1 CORINTIOS 15

1Tinan̈ hex wuẍtaj hex wanab', wocheb'alan che natij tzoti' yet colb'anil xax wal teyetan, tzoti' xe cha, b'oj lin̈anex yin̈ tinan̈. 2Yu hune' tzoti' ti' quex colchayi ta lin̈anex yin̈, ta mat he ti'ojn̈e xalni ta xeya' yuluj he c'ul yin̈. 3Ha' cuyb'anil xin chaan xwa'ni pax teyetan, ha' k'a' yilal yeyi. Xwalan ta xcam Comam Cristo yu hej co mul, haca' yalni Yum Comam Dios. 4Xmujlaxi, sca'fi scami, xpitzc'acan̈ haca' yalni Yum Comam. 5Lawitu' syeni sb'a tet ya' Pedro, haxa hunecxa syeni pax sb'a tet heb'ya' apóstol sunil. 6Lawitu' syeni pax sb'a tet ec'b'al howeb' ciento heb'ya' jetb'i ayxacoj yin̈ Comam. Tx'ihal heb'ya' aytoc'oj tinan̈, ay heb'ya' xax cami. 7Syenipax sb'a tet ya' Jacobo, lawitu' syenipax sb'a tet sunil heb'ya' apóstol. 8Stzujanilxa, syeni sb'a Comam wetan, yaja' walinan haca' hune' ni'an unin matto stz'ayicaloj spitzc'ayi, hactu' xwa'lean. 9Yuxin caw mach tzet ẍwaliloj xol heb'ya' apóstol ẍwab'ean, hasta mat yetoj ay wal-lax apóstolalan, haxca xwa' ec'oj ya' yanma mactaj ayxacoj yin̈ Comaman. 10Yaja' yu sc'ulch'anil sc'ul Comam Dios ayincoj yin̈ hune' munil ti'an. Yaja' mat nab'a'oj xa' Comam hune' sc'ulch'anil ti' wetan, haxca k'a' chin to munla sataj hunk'aanxa heb'ya' apóstolan, mat hayinoj cawan, to ha' Comam ẍmunla win̈ yu sc'ulch'anil sc'ulan. 11Yaja' mach yoc yin̈ ta hayin xwalan, mato ha' heb'ya', ha' ti' tzoti' yet colb'anil lan̈an jalnian, ha' hune' ti' b'ay xeya' yuluj he c'ul. 12Ta tzoti' xja' he cuyb'anilojan chala ta xpitzc'acan̈ Comam Cristo, ¿tzet yuxin ayex cheyala ta mach ẍpitzc'acan̈ hej camom? 13Ta mach ẍpitzc'acan̈ hej camom, machmi xpitzc'acan̈ Comam Cristo chaltu'. 14Ta mach xpitzc'acan̈ Comam, matzet chaliloj tzoti' ẍjal teyetan, ni mach tzet chaliloj heya'ni yuluj he c'ul yin̈ Comam. 15Ta hactu', lek'tion̈ mi yin̈ Comam Diosan, haxca lan̈an jalnian ta ha' Comam xpitzc'ancan̈ Comam Cristo, yaja' mach mi xpitzc'aotcan̈ Comam chaltu' ta mach ẍpitzc'acan̈ hej camom. 16Ta mach ẍpitzc'acan̈ hej camom, mach mi xpitzc'aotcan̈ Comam Cristo chaltu'. 17Ta mach xpitzc'aotcan̈ Comam Cristo, nab'a'n̈em cheya' yuluj he c'ul yin̈, yehn̈em yecoj he mul teyib'an̈. 18Ta hactu', mactaj ayxacoj yin̈ Comam Cristo yet xcami, b'ehmi xu scami. 19Ta ẍcawxi co c'ul yin̈ Comam Cristo yulb'al ayon̈c'oj, yaja' ta mach tzet ẍji'a' lawi co cami, nab'an̈em ẍcawxi co c'ul yin̈ Comam chaltu', k'a' c'antajon̈ mi sataj hunujxa anma. 20Yaja' yeli xpitzc'acan̈ Comam b'ab'el co sataj, haca' yeliloj b'ab'el sat tz'unub', hactu' ye Comam, haxca ha' b'ab'el xpitzc'acan̈. 21Yu hune' anma, yuxin xhul camical yib'an̈ sunil anma, yaja' yu hune'xa anma, ẍpitzc'acan̈ anma yin̈ camical. 22Haxca yic'al ya Adán jeyi, yuxin co hunil on̈ chon̈ cami, hactu' chu co pitzc'aojpaxcan̈ co hunil, haxca on̈ yet-xa Comam Cristo. 