈ah we yu sc'ulal sc'ul Comam Diosan yet xquin ec' te xolan, haca'tic'a xwayoj xe' hunuj n̈ahan. Haxa mac ẍmunla te xol tinan̈, haca' mac ẍlahni yanican̈ te' n̈ah xwayoj xe' tu'an, yaja' nann̈e yu naj tzet chu smunlayi. 11Ha' Comam Jesucristo han̈c'an̈e haca' hune' xe' n̈ah ayxaayoj tu', hactu' ye Comam. Matxa mac chu yaniayoj hunujxa. 12Ay mac c'ul smunlayi, chacoj haca' oro xihaloj, plata, ch'en ch'en c'ulch'an yib'an̈ hune' haca' xe' n̈ah ti'. Ay pax mac comonaln̈e smunlayi ch'a'nicoj haca' te' te', wahtan̈ mato te' ch'im yin̈ hune' munil tu'. 13Yaja' yet chuluj hune' tz'ayical b'ay chia'tij Comam Dios cuenta jin̈, catto yilwelaxoj co munil ẍco watx'e hununon̈, haca' yet stzujb'alax k'a'k'a' yin̈ hune' te n̈ah tu', hactu' chu yil-laxoj yin̈ hab'an ta c'ul mato mat c'uluj co munil xco watx'e. 14Mac c'ul munil swatx'e, lahan hune' smunil tu' b'oj hunuj te' n̈ah mach stz'atoj yu k'a'k'a', yuxin schab' stohol smunil tu'. 15Yaja' mac mat c'uluj smunil swatx'e tu', mach steye' yet ch'ilwelaxoj. Haca' stz'aayoj hunuj ch'im n̈ah, hactu' chu ẍc'ayojcantoj hune' smunil swatx'e tu'. Ẍtic'a colchaoj hune' mac tu', yaja' haca'xan̈e mac ẍcolpa xol k'a'k'a'. 16¿Tox mat heyohtajoj to yatut Comam Dios heyeyi b'oj aycoj Yespíritu Comam te xol? 17Ta ay mac ẍhuchanayoj yatut Comam Dios tu', sc'aya'paxiloj Comam hune' mac tu', haxca yatut Comam, han̈c'a Comam ay yet. Yatut Comam ẍwal ti'an, hex caw. 18Macheya' sub'u' he b'a. Ta ay mac te xol caw tz'ajan sc'ul yin̈ yet satyib'an̈k'inal ti' yalni, sta'weab'coj yib'an̈ to matzet yohtaj yun̈e caw yeli schab' stz'ajanil sc'ul. 19Haxca stz'ajanil sc'ul anma yet satyib'an̈k'inal ti', sucaln̈e ye yul sat Comam Dios. Hactu' yalni Yum Comam: Mac ẍhalni ta tz'ajan sc'ul, yin̈tic'a stz'ajanil sc'ul tu' stzab'looj yu Comam Dios. 20Chalni paxayoj: Yohtaj Comam Dios ta sucaln̈e ye tzet nab'il yu anma tz'ajan sc'ul yalni. 21Yuxin machu heyalni ta ay hunuj hon̈ k'a' ec'b'alon̈an, haxca co hunilan sc'ulaloj heyet jehan. 22Wal hayin Pablo hin ti'an, wal ya' Apolos, wal ya' Pedro, Comam Dios xcon̈ anicoj schejab'oj te xolan. Wal satyib'an̈k'inal ti', wal k'inale, wal camical, wal tzetet ay tinan̈ b'oj tzetet ẍto huluj, heyet sunil. 23Hexti', hex yet Comam Cristo, wal Comam Cristo, yet Comam Dios yeyi.


Copyright
Learn More

will be added

X\