1 CORINTIOS 12

1Hex wuẍtaj hex wanab', yin̈ tzet yelapnoj ye scan̈il je cha' Comam Espíritu Santo jet, ẍwochean ta cheyohtajn̈e tzet yeyi. 2Heyohtaj ta yet maẍto chex oc tzujnuj yin̈ Comam, xeya' sub'u' he b'a quex oc tzujnuj yin̈ hej tioẍ mach stzoteli. 3Yuxin tinan̈ wocheb'alan cheyohtajn̈e hune' ti'. Ta ay mac ẍhalni: Hulujab' stz'acti' Comam Dios yib'an̈ naj Jesús tu', ta ẍi, hune' anma tu' mataj Comam Espíritu Santo ch'a'ni yala'. Yaja' mac ẍhalni: Comam Jesús ha' Jahaw, ta ẍi, ha' Comam Espíritu Santo ch'a'ni yala'. 4Nanann̈e scan̈il je ch'a'laxi, yaja' hune'n̈e Comam Espíritu ch'a'ni. 5Nanann̈e tzet chu juni yin̈ smunil Comam, yaja' hune'n̈e Comam Jahaw b'ay ẍju. 6Nanann̈e co munil hununon̈, yaja' hune'n̈e Comam Dios ẍmunla jin̈ co hunil yun̈e yijni sb'a sunil tzet nab'il yu. 7Syeloj Comam Espíritu Santo to aycoj jin̈ hununon̈, cha'ni hej tzetet c'ul jet, yu sc'ulaloj yet yak'b'il jetb'i. 8Ay mac yu Comam Espíritu caw ay stz'ajanil sc'ul stzoteli. Ay mac chu scuywa yin̈ c'ul haxca ha' Comam ch'a'ni yohtajb'al. 9Yutic'a Comam Espíritu ay mac caw ch'a'ni yuluj sc'ul yin̈ syeniloj scan̈il ye Comam Dios, ay mac xwatx'i yawub' yu, yaja' yutic'a Comam Espíritu. 10Ay mac ẍchani scan̈il ye ya'ni hej c'ayb'alc'ule, ay mac ẍchani scan̈il ye ya'ni tzoti' ẍtit tet Comam Dios. Ay mac cha' Comam Espíritu stz'ajanil sc'ul xtxumni ta ha' Comam ẍmunla yin̈ hunuj anma mato espíritu tx'oj ẍmunla yin̈. Ay mac cha' Comam scan̈il ye yalni nan ab'xub'ale. Ay mac cha' Comam scan̈il ye shiltx'oniloj nan ab'xub'aleal ẍhalot tu'. 11Yaja' sunil ti' hatic'a Comam Espíritu ch'a'ni tet hunun heb'ya' haca'tic'a chal sc'ul Comam ya'a'. 12Co nimanil ti' waxan̈ca tx'ihal majan yeyi, yaja' hune'n̈e nimanileal yeyi. Hactu' ye Comam Cristo. 13Haxca hayon̈ ti', wal israelon̈ mato mat israelojon̈, wal chejab'on̈ mato jet co b'a, yaja' hune'n̈e Comam Espíritu b'ay xji' ha' yun̈e hune'n̈e nimanileal ẍjucanoj, hatic'a Comam x'a'lax ehoj jin̈. 14Ta ẍjiloj jet yin̈ co nimanil ti', ẍco txumu ta tx'ihal majan yeyi, yaja' hune'n̈e nimanileal. 15K'inaloj ta chu stzotel joj ti' cat yalni: Hayin ti'an mat k'ab'eojinan yuxin mach woc yin̈ hune' nimanil ti'an, ta ẍi, ¿tox yu, machcoj yin̈ co nimanil xin? 16Maca chal co txiquin: Hayin ti'an mat b'ak'sateojinan yuxin mach woc yin̈ hune' nimanil ti'an, ta ẍi, ¿tox yu mat tz'ajoj co nimanil yeyi? 17Yuxin ta b'ak'sate xan̈c'a co nimanil ti', machmi chu jab'eni; b'oj ta sunil xan̈c'a co nimanil ti' txiquine, machmi chu co xuk'en sam hunuj tzetet. 18Yaja' swatx'e Comam Dios huntaj majan co nimanil, xanicoj Comam b'ay chal sc'ul. 19Ta lahanxan̈c'a huntaj majan co nimanil, matxam chu jalni nimanileal. 20Yin̈ st'in̈anil, waxan̈ca caw tx'ihal majan, yaja' hune'n̈e nimanileal yeyi. 21Sb'ak' co sat machu yalni tet co k'ab': Matzet chach ocnicoj wuan, mat ẍioj, pax co wi' machu yalni tet joj: Matzet chach ocnicoj wuan, mat ẍioj. 22Machoj, to ha' hune' majan co nimanil comonaln̈e ye ẍjab'e, ha' k'a' ch'ocnicoj ju. 23Ha' hune' majan co nimanil mach caw smay, ha' k'a' c'ul chu co ya'iln̈eni, hune' majan co nimanil mat c'ulch'anoj, ha' k'a' ẍjen̈le. 24Yaja' b'aytet c'ulch'an mach yeẍto ẍjen̈le. Hactu' xu swatx'encan Comam Dios co nimanil, xa'ni Comam smay b'aytet scomonaln̈e yeyi, 25yun̈e mach scajque sb'a huntaj majan co nimanil, ha' yet to lahan sya'iln̈e sb'a. 26Ta ay hunuj majan co nimanil ti' ay tzet chu, sunil co nimanil ch'ab'en sya'il, taca ay hunuj majan stzantzelaxi, sunil co nimanil stzalayi. 27Yuxin co hunilon̈ ti', haca' snimanil Comam Cristo jeyi, hununon̈ ti', haca' hunun majan tu' hactu' jecoj yin̈ snimanil Comam Cristo. 28Yuxin co xol hayon̈ ayon̈xacoj yin̈ Comam ti', ay co munil xa' Comam: B'ab'el, hayon̈ apóstolon̈ ti'an. Scab', mac ch'a'ni tzoti' ẍtit tet Comam Dios. Syox, mac cuywaom, ay mac b'ay xa' Comam scan̈il ye yin̈ yuni c'ayb'alc'ule, ay mac xwatx'i yawub' yu, ay mac ẍcolwayi, ay mac ch'ijb'ali, b'oj mac chu yalni nan ab'xub'al. 29Yuxin mat suniloj mac apóstol, mat suniloj mac ch'a'ni tzoti' ẍtit tet Comam Dios. Mat suniloj mac cuywaom, mat suniloj mac chu yuni c'ayb'alc'ule. 30Matca suniloj mac ay scan̈il ye swatx'i yawub' yu, matca suniloj mac ẍhalni hunuj nan ab'xub'al, matca sunil mac chu shiltx'oniloj. 31Yuxin yalab' he c'ul he yuni hej tzetet k'a' c'ul cha' Comam Espíritu heyub'.Yaja' ayto hune'xa tzet k'a' c'ul juni ẍwala' teyetan.


Copyright
Learn More

will be added

X\