1 Tinan̈ xin, hex wuẍtaj hex wanab, chiwochehan chenati Tzoti' yet colbanile halbilcano teyet wuhan, hune' chabilxa heyu bay lin̈anex tinan̈. 2 Yuto yu hune' Tzoti' yet colbanile tu', yuxin colbilexxa, yaj tato mach lin̈anojex yin̈, chal yelapnoj tato mach heyayto yul heyanma yin̈ caw isyelal. 3 Ha' huntek'an cuybanile caw yilal yehi, ha' wak'an teyet, huntek'an chabilcano wuhan. Quexincuynihan tato cam Comam Jesús yu comul, haca' yalni yul Yum Comam Dios. 4 Lahwi tu' ismujlax Comam, yaja' yin̈ yox tz'ayic yitzitzbican̈ xol camom, haca'tic'a yalni yul Yum Comam Dios. 5 Isyeni isba Comam tet naj Pedro, isyenipaxo isba tet ebnaj ischejab. 6 Lahwi tu' xin, isyenipaxo isba Comam tet ec'bal howeb ciento ebnaj juẍtaj. Tx'i'al xin ebnaj aytoc'o tinan̈, ay xin ebnaj xacami. 7 Isyenipaxo isba Comam tet naj Jacobo, lahwi tu' xin isyenipaxo isba Comam tet ebnaj ischejab. 8 Haxa yin̈ istzujanilxa xin isyeni isba Comam wetan, yaja' haca' hunu nich'an unin pitzc'ana yalan̈to maẍto istiempohalo ispitzc'ahi, hac tu' wehan. 9 Yuxin caw matzet welapnojan xol ebnaj ischejab Comam chiwabehan, yuxin mach intzanojan yallax ischejab Comam Jesucristo win̈an, yuto wak' ec'ojan ya' yanma macta ayxaco yul isk'ab Comam Dios yet yalan̈tocanoj. 10 Yu isc'ulch'anil isc'ul Comam Dios, yuxin ayinicojan yin̈ hune' munil ti', yaja' mach nabn̈eho hune' isc'ulch'anil isc'ul Comam yak' wettu'an yuto ec'balto chinmunlahan sata ebnaj ischejab Comam. Yaja' maẍtaj yu wipan, walxinto ha' isc'ulch'anil Comam chicolwa win̈an. 11 Yaja' mach chiyoc yin̈ mac chihalnic'o cuybanile ti', ta haninan maca ebnaj ischejab Comam, ha' hune' caw yilal to ha' jalnic'ojan̈ cuybanile tu', hune' chabilxa yul heyanma. 12 Han̈on̈ti'an̈ quexcocuyan̈ yin̈ yet yitzitzbican̈ Comam Jesucristo, yaja' ¿tzet yin̈ xin ayex cheyala tato mach chiitzitzbican̈ camom? 13 Ta mach chiitzitzbican̈ anma camnaxa, machim itzitzbican̈ Comam Jesucristo. 14 Ta mach itzitzbican̈ Comam Jesucristo machim tzet chal yelapno cuybanile jak'an̈ teyet, naban̈em chijaco janma yin̈ Comam. 15 Ta hac tu' lek'ti'on̈mi yin̈ Comam Dios, yuto chijala tato ha' Comam Dios ak'ni itzitzbocan̈ Comam Jesucristo. Machim yak' itzitzbocan̈ Comam Dios Comam Jesucristo tato yeli mach chiitzitzbican̈ camom. 16 Tato yeli mach chiitzitzbican̈ anma camnaxa, machmi itzitzbican̈ Comam Jesucristo. 17 Ta mach itzitzbican̈ Comam tu' xol camom, nabn̈em chijaco janma yin̈ Comam Dios, ayon̈tomico yin̈ comul. 18 Hacmipax tu' ebnaj chabilxa Comam Jesucristo yu yet iscami, c'aynamicanto ebnaj yin̈ huneln̈e. 19 Ta iscawxobal coc'ul yin̈ Comam Jesucristo yuln̈e sat yiban̈k'inal ti' yehi, maẍtic'am nich'ano isc'ulal jet yin̈ haca' tu'. 20 Wal xin, yin̈ caw yeli itzitzbican̈ Comam Jesucristo xol camom, haca' babel sat tz'unub chak'a, hac tu' yu isbabi yitzitzbican̈ cosataj. 21 Yu hune' naj, yuxin hul camical yiban̈ anma yul sat yiban̈k'inal ti', yaja' yu hune'xa naj xin, yuxin chiitzitzbican̈ anma yin̈ camical. 22 Haca'tic'a chu iscamto anma yu ismul naj Adán, hactic'apax tu' chu yulcan̈ isc'ul anma yu Comam Jesucristo. 