1 CORINTIOS 14

1Awejcoj yin̈ he c'ul heyochen Comam Dios b'oj anma, yalab' he c'ul ya'ni Comam scan̈il heye yin̈ tzetet yet janma yeyi. Ha' ti' k'a' c'ul yin̈ heya'ni tzoti' ẍtit tet Comam. 2Mac stzotel yul nan ab'xub'al mach co txum tzet chala, lan̈an stzotel tet Comam Dios, mataj tet anma, haxca mach mac xtxumni tzet chala. Yu Comam Espíritu chal tzoti' mach mac ohtajn̈e. 3Wal mac ch'a'ni tzoti' ẍtit tet Comam Dios, slin̈b'a anma yin̈ Comam, chiptze anma b'oj cha' yak'lob'al sc'ul. 4Mac stzotel yul nan ab'xub'al han̈c'an̈e slin̈b'a sb'a yin̈ Comam Dios, yaja' mac ch'a'ni tzoti' ẍtit tet Comam, slin̈b'a sunil mac aycoj yin̈ Comam. 5Ay wala'an te hunil cheyal ab'xub'al nan yoqui, yaja' k'a' ẍto wochean ta ha' tzoti' ẍtit tet Comam Dios cheyala, haxca k'a' c'ul to ya'lax tzoti' ẍtit tet Comam sataj yal-lax nan ab'xub'ale. Han̈c'a ti' ta ẍhiltx'olaxiloj tzet chaliloj nan ab'xub'al tu' yun̈e slin̈b'an sb'a heb'ya' ayxacoj yin̈ Comam. 6Hex wuẍtaj hex wanab', k'inaloj chin apni te c'atan̈an yaja' yul nan ab'xub'al chin tzotel teyetan, mach tzet cha'a teyet, han̈c'a ti' ta stzoti' Comam ch'a'ni johtajn̈e hunuj tzetet ẍwal teyetan, mato yu cam heyohtajn̈en st'in̈anil, mato wa'ni hunuj tzoti' ẍtit tet Comam Diosan, mato hunujxa tzet cuyb'anileal, waltu' ay sc'ulal cha'a teyet. 7K'inaloj tinan̈ ay hunuj te' su', mato hunuj te' quitala, ta mat watx'eb'iloj yul snuk' te', mach mi ẍco txumu tzet sonal ch'eltoj yin̈ te'. 8B'oj hunxa, ta ay hunuj howal ch'oqui cat yok'tzelax ch'en trompeta yu syamicoj anma, yaja' mat ixtan̈oj yok' ch'en, machmi mac chican̈ sb'a sto yin̈ howal tu'. 9Hacmitu' ẍja'le hayon̈ ti', ¿tzet chu xtxumni anma tzet ẍjala ta mat hab'anoj ye tzet ẍjal tu'? Nab'n̈em chon̈ ah xin̈la co tzotel tet anma. 10Waltu' yeli, tx'ihal ab'xub'aleal ay satyib'an̈k'inal ti', hunun majan chu xtxumlaxi. 11Yaja' ta mat johtajoj hune' ab'xub'al tu'an, haca'n̈em con̈ob'laj je yul sat mac stzotel jetan, b'oj con̈ob'laj mi ye pax hune' tu' yul co satan. 12Yuxin haxca caw cheyoche heyub' hej tzetet cha' Comam Espíritu he munlan̈e, awejcoj yin̈ he c'ul heyuni hunk'aan tzetet caw ch'ocnicoj yin̈ slin̈b'an mac ayxacoj yin̈ Comam. 13Mac stzotel yul nan ab'xub'al sk'anab' tet Comam Dios tzet chu shiltx'oniloj. 14Ta yul nan ab'xub'al ẍwa' woraciónan, yeli lan̈an stzotel wanmaan, yaja' mataj hun hin nab'alan. 15¿Tzet wal wuten chaltu'an? Yilal stzotel wanmaan, yaja' tan̈e ha'hun hin nab'alan. Yilal ya'ni wanma b'itan yaja' tan̈e ha'hun hin nab'alan. 16Ta heyanman̈e ch'anicoj smay Comam Dios, wal hunujxa anma mach xtxum tzet cheyala, machu sta'wi, haxca mach xtxum tzet lan̈an heyalni. 17Waxan̈ca caw c'ul heyab'al yuch'antioẍ, yaja' mach ẍcolwa yin̈ hunujxa anma slin̈b'an sb'a yin̈ Comam Dios. 18Hayin ti'an ẍwa' yuch'antioẍ tet Comam Diosan haxca k'a' ẍwal nan ab'xub'al te satajan. 19Yaja' yet ẍco yamb'an co b'a yin̈ co hak'en Comam, k'a' ẍwochean ta heyab'xub'al ẍwala'an. Waxan̈ca howeb'ojn̈e tzoti' ẍwala'an tan̈e cheyi' he cuyb'anil yin̈ c'ul, sataj walni lahun̈eb' mil tzoti'an, yaja' mach he txumu tzet ch'elicoj. 20Hex wuẍtaj hex wanab', mat haca'oj niẍtej unin cheyute he nab'al. Yin̈ tzetet tx'oj, waltu' haca' tz'ul unin cheyute he b'a. Yaja' yin̈ he txumni, haca' yihla anma cheyute he b'a. 21Tz'ib'n̈eb'il yul Yum Comam Dios chalni: Chin tzoteloj tet hune' con̈ob' ti'an, yaja' ab'xub'al chal anma nancon̈ob'al ha' ẍhalnoj wuan, yaja' waxan̈ca hactu', machab'etoj, ẍi Comam Jahaw. 