23Yaja' yin̈ xtxolil tzujan, ha' Comam Cristo b'ab'el xpitzc'acan̈, ha' yet chuluj Comam hunecxa catto co pitzc'aojcan̈ mactajon̈ hon̈ yet-xa. 24Lawi stan̈tzenojcaniloj Comam Cristo sunil scan̈il ye mactaj aycoj yahawoj, lawitu' cat yuluj slahob'al tz'ayic, hato tu' chanojcoj Comam hune' chejb'anile b'ay aycoj yahawoj tu' yul sk'ab' Comam Dios Mame. 25Haxca yilal yocoj Comam Cristo yahawoj masanto ch'alaxojcoj sunil mactaj ẍpaq'uicoj yin̈ Comam yalan̈ yoj. 26Ha' camical, ha' slahub'al ch'ayojcanoj. 27Tz'ib'n̈eb'ilcanoj to sunil tzetet cha'acoj Comam Dios yalan̈ yoj Comam Cristo, yaja' ixtan̈ yeyi to mataj hahun Comam Dios tu', haxca ha' Comam ch'anojcoj hunk'aan tu' yalan̈ yoj Comam Cristo. 28Yet sunilxa aycoj yalan̈ schejb'anil Sc'ahol Comam Dios tu', ha'xa caw Comam ch'anojcoj sb'a yalan̈ schejb'anil Comam Dios Mame tu', Comam an̈ecoj sunil tzetet yul sk'ab', yun̈e haxa Comam Dios, Yahaw chub'cancoj yin̈ sunil hej tzetet. 29Tinan̈ ay mac te xol ch'i'ni ha' selb'aloj scamom. Yaja' ta mach ẍpitzc'aojcan̈ hej camom tu', ¿tzet yuxin chi' ha' yu sc'ulaloj yet scamom tu'? 30Haca'na hayon̈ ti'an, ¿tzet yuxin ẍco hin co b'a tet sya'tajil hunun tz'ayican ta mach ẍpitzc'aojcan̈ hej camom? 31Hex wuẍtaj hex wanab', hex hin may hin pixan yin̈ sat Jahaw Cristo Jesús heyeyi, yin̈ caw yeli, hunun tz'ayic hinan hin caman. 32Ta yun̈e hej tzetet yet satyib'an̈k'inal xwa' howal b'et Éfeso ti' b'oj no' howla nok'an, ¿tzet chaliloj ta mach ẍpitzc'aojcan̈ hej camom? Ta hactu', t'in̈an mi yecoj anma chalni: Wa'ojon̈ yin̈ caw c'ul, ja'a' tet janma, haxca sutanxacoj camical jin̈, ẍi. 33Hex wuẍtaj hex wanab', macheya' sub'u' he b'a. Cajxam yalni anma: Anma tx'oj ẍjet eq'ui chon̈ spohiloj yin̈ hej tzetet c'ul, ẍi. 34Nanb'ojab' heyu yin̈ xtx'ojal b'ay ayexcoj, b'oj matxa cheyacoj he mul, haxca ayex matto heyohtajoj Comam Dios. Ẍwal hune' ti'an yun̈e he tx'ixwican̈ ninoj. 35Ay mi mac ẍhalni: ¿Tzet taxca chu spitzc'aojcan̈ hej camom? ¿Tzet taxca ye snimanil yet ẍpitzc'aojcan̈? ẍi mi. 36Caw sucmi mac hactu' yalni. Yet ẍco tz'unni hunuj hin̈at, yilal yetaxtoj yun̈e spitzc'a yawalil. 37Haxca mataj yawalil hunuj hin̈at ẍco tz'unu, to ha' sat, wal sat ixim trigo mato hunujxa hin̈at. 38Haxa Comam Dios ch'a'ni swatx'e sb'a yoj hune' hin̈at tu' haca' ch'el yin̈ sc'ul Comam, hunun hin̈at swatx'e sb'a tzettic'a hin̈atil. 39Yuxin mat suniloj nimanile lahan, nan slow snimanil anma, nan slow snimanil no' nok' can̈eb' yoj, nan slow snimanil no' ch'ic, nan slow snimanil no' cay. 40Ay hej tzetet yet' satcan̈, ay pax hej tzetet yet' sat tx'otx', yaja' nanan slow yelwan hej tzetet yet satcan̈il tu', nanan yelwan pax hej tzetet yet sat tx'otx'al ti'. 41Mat lahanoj schaw tz'ayic b'oj x'ahaw b'oj hej tx'umel, hasta hej tx'umel tu' mat lahanoj schaw hunun. 