23 Yuxin yin̈ istxolal aycoj, ha' Comam Jesucristo ha' babel itzitzbican̈, haxa yet chul Comam yet iscayel cat yitzitzbican̈ macta yetxa Comam. 24 Lahwi tu' xin, cat yul islahobal tz'ayic bay chik'oji Comam yin̈ ebnaj can̈yehi yeb ebnaj ayco yahawilo con̈ob, yeb ischejab naj matzwalil chiec' xol jak'ek' yeb yul yiban̈k'inal ti', catto yanico Comam sunil tzet ay yul isk'ab tet Comam Dios Mame. 25 Yaja' yet maẍto chaco Comam Jesucristo sunil ti' yul isk'ab Comam Dios ch'oc Comam Yahawiloj masanto yet chioc sunil mac ayco ishowal yin̈ Comam yalan̈ yoj. 26 Haxa hune' islahobal bay chik'oji Comam xin, ha' ton yin̈ naj camical ayco ishowal yin̈ Comam. 27 Tz'ibn̈ebilcanoj tato sunil tzet ye tu' chacto Comam Dios yalan̈ yoj Comam Jesucristo, yaja' wal Comam Dios mach chiocto yalan̈ yoj Comam Jesucristo, yuto ha' Comam Dios chianico sunil yalan̈ yoj Comam Cristo. 28 Yet chioccanto sunil yalan̈ yip Comam Jesucristo tu' xin, ha' caw Comam tu' chacto isba yalan̈ ischejbanil Ismam an̈eco sunil tzet ye tu' yul isk'ab, hac tu' xin haxan̈e Comam Dios Yahaw chucanico yin̈ sunil tzet ye tu'. 29 Yebpaxo hunxa, haca' anma chiah ha' iswi' selelo anma camnaxa, yaja' ta mach chulcan̈ isc'ul camom, ¿tzet yin̈ xin chiah ha' iswi' anma selelo anma camnaxa tu'? 30 Ta machi itzitzbican̈ camom, ¿tzet yin̈ xin chijak' janmahan̈ han̈on̈ ischejab Comam Dios on̈ti'an̈ jijlenan̈ isya'tajil chul jiban̈an̈ hunun tz'ayic? 31 Hex wuẍtaj hex wanab, haninti'an caw hunun tz'ayic inhinni inbahan incaman. Hune' ti' caw yeli haca' hune' tzalahilal chiwabehan teyin̈, yuto ayexxaco yul isk'ab Comam Jesucristo. 32 Haninti'an caw ec'ya' wanmahan bey Efeso haca'tan̈e wak'lenan howal yeb ej no' howla nok'. ¿Tzet xin chiwik'an yin̈ hune' tu' tato mach chiitzitzbican̈ camom? Ta hac tu', ha'mi ye yu anma chihalni haca' ti': “¡Wa'ojon̈we yin̈ caw c'ul, jak'awe tzet choche janma, yuto camomon̈xataxca yet hecal!” ẍi. 33 Hex wuẍtaj hex wanab, mach cheyak' subchaho heba, cajxam yallaxi: “Ta chijetbin̈e coba yeb anma tx'oj isbeybal, niẍtejaln̈e cocuynito cowatx'en istx'ojal tu',” ẍi. 34 Nachaojabilo heyu yin̈ istx'ojal bay ayexicoj yeb matxa cheyaco hemul, yuto ayex maẍto heyohtajo Comam Dios. Chiwalan hune' ti' yun̈e hetx'ixwican̈. 35 Aymi mac chik'amben haca' ti': “¿Tzettaxca chu yitzitzbican̈ anma camnaxa? yeb ¿tzettaxca jilni isnimanil yet chiitzitzbican̈?” ẍi. 36 Ha' mac chalni haca' tu' caw suc. K'inalo ta chicotz'un hunu ixim hin̈at, caw yilal isk'ato hune' hin̈at tu', haca'tan̈e chicam chijila, haxa yanma ixim xin chiahiloj. 37 Maẍtaj awalxa yehi chicotz'unni, walxinto ha' ixim hin̈at tu' chicotz'unu, maca ixim hin̈at trigo maca hunuxa nan hin̈atil. 38 Haxa Comam Dios xin chiak'ni aholo ixim hin̈at tu' haca' choche isc'ul, hatatic'a tzet hin̈atil chicotz'unu ha' xin chiahiloj. 39 Yuxin mach sunilo nimanile lahan, wal xin nantic'a isnimanil anma, nanpaxo isnimanil no nok' can̈eb yoj, nanpaxo isnimanil no' ch'ic, nanpaxo isnimanil no' cay. 40 Hacpax tu' xin, ay nimanile yet satcan̈ yehi, aypaxo nimanilehal yet sat tx'otx'al ti'. Yaja' xin nananta jilni isc'ulch'anil isnimanil tzettaj ye tu' ay satcan̈, yeb xin nan jilni isc'ulch'anil isnimanil tzettaj ye tu' ay sat tx'o tx'otx' ti'. 