1 CORINTIOS 13

1Waxan̈ca chu jalni sunil hej yab'xub'al anma, b'oj ẍjal pax yab'xub'al hej ángel, yaja' ta mach ẍjoche jet-anmail, lahanon̈ mi b'oj haca' sk'an̈ hunuj ch'en ch'en mato haca' sk'an̈ hunuj tinab' ẍq'uen̈tzelaxi. 2Waxan̈ca ab'il jub' yin̈ ja'ni tzoti' ẍtit tet Comam Dios, waxan̈ca chu co txumni tzet nab'il yu Comam, b'oj johtaj sunil hej tzetet, waxan̈ca chu co hec'ni hunuj witz b'ay aya haxca caw ẍja' yuluj co c'ul yin̈ Comam Dios, yaja' ta mach ẍjoche jet-anmail, matzet ẍjaliloj. 3Waxan̈ca ẍjitxk'atoj sunil tzet ayon̈ xol hej meb'a', waxan̈ca ẍjactoj co nimanil ti' tz'aoj xol k'a'k'a', yaja' ta mach ẍjoche jet-anmail, nab'an̈e. 4Ta ẍjoche jet-anmail, ay snimanil co c'ul yin̈, b'oj ẍco ye sc'ulal co c'ul tet, mach ẍchiwa co c'ul yin̈ ta ay tzet aya, mach ẍjute lolo'al ẍjanicoj co may. 5Machca comon ẍja' tx'ixwanoj hunuj jetb'i, matca hayon̈ojn̈e ẍjacoj co b'a yin̈ co c'ul, mach ton̈c'a niman ẍtit lemna ẍjila, to ẍja' nimanc'ulal cat co nahuln̈entoj tx'oj chu jin̈. 6Machon̈ tzalayi ta xtx'ojal chu anma, ha' jet tzalaoj hon̈ ta st'in̈anil chu anma. 7Ta ẍjoche jet-anmail, mach co pujb'ac'oj xtx'ojal chu, mach cab'con co c'ul yin̈, ta ẍjoche jet-anmail, ẍcawxi co c'ul ta swatx'iloj, ẍjijleaytoj tzet yeyi. 8Jochen jet-anmail maẍtic'a stan̈b'al, yaja' wal ja'ni tzoti' ẍtit tet Comam Dios, ch'apnoj stz'ayical b'ay matxa yeẍto ẍhal-laxoj, ni matxa ẍhal-laxoj nan ab'xub'al, ni matxa yeẍto ẍcam johtajn̈e' cuywab'al. 9Mat tz'ajanoj johtaj tinan̈ b'oj mat tz'ajanoj tzet chal heb'ya' schejab'lom Comam Dios. 10Hunk'aan hej tzetet mat tz'ajanoj ti' matxa ch'ocnojcoj yin̈ smunil yet chuluj hej tzetet tz'ajan lahan yeyi. 11Yet ni'anintoan, haca' stzotel niẍtej unin hin tzotelan, haca' ye yul swi' niẍtej unin ye yul hin wi'an, b'oj hin txumb'alan, haca' niẍtej unin yeyi. Yaja' tinan̈ yihla anmainxaan, xax wacan xtxumb'al niẍtej uninan. 12Tinan̈ maẍto chu co txumni hej tzetet yin̈ haca' caw yeyi, haca' jilni co sat yul hunuj ch'en espejo mach tzejla sat, hacn̈e tu' je tinan̈, yaja' ch'apnoj stz'ayical b'ay ẍjila' yin̈ hab'an. Tinan̈ machon̈ c'oji johtajn̈en tzetet haca' caw yeyi, yaja' ch'apnoj stz'ayical b'ay ẍjohtajn̈e'loj, haca' hon̈ yohtajn̈en Comam tinan̈. 13Oxeb' tzetet lin̈an tinan̈: Ja'ni yuluj co c'ul yin̈ Comam Dios, scawxi co c'ul yin̈ Comam, b'oj jochen Comam b'oj jet-anmail, yaja' jochen Comam b'oj jet-anmail, k'a' ec'b'alto ye sataj camajanxa tu'.


Copyright
Learn More

will be added

X\