1 CORINTIOS 16

1Wal yin̈ ch'en yam melyu cheya'a' tet heb'ya' jetb'i ayxacoj yin̈ Comam, cutxb'awej ch'en haca' xu walni tet heb'ya' ay b'et Galasiaan. 2Hunun domingo he pohniloj hanic'oj ch'en melyu yin̈ hantaj sc'ulch'anil sc'ul Comam cha' teyet hununex. Che c'ub'antoj ch'en haxin̈wal yet chin apnojan, matxa yeẍto ch'ec' ahoj ch'en. 3Yet chin apnojan che saya' haywan̈oj heb'ya' ch'inojtoj ch'en yam melyu che cutxb'a' tu' b'oj te' hum chin tz'ib'n̈e'toj ẍto tet heb'ya' ay Jerusalén. 4Ta yet aya hayin caw chin toan, ẍto heb'ya' win̈an. 5Yet chin toj hex wilnojpaxan, yilal wec'oj b'et Macedoniaan. Lawitu', cat wapnoj te xolan. 6Titaca chin canoj te c'atan̈ hayeb'oj tz'ayican, maca hat ch'ec'oj n̈ab'il wu te c'atan̈an. Taca hactu' chute' sb'a chex colwaoj win̈ yin̈ b'ay ẍca hin toj paxan. 7Mach sje hin c'ulan ta ton̈e chin ec' tzelna te c'atan̈an, to ay wala'an chin can hayeb'oj tz'ayic te c'atan̈an ta hactu' ch'el yin̈ sc'ul Comam Jahaw. 8Yaja' chin canoj b'et Éfeso ti'an masanto ch'ec'ojcan k'in̈ Pentecostés. 9Haxca caw cha' sb'a munil co munla yin̈ yet Comam Jahaw xwilan, yuxin chin canan, waxan̈ca tx'ihal mac ẍchiwa sc'ul spahni hin munla yalnian. 10Ta ch'apni ya' Timoteo b'etu', xahan cheyil ya' haxca ẍmunla pax ya' yin̈ smunil Comam Jahaw haca' hin munla ti'an. 11Yuxin mach sje hin c'ulan ta comonaln̈e chu yapni ya' yul he sat. Tak'lanwej yin̈ tzalalal tet ya' haxin̈wal stzala sc'ul ya' chul ya' tin c'atan̈an, haxca ẍwechma ya' b'oj hunk'aanxa heb'ya' jetb'ian. 12Xwal tet ya' juẍtaj Apolosan ta ẍto ya' yin̈ heb'ya' xto b'ay ayex tu', yaja' maxto chal sc'ul ya' sto tinan̈, hatom hunecxa ẍtoj ya' yet ay shamanil ya'. 13Nann̈e heyu, lin̈anex yin̈ heya'ni yuluj he c'ul yin̈ Comam Jahaw. Caw machex xiwi, iwejtij heyanma teyin̈. 14Yewej heyochen he b'a yin̈ hej tzetet cheyu. 15Hex wuẍtaj hex wanab', heyohtaj ta ya' Estéfanas b'oj mac ay sc'atan̈ ya' b'ab'el x'oc tzujnuj yin̈ Comam b'et Acaya tu'. Heb'ya' ti' x'el yin̈ sc'ul heb'ya' yoccan colwaoj yin̈ heb'ya' jetb'i. 16Ẍwochean ta yijyom cheyute he b'a tet mactaj hactu' smunla haca' smunla heb'ya' tu', b'oj tet sunil mac ẍcolwayi b'oj ẍmunla yin̈ hune' munil ti'. 17Caw chin tzalaan haxca xhul ya' Estéfanas, ya' Fortunato b'oj ya' Acaico, haxca heb'ya' ti' wuc'lewan yulb'al machexc'oj. 18Yin̈ caw st'in̈anil, ha' heb'ya' ti' x'a'ni yak'lob'al hin c'ulan, haca' xu ya'ni heb'ya' yak'lob'al he c'ul. Yuxin heb'ya' ti', yet aya xahan ch'il-lax heb'ya'. 19Hej iglesia ay b'et Asia ti' ch'anitoj he cawil. Pax ya' Aquila b'oj ya' Prisca b'oj mactaj syamb'a sb'a yatut heb'ya' tu', chapaxtoj heb'ya' he cawil yin̈ sb'ih Comam Jahaw. 20Chawej scawil he c'ul chatoj sunil heb'ya' jetb'i, cat heya'ni pax scawil he c'ul hununex yin̈ tzalalal. 21Hayin Pablo hin ti'an, hayin caw chin tz'ib'n̈etoj he cawil ti'an. 22Ta ay hunuj mac mach'ochen Comam Jahaw, canojab' yalan̈ tz'acti'. ¡Mam Jahaw, hulan̈ yin̈ lemb'iln̈e! 23Ya'ab' Jahaw Jesús caw tx'ihal sc'ulch'anil teyet. 24Chex woche te hunilan haxca ayon̈xacoj yin̈ Comam Cristo Jesús.


Copyright
Learn More

will be added

X\