42Hactu' ye camom ẍpitzc'aojcan̈. Ẍmujlax hune' nimanile ch'etaxtoj, yaja' nanxa slow chu spitzc'aojcan̈ haxca matxa ch'etaxtoj. 43Ẍmujlax hune' nimanile quistal yeyi, yaja' yet ẍpitzc'aojcan̈ eltich'anxa chub'canoj. Yet ẍmujlax hune' nimanile, ay squewa'il, yaja' yet ẍpitzc'aojcan̈ ayxa scan̈il yeyi. 44Yet ẍmujlax hune' nimanile, yet satyib'an̈k'inal ti' yeyi, wal yet ẍpitzc'aojcan̈, yet-xa espíritu yeyi. Ta ay nimanile yet satyib'an̈k'inal ti', ay pax nimanile yet espíritu. 45Haca' yalni Yum Comam Dios: Hune' b'ab'el anma xuli, Adán sb'ih, ab'il sk'inal naj. Yaja' ay hune'xa anma tzujanilxa xuli, ha' Comam Cristo, espíritu ch'a'ni k'inale yeyi. 46Han̈c'a ti', to b'ab'el xhul mac yet satyib'an̈k'inal ti', lawitu' xto hul mac yet espíritu. 47Naj b'ab'el winaj, yin̈ tx'otx'otx' watx'inaj naj, yuxin yet tx'otx' ye naj. Wal mac tzujanxa xhuli, sc'atan̈ Comam Dios xtita. 48Haca' naj Adán, sat tx'otx'al anma naj, hactu' je hayon̈ ti', sat tx'otx'al anmaon̈. Yaja' yet' hayon̈xa sc'atan̈ Comam Dios, lahan ẍjub' b'oj mac xtit sc'atan̈ Comam tu'. 49Yulb'al ayon̈ satyib'an̈k'inal ti' lahan co nimanil b'oj hune' anma sat tx'otx'al yeyi, wal yet b'ak'in̈aloj lahanxa ẍjub'can b'oj mac xtit sc'atan̈ Comam. 50Hex wuẍtaj hex wanab', yilal walni teyetan ta machu yoctoj co nimanil sat tx'otx'al ye ti' b'ay ay Comam Dios. Ha' ch'elicoj hune' ti' ta co chib'eal b'oj co chiq'uil ch'etaxojtoj ti', machu yocojtoj b'ay machu yetaxtoj tzetet. 51Yaja' ay hune' tzet matto ohtajb'iloj ẍwal teyetan: To mat co hunilojon̈ chon̈ camoj, yaja' co nimanil co hunilon̈ ẍhelmojtoj 52yin̈n̈e hunip k'inanil, yin̈n̈e ha mataj, yet ch'ok'oj ch'en slahub'al trompeta. Yin̈ caw yeli yet ch'ok'oj ch'en tu', ẍpitzc'aojcan̈ mactaj tzujanxa yin̈ Comam yet xcami, matxa b'ak'in̈ chetaxojtoj. Walon̈ itzitzon̈to yet chuuj hune' tu', ton̈e ẍheloj co nimanil ti'. 53Haxca hune' co nimanil ch'etaxtoj ti' ẍheloj yin̈ hune' nimanil machu yetaxtoj. Hune' co nimanil yet camical ye ti' ẍheloj yin̈ hune' nimanil matxa chu scami. 54Hune' co nimanil ti' ch'etaxojtoj haxca yet camical yeyi, yaja' ẍheloj yin̈ hune' nimanil mach'etaxojtoj, matxaca ẍcamoj. Hactu' chu yijnoj sb'a tzet tz'ib'n̈eb'ilcan yul Yum Comam Dios, chalni: Xc'ayotiloj camical yin̈ huneln̈e. 55Syeb'ab' camical scan̈il ye spotx'wayi. Syeb'ab' pax camical tu' scan̈il ye sc'ayniloj anma. 56Yu co mul chu hon̈ spotx'ni camical, yu sley Comam Dios xi' yip mule hon̈ sc'ayniloj. 57Yaja' yuch'antioẍ tet Comam Dios haxca ha' Comam ch'a'ni ayoj camical ju yu Comam Jesucristo Jahaw. 58Yuxin hex wuẍtaj hex wanab' xahan ay wuan, lin̈anex, machex pax teyin̈taj, cam munlaan̈wej yin̈ smunil Comam Jahaw stohb'alk'inal, haxca johtaj to mat nab'a'oj chon̈ munla yin̈ smunil Comam.


Copyright
Learn More

will be added

X\