22Yuxin ha' nan ab'xub'al, ha' syeniloj smay Comam Dios jin̈ tet mac macha' yuluj sc'ul, mat yetoj anma ayxacoj yin̈ Comam yeyi, yaja' wal yal-lax tzoti' ẍtit tet Comam, ha' syeniloj smay Comam tet anma ayxacoj yin̈ Comam, mat yetwanoj anma machcoj yin̈ Comam yeyi. 23K'inaloj yet che yamb'an he b'a, ta te hunil nan ab'xub'al cheyala yet ch'ocapnoj hunuj mac machcoj yin̈ Comam, mato maẍto cha' yuluj sc'ul yin̈ Comam, ham yalni ta xax quex paq'ui locoal. 24Wal ta te hunil lan̈an heya'ni tzoti' ẍtit tet Comam Dios yet ch'ocapnoj hunuj mac machcoj yin̈ Comam mato maẍto cha' yuluj sc'ul yin̈ Comam, aytic'a yin̈ xtxumniloj to ahmul, ta yilal spich'niloj sb'a yu hej tzoti' cheyal tu'. 25Hactu' chu yelcan yen̈el tzet c'uan yin̈ yanma, cat yay jahnoj shak'e' Comam Dios, cat yalnojatij ta caw yeli aycoj Comam te xol. 26Yuxin hex wuẍtaj hex wanab', yet che yamb'an he b'a, ayex sje he b'itni, ayex che cuy anma yin̈ stzoti' Comam Dios, mato heya'ni tzoti' ẍtit tet Comam xa' heyohtajn̈e', mato yin̈ heyalni nan ab'xub'al, mato yin̈ he hiltx'oniloj nan ab'xub'al tu', sje heyuni hunk'aan tu', yaja' tan̈e yu he lin̈b'an he b'a yin̈ Comam Dios che yuni. 27Yet chex tzotel yul nan ab'xub'al, k'a' c'ul ta cawan̈, mato oxwan̈ojn̈e hex chex tzoteli, yaja' hununtajil. B'oj hunxa, yilal ay mac chu shiltx'oniloj nan ab'xub'al tu'. 28Taca mach mac chu shiltx'oniloj, k'a' t'in̈an macheyalnayi, heyanman̈e stzotel b'oj Comam Dios. 29B'oj hunxa, ta ay mac ch'a'ni tzoti' ẍtit tet Comam Dios, cawan̈ mato oxwan̈n̈e mac stzoteli, wal hunk'aanxa heb'ya', ocojab' heb'ya' yab'e' ta c'ul tzet ẍhal-lax tu'. 30Yaja' ta ay tzoti' cha' Comam Dios yohtajn̈e hunuj mac te xol ayictoj b'etu', mac lan̈an stzotel tu' stucb'aab' sb'a b'ela cat stzotel hune'xa mac tu'. 31Te hunilex chu heya'ni tzoti' ẍtit tet Comam Dios, yaja' hununtajil, yun̈e te hunil chex cuywi cat heyiptzelaxi. 32Mac ch'a'ni tzoti' ẍtit tet Comam Dios sje scachni sb'a yet ay mac lan̈an stzoteli, 33haxca mach choche Comam Dios ta xayanon̈xan̈e yet yamanon̈, to hununtajil b'oj ak'anc'ulal chon̈ tzoteli.Haca chute hunk'aanxa mac tzujanxacoj yin̈ Comam Dios 34yet syamb'an sb'a, hactu' chute sb'a heb'ix ix te xol yet che yamb'an he b'a. Yilal scachni sb'a heb'ix, haxca machu stzotel heb'ix yet che yamb'an he b'a. Yijyom chute sb'a heb'ix haca' yalni sley Comam Dios. 35Ta ay hunuj tzet choche heb'ix yohtajn̈e', sk'amb'e'ab' heb'ix tet yichamil yet hat-xa ay yatut, haxca spixan ix ch'eli ta ch'oc ix tzoteloj yulb'al yamanon̈ yin̈ co hak'en Comam. 36Nawejtij to mat teyetoj b'ab'el x'a'lax stzoti' Comam Dios, matca hexojn̈e xe cha hune' tzoti' ti'. 37Ta ay mac chal sb'a schejab'lomoj Comam Dios b'oj ta iptzeb'il yu Yespíritu Comam, yilal yohtajn̈eni ta hune' chin tz'ib'n̈e teyet ti'an schejb'anil Comam Jahaw yeyi. 38Yaja' ta mach sje sc'ul syijye'toj, mach ẍyijyelax pax tzet chal tu'. 39Yuxin tinan̈ hex wuẍtaj hex wanab', ochewej heya'a' tzoti' ẍtit tet Comam Dios. Machex cachwayi ta ay mac ẍhalni tzoti' yul nan ab'xub'al. 40Yaja' haca' caw yub'anil hactu' cheyute, b'oj yin̈ xtxolil.


Copyright
Learn More

will be added

X\