1 CORINTIOS 2

1Hex wuẍtaj hex wanab', yet xquin b'ey walnoj stzoti' Comam Dios te xolan, hune' lan̈an yal-laxc'oj xol anma ti', mat tzoti'oj caw aycan̈ stzoteb'anil xwal teyetan, to caw hab'an xu hin tzotelan. 2Yet ayin te xolan, mach hunujxa tzet xwoche wala'an to han̈c'a tzet yelapnoj ye Comam Jesucristo, tzet xu scam yin̈ te culus, ha' xwal teyetan. 3Yet xquin tzotel teyetan, chin nanonan hasta chin c'uyc'un xiwquilalan. 4Yet xwalniltij stzoti' Comam te xolan, mach quex hin monte yu nimejtaj tzoti' ẍyeni stz'ajanil sc'ul anmaan. Machoj, to scan̈il ye Comam Espíritu xin ye te xolan, 5yun̈e heya'ni yuluj he c'ul yin̈ scan̈il ye Comam Dios, mataj yin̈ stz'ajanil sc'ul anma ẍcawxi he c'ul. 6Yaja' tet heb'ya' ayxa snab'al yin̈ yet Comam Jahaw, waltu' tzoti' ib'il tz'ajanc'uleal ẍjal tet heb'ya'an, yaja' mataj tz'ajanc'uleal yohtaj anma yet satyib'an̈k'inal ti'. Matcataj tz'ajanc'uleal yet heb'naj ch'oc yahawoj, haxca heb'naj tu' toxa sc'ayojiloj heb'naj. 7Hune' ẍwal ti'an, ha' hune' stz'ajanil sc'ul Comam Dios ewantic'a yeyi, hune' nab'il yu Comam yu sc'ulaloj jet yet maẍto swatx'e satyib'an̈k'inal ti'. 8Hune' ti' maẍtic'a xtxum heb'naj swi' con̈ob'. K'inaloj ta xtxum heb'naj, mach mi xacan̈ heb'naj Comam Jahaw yin̈ culus, han̈c'an̈e Comam caw ay smay. 9Yaja' chal Yum Comam: Ay tzetet yan̈eb'il yu Comam Dios tet hantaj anma ch'ochen Comam. Hunk'aan tu' maẍto mac ch'ilni, ni maẍto mac ch'ab'eni, ni maẍto hunuj mac ch'ec' yin̈ sc'ul. 10Hunk'aan ti' jetn̈e sye Comam yu Yespíritu, ha' Yespíritu Comam ohtajn̈e sunil, hasta hej tzetet ewan ye yin̈ yanma Comam. 11Hayon̈ ti' hayon̈n̈e johtaj tzet ib'il yu co c'ul, mach hunujxa mac ohtajn̈e. Hactu' ye Comam Dios, han̈c'a Yespíritu Comam ohtajn̈e tzet ib'il yu sc'ul Comam. 12Hayon̈ ti' mataj espíritu yet satyib'an̈k'inal ti' chab'il ju, to ha' Espíritu ẍtit yin̈ Comam Dios ha' ib'il ju, yun̈e co txumni sc'ulal cha' Comam jet. 13Matoj tzoti' ẍjohtajn̈eloj yu stz'ajanil co c'ul ẍjalan, to ha' tzet cha' Espíritu johtajn̈e'an, ha' ẍco tihiloj tet mac aycoj Yespíritu Comam yin̈an. 14Anma mach Yespíritu Comam Dios yin̈, mach scha yab'e' hej tzetet yet Yespíritu Comam, haxca sucal ye yalni. Machca ẍc'oji xtxumni, haxca han̈c'a Yespíritu Comam ch'a'ni co txumu. 15Wal mac aycoj Yespíritu Comam Dios yin̈, hab'an xtxumni tzet ye sunil hej tzetet, ta c'ul mato machoj, yaja' anma mat ohtajn̈eoj Comam Dios mach ẍc'oji xtxumni hej tzetet chu mac aycoj Comam Espíritu yin̈. 16Haca' yalni Yum Comam: Mach mac chu xtxumni tzet nab'il yu Comam Jahaw. Mach hunuj mac chu scuynitoj Comam. Walon̈, ha' tzet nab'il yu Comam Cristo, ha' ch'a'ni co nab'al.


Copyright
Learn More

will be added

X\