41 Hacpax tu' tz'ayic, mach lahano isk'ak'al yeb ixahaw, mach lahanpaxo yeb tx'umel, hacpax tu' ej tx'umel mach lahano isk'ak'al hunun. 42 Hac tu' chu yitzitzbican̈ anma camom. Hune' nimanile chimujlaxi chietaxtoj, yaja' nanxa nimanile chu ispitzc'acan̈, matxa xin chietaxtoj. 43 Chimujlax hune' nimanile ayco istx'ojal yin̈, wal yet chiitzitzbican̈ xin, c'ulch'anxa jilni. Chimujlax hune' nimanile machi yip, haxa yet chiitzitzbican̈ caw ayxa yip. 44 Chimujlax hune' nimanile yet yul sat yiban̈k'inal ti', haxa yet chiitzitzbican̈ xin, yetxa espíritu yehi. Ay nimanile yet yul sat yiban̈k'inal ti', aypaxo nimanile yet espíritu. 45 Chal yul Yum Comam Dios haca' ti': “Ha' naj Adán, naj babel winaj, anma yu iswatx'elax naj, ak'bil isk'inal naj,” ẍiayoj. Haxa naj iscab Adán, yet satcan̈ ye naj, ha' naj chiak'ni k'inale mach istan̈bal. 46 Wal xin babel hul tzet ye tu' yet yul sat yiban̈k'inal ti', tzujan tu' xin, yul tzet ye tu' yet espíritu. 47 Naj babel winaj, yin̈ tx'o tx'otx' watx'elax naj, yuxin yet tx'o tx'otx' ye naj. Wal naj iscab Adán yet satcan̈ ye naj. 48 Ha' nimanile yet yul sat yiban̈k'inal ti', lahan haca' isnimanil naj watx'ebil yin̈ tx'o tx'otx', wal nimanile yet satcan̈ xin, lahan haca' isnimanil naj tit yul satcan̈. 49 Yulbal yet ayon̈ yul sat yiban̈k'inal ti', lahan conimanil yeb naj babel winaj watx'ebil yin̈ tx'o tx'otx', wal yet bak'in xin, lahan chielico conimanil haca' naj yet satcan̈il yehi. 50 Hex wuẍtaj hex wanab, chiwalan teyet tato hune' conimanil ti', mach chu yapni isc'atan̈ Comam Dios, yuto chibe yeb baj; huntek'an chietaxto ti', mach chu yapni bay mach chietaxto tzet ye tu'. 51 Chiwochehan cheyohtan̈elo hune' tzet ye tu' ewan yehi: Mach cosunilo chon̈cami, yaja' xin cosunil chihellax conimanil, 52 yuto yin̈ caw lembil, haca'n̈e ismutz'la cosat, yet chiok' ch'en islahobal trompeta cat yitzitzbican̈ macta ayxaco yul isk'ab Comam xacami, matxa xin bak'inal chicami. Walon̈ itzitzon̈ ti' yet chiyuni hune' tu' chihellax conimanil. 53 Yuto hune' conimanil chietaxto ti', chihellax yin̈ hune' nimanile mach chietaxtoj. Hune' conimanil chicamto ti' chihellaxi, ha' hune' satcan̈il chi'ak'lax seleloj hune' matxa bak'in chitan̈iloj. 54 Hune' conimanil chietaxto ti' chiheli cat yoc yin̈ hune' nimanile machi etaxtoj. Chihellax conimanil chicamto ti' yin̈ hune' nimanile mach chicami. Hac tu' chu yijni isba tzet tz'ibn̈ebilcano yul Yum Comam Dios bay chala: Chic'aytzelaxilo naj camical, ay hune' mac chik'oji yin̈ naj yin̈ huneln̈e. 55 Yuxin hach camical ¿baytu'wal ay hahelanil? ¿Baytu'wal ay hawip hapotx'wahi? ẍiayoj. 56 Ha' mule chon̈yak' camoj, wal isley Comam Dios xin ip yanico isya'tajil jiban̈. 57 ¡Yaja' yuch'andios tet Comam Dios, yuto xacon̈k'oji yin̈ naj camical, yaj yu Comam Jesucristo! 58 Yuxin hex wuẍtaj hex wanab, hex xahan ay wuhan, lin̈bawe heba, mach chexpax teyintaj. Hunun tz'ayicojab hex yin̈ yet Comam, munlahan̈we yin̈ ismunil Comam Dios sunilbal tiempo, yuto johtaj tato mach nabn̈eho chon̈munla yin̈ ismunil Comam Jesucristo Jahawil.
