1 CORINTIOS 3

1Hex wuẍtaj, hex wanab, hayet quinec'an texol, mach quintzotelan teyet haca' tet mac caw yijem tet Comam Espíritu Santo. Wal xin quintzotelan teyet haca' tet anma yet yul sat yiban̈k'inal ti', yeb haca' mac uninto yin̈ yet Comam Dios. 2Yuxin yet incuywahan texol caw comonn̈e yu intzotelan teyet, yuto haca'to ye niẍte unin chito txutxwi, maẍto chu yak'lax itah tet, hac tu' heyehi. Hac to tu' heyepaxo tinan̈, 3yuto haca' istxumni anma yet yul sat yiban̈k'inal ti', hac to tu' hetxumni, yuto chichiwaco hec'ul teyin̈ hununex, ay howal texol yeb pohlebahil. Chal yelapno tu' to ha' tzet chal heyanma ha' cheyije. Chebeybaln̈enpaxo haca' tzet chiswatx'e anma maẍto ayoco yul isk'ab Comam. 4Yuto texol hex ti' ayex cheyala: “Han̈on̈ti'an̈ yinta juẍta Pablo ayon̈icojan̈.” Ayex cheyalpaxoj: “Han̈on̈ti'an̈ yinta juẍta Apolos ayon̈icojan̈,” quexchi. Yet cheyalni haca' tu' to haca'to anma yet yul sat yiban̈k'inal ti', hac tu' hetxumni. 5¿Tzet yelapno wehan hanin Pablo inti'an? yeb ¿tzet yelapno ye juẍta Apolos tu'? Wal xin ischejabn̈e Comam Dios jehan̈, chejbilon̈icojan̈ texol yu Comam yun̈e heyanico heyanma yin̈ Comam Jesucristo. Ha' munil yacanico Comam yul cok'aban̈ hununon̈an̈ ha' chicowatx'ehan̈. 6Yet wec'an texol haca'tan̈e haninan intz'uncanayojan hunu te te' texol. Haxa yet yec' naj Apolos texol xin haca'tan̈e ha' naj ec' hayenoj. Yaja' yin̈ caw yeli, ha' Comam Dios chiak'ni ch'ibo hune' tz'unub tu'. 7Yuxin ha' naj chitz'unni yeb naj chihayeni machi yelapno ebnaj, cachann̈e Comam Dios caw aycano yelapno yehi yuto ha' Comam chiak'ni ch'ibo hune' tz'unub tu'. 8Yuxin naj chitz'unni hunu tzet ye tu' yeb naj chihayeni lahan ismunil ebnaj, chischah ebnaj ispaj selel ismunil tu' tet Comam Dios hatatic'a hanta munil chiswatx'e hunun ebnaj. 9Han̈on̈ti'an̈ jet munlawomal cobahan̈ yin̈ ismunil Comam Dios, wal hex ti' xin haca' istz'unub Comam Dios heyehi. Lahanexpaxo haca' hunu n̈a lan̈an iswatx'encan̈ Comam Dios. 10Haxa haninti'an xin, lahaninan haca' hunu naj ijbalom yin̈ watx'e n̈a yu isc'ulal Comam Dios. Hacojtam haninan wayojan isxe'al hune' n̈a tu', nanxa hune' naj xin chianican̈ isloc'al. Yaja' hunun mac chimunla yin̈ hune' n̈a tu' yilal cam chil yin̈ tzet chu ismunlahi. 11Wal xin machi hunuxa mac chu yanayo hunuxa isxe'al n̈a yiban̈ hune' ayxayo tu', yuto ha' hune' ayxayo tu' ha' ton Comam Jesucristo. 12Yiban̈ hune' xe'al n̈a tu' xin, ay mac chianico ch'en oro, maca ch'en plata, maca ch'en ch'en caw c'ulch'an jilni isxialoj. Aypaxo mac chianico te te', maca te' ch'im, maca xaj wale' yichoj. 13Yaja' yet islahobal tz'ayic yet chiilax tzet chielico anma, cat yilwelax comunil hununon̈ xol k'a k'a', yun̈e yillaxi ta c'ul maca mach c'ulo tzet chicowatx'e. 14Yuxin ha' mac caw c'ul ismunil iswatx'e, lahan yeb hunu n̈a machi tz'ato yu k'a k'a'. Ha' mac haca' tu' chischah ispaj selel ismunil. 15Yaja' wal mac mach c'ulo ismunil chiswatx'e, chitz'ato ismunil tu' xol k'a k'a', chic'aywa hune' mac tu' yin̈ ismunil. Waxan̈ca xin chicolchahi, yaja' haca'xan̈e iscollaxilti hunu anma xol k'a k'a', hac tu' chu iscolchahi. 16¿Tom mach heyohtajo xin tato yatut Comam Dios heyehi yeb ayco Comam Espíritu Santo teyin̈? 17Yuxin mac chitan̈tzenilo hune' yatut Comam tu', chistan̈tzelo Comam, yuto han̈c'an̈e Comam ay yet hune' n̈a tu'. Hune' yatut Comam Dios chiwalti'an, ha' ton ex hex ti'. 18Mach cheyute heba sucal, tato ay hunu mac texol caw helan yin̈ tzet ay yul sat yiban̈k'inal ti' chabe, yuteojab isba haca' hunu mac matzet yohtaj haxinwal caw helan chielcanicoj. 19Yuto ha' ishelanil anma yul sat yiban̈k'inal ti', caw matzet chalilo yul sat Comam Dios. Hac tu' yalni Istzoti' Comam bay chal haca' ti': “Ha' mac caw ay ishelanil yalni, yin̈tic'a ishelanil tu' chitzabchati yu Comam,” ẍiayoj. 20Chalnipaxoj: “Yohta Comam Dios tato matzet chal yelapno yitz'atil iswi' anma caw helan yalni,” ẍiayoj. 21Yuxin mach chub helolo'n̈en heba yu tzujanex yinta hunu maca, yuto sunil ak'bilxa teyet yu Comam Dios. 22Haca' hanin Pablo inti'an yeb juẍta Apolos, yeb juẍta Pedro, ha' Comam Dios con̈anicojan̈ chejabo texol, haca'ojtam heyet jehan̈. Haca'paxo yul sat yiban̈k'inal ti', yeb k'inale, yeb camical, yeb tzet ay tinan̈, yeb tzettaj chitohuli, heyet ye sunil tu'. 23Haxa hex ti' xin, yet Comam Cristo heyehi, Comam Cristo tu' xin yet Comam Dios yehi.

will be added

X\