1 CORINTIOS 16

1Wal ch'en heyofrenda chicutxi texol, ch'en chialaxto tet mac ayxaco yul isk'ab Comam Dios, checutxbawe ch'en haca' yu walnihan tet ebnaj juẍta ay yul ismajul Galacia. 2Hunun domingo yin̈ semana, yilal hepohnilo hanic'o ch'en melyu cheyik' yin̈ hemunil hununex, hatatic'a hanta chicolwa Comam teyin̈, cat hec'ubantoj, haxinwal yet chinapnihan matxa yilalo ch'ah ch'en texol. 3Hato yet chinapnihan texol cat wanitojan mac saybilxa heyu, cat yinito ebnaj hunu carta yeb ch'en hecolwal tu' tet ebnaj juẍtaj ay bey Jerusalén. 4Yaja' ta han-caw-inan chintohan xin, yilaltic'a chitopaxo ebnaj wintajan. 5Hayet chintohan yin̈ inbeltu'an yilal wec'an bey Macedonia, lahwi tu' xin cat wapnihan quexwilnojan bey Corinto tu'. 6Etzan̈em chincanan hanic'o tiempohal tec'atan̈, maca xin ha' bey tu' ayinic'ojan chiec' n̈abil; ta hac tu' hexxa chexcolwa win̈an yin̈ inbelan yet chinelan texol. 7Mach chiwochehan tato yin̈ an̈e chinec'an quexwila'an, wal xin chiwochehan chincanan hanic'o tiempohal texol, ta hac tu' chiel yin̈ isc'ul Comam Dios. 8Yaja' xin yilalto incanan bey Efeso ti' masanto yet chiec' k'in̈ pentecostés. 9Yuto caw chalte isba munil yin̈ ismunil Comam Dios chiwilan, yuxin chincanan waxan̈ca xin caw ay mac ayco ishowal win̈an. 10Ta chiapni naj Timoteo tec'atan̈ xahan cheyil naj, haxinwal chitzala isc'ul naj texol, yuto chimunlapaxo naj yin̈ ismunil Comam Dios haca' inti'an. 11Tajca mach chicam hec'ul yin̈ naj, wal xin colwahan̈we yin̈ naj haxinwal chislah naj isbel yin̈ tzalahilal cat yul naj coc'atan̈an̈, yuto chijechmahan̈ naj yeb ebnaj juẍtaj. 12Wal naj juẍta Apolos, walan tet naj tato chito naj yinta ebnaj to quexilnoj, yaja' machisjeto naj. Yettojab hunelxa chito naj yet ay ishamanil naj. 13Hex wuẍtaj, hex wanab, caw majwahan̈wej, lin̈bawe heba yin̈ hune' bay ayxaco heyanma, caw mach chexxiwi, ak'we yip heyanma. 14Sunilojab tzet chewatx'e, ayojab isc'ulch'anil hec'ul yin̈. 15Hex wuẍtaj hex wanab, caw heyohtaj tato naj juẍta Estéfanas yeb yuninal ha' babel yaco isba yul isk'ab Comam Dios bey yul ismajul Acaya tu'. Caw xin huneln̈e yeco yanma naj iscolwa yin̈ mac ayxaco yul isk'ab Comam. 16Chiwochehan ta cheyije tet naj Estéfanas yeb yuninal tu', yeb tet sunil macta chicolwahi yeb chimunla yin̈ ismunil Comam. 17Caw chintzalahan yuto hul naj Estéfanas yeb naj Fortunato yebpaxo naj Acaico bey ti', yuto yet chiwilnihan yin̈ ebnaj haca'ojtam hex chiwilicojan teyin̈. 18Yin̈ caw yeli ebnaj ti' yak' tzalaho ebnaj inc'ulan, haca' yu yak'ni tzalaho ebnaj hec'ul. Ebnaj juẍta haca' ebnaj ti', ayojab yelapno ebnaj yul hesat. 19Ebnaj juẍta ayxaco yul isk'ab Comam Dios yul hunu con̈ob yul ismajul Asia ti', chalto ebnaj ta cheyil heba. Hacpax tu' naj juẍta Aquila yeb ix janab Priscila yeb ebnaj juẍta chiscutxba isba yul yatut naj, chalpaxtoj ta cheyil heba. 20Hacpax tu' ebnaj juẍta ay bey ti' chalpaxto ebnaj ta cheyil heba. Yeb xin k'ambewepaxo teyet yin̈ tzalahilal hanic' heye hununex. 21Hanin Pablo inti'an han-caw-inan chintz'ibn̈ehan yul carta ti' ta cheyil heba. 22Ta ay hunu mac mach chiochen Comam Jesucristo, tijab isya'tajil yiban̈. Yin̈ sunil wanmahan chiwalnihan tet Comam: ¡Mam Jesucristo Jahawilan̈, hulan̈! quinchiyan. 23Yak'abayo Comam Jesucristo isc'ulch'anil isc'ul teyiban̈. 24Caw chitzala wanmahan teyin̈ hesunil, hex ayexxaco yul isk'ab Comam Jesucristo. ¡Hacojab tu'!

will be added

X\