1 CORINTIOS 13

1Waxan̈ca caw helanon̈ jalni yabxubal anma yul sat yiban̈k'inal ti', maca yabxubal ebnaj ángel, yaja' ta mach xahano chijil jet anmahil, lahanon̈n̈e haca' hunu ch'en campana ton̈e chik'an̈i, yeb ch'en ch'en pak'an yehi ton̈e chitz'in̈xi. 2Waxan̈ca chijal tzoti' chitit tet Comam Dios, waxan̈ca xin chicotxum huntek'an tzet ye tu' ewan ye yu Comam, waxan̈ca johta sunil tzet ay yul sat yiban̈k'inal ti', yeb waxan̈ca chu cohec'nilo hunu witz yul yehobal yu ayco janma yin̈ Comam, yaja' ta mach xahano chijil jet anmahil, yin̈ haca' tu' machi yelapno jehi. 3Waxan̈ca xin chijitxk'ato tzet ayon̈ yin̈ anma meba', waxan̈ca xin chijak' tz'ajoto conimanil xol k'a k'a', yaja' ta mach xahano chijil jet anmahil, nabn̈e hune' tu'. 4Wal xin ta yeli xahan chijil jet anmahil, ay conimanc'ulal yin̈, chicoyelo isc'ulch'anil coc'ul tet, yeb mach chichiwa coc'ul yin̈, yeb mach chicololo'n̈e coba, yeb mach chijican̈ coba. 5Machi xin chijilo istx'ixobal hunu jet anmahil, machn̈etaj jet chijaco yin̈ coc'ul, mach chitit cohowal, wal xin chiconahuln̈eto istx'ojal chiswatx'e jin̈. 6Mach chon̈tzala yin̈ istx'ojal chiswatx'e hunu jet anmahil, walxinto ha' yin̈ isc'ulal chiswatx'e yin̈ chon̈tzalahi. 7Yet xahan chijil jet anmahil tu' chijak' janma istecha sunil tzet chiswatx'e jin̈, chicawxi coc'ul yin̈ tzet chala, ay conimanc'ulal jechmani, niman chijute coc'ul yin̈. 8Ha' hune' coxahann̈en coba tu' mach bak'inal chitan̈i, wal jalni tzoti' chitit tet Comam Dios chiapni istiempohal bay matxa chihallaxi. Chiapnipaxo istiempohal bay matxa chihallaxpaxo nan abxubal, yeb matxa yilalo ay cohelanil. 9Yuto cohelanil yeb jalni tzoti' chitit tet Comam Dios maẍto tz'ajanoj, 10yuxin huntek'an tu' chilahwi ismunil yet chihul huntek'an tz'ajan yehi. 11Yet nich'an intohan haca' istzotel niẍte unin, hac tu' intzotelan. Haca' istxumnipaxo niẍte unin, hac tu' intxumnipaxojan, haca'paxo isnabal niẍte unin, hac tu' innabalan. Wal tinan̈ xin icham anma inxahan, xawacanojan tzet ye tu' yet niẍte unin. 12Tinan̈ maẍto chon̈k'oji cotxumnilo tzet ye tu' haca' caw yehi. Wal xin haca'tan̈e jilni cosat yul hunu ch'en espejo k'ejmutz'mun̈e, hac tu' je tinan̈. Yaja' chiapni istz'ayical bay chijil yin̈ caw haban, haca' con̈yohtan̈en Comam Dios. 13Ay oxeb tzet ye tu' ti' mach chitan̈iloj, ha' ton janayto yul janma yin̈ Comam Dios, yeb iscawxi coc'ul yin̈ Comam, yebpaxo coxahann̈en jet anmahil. Yaja' hune' caw ec'bal yelapnoj xol oxeb ti', ha' ton coxahann̈en jet anmahil.

will be added

X\