1 CORINTIOS 11

1Tzujanex yin̈ tzet xwuti'an, haca' woc tzujnuj yin̈ tzet xu Comam Cristoan. 2Hex wuẍtaj hex wanab', caw chin tzala teyin̈an, haxca chin he natij yin̈ sunil tzet cheyuan b'oj cheyijye he cuyb'anil xwa'an. 3Yaja' wocheb'alan cheyohtajn̈eloj yin̈ c'ul ta ha' Comam Cristo ha' swi'al yin̈ sunil heb'naj winaj, naj ichamile swi'al yin̈ ix ixale, haca' ye Comam Dios swi'al ye Comam yin̈ Comam Cristo. 4Ta chacoj naj winaj yen̈el swi' yet cha'ni naj yoración, mato yet cha'ni tzoti' ẍtit tet Comam Dios, chiloj naj spixan. 5Hactu' heb'ix ix, ta machacoj heb'ix yen̈el swi' yet cha'ni heb'ix yoración, mato yet cha'ni tzoti' ẍtit tet Comam Dios, chiloj ix spixan, haxca lahan b'oj ta slot'iloj ix xil swi'. 6Haxca ta machacoj ix yen̈el swi', k'a' c'ul ta slot'naloj ix sunil xil swi' tu'. Taca tx'ixwub'al st'eb'i swi' ix chab'e, ya'ab'coj ix yen̈el swi'. 7Hayon̈ winajon̈ ti' mat yetoj ay janicoj yen̈el co wi' haxca yechel Comam Cristo jeyi, b'oj syeb'aniloj smay Comam je paxoj. Wal ix ix, syeb'anil smay naj winaj ye ix. 8Yin̈ st'in̈anil, naj b'ab'el winaj mat yin̈oj ix b'ab'el ix x'eltoj naj, to ha' ix b'ab'el ix x'eltoj yin̈ naj b'ab'el winaj. 9Mat yuuj ix ix, yuxin swatx'e Comam Dios naj winaj, to yu naj winaj yuxin swatx'e Comam ix ix. 10Haxca aycoj hej ángel co xol yuxin yilal yanicoj ix ix yen̈el swi' yu syeniloj sb'a ta aycoj heb'ix yalan̈ schejb'anil yichamil. 11Yaja' yin̈ tzet nab'il yu Comam Jahaw, mach mi pax naj winaj ta mach ix ix, mach mi ix ix ta mach naj winaj. 12Waltu' yeli, yin̈ naj b'ab'el winaj x'eltoj ix b'ab'el ix, yaja' yin̈xa tinan̈, yin̈ ix ix ẍpitzc'aloj naj winaj. Sunil hunk'aan tu', swatx'eb'al Comam Dios yeyi. 13Txumwejc'anab'i ta scha ya'ni heb'ix ix yoración yin̈ machacoj yen̈el swi' haca' chute naj winaj. 14Haxca sunil mac ohtajn̈e ta tx'ixwub'al ya'ni ch'ib'oj naj winaj xil swi' haca' ix ix. 15Wal heb'ix ix caw ay smay ya'ni ch'ib'oj heb'ix xil swi', haxca xil swi' heb'ix aycoj yen̈eloj swi'. 16Ta ay mac chilann̈etic'aloj yu sk'amb'en yib'an̈iloj hune' cuyb'anile ti', yohtajn̈eab'canoj ta hactu' ẍjute b'oj hunk'aanxa yiglesia Comam Diosan. 17Ay hune'xa tzet ẍwa'ayoj b'eti'an, yin̈ hune' ti' machu walnian ta chin tzala teyin̈an. Yet che yamb'an he b'a matzet c'ul stzujcha heyu, ha' heyet to ton̈e cheyetatoj he b'a. 18Yin̈ caw yeli, ay mac ẍhalni wetan ta yet che yamb'an he b'a yin̈ culto mat lahc'ulaloj heyeyi, yaja' tita yeli. 19Toc'anab' yilal ca ox majan cheyute he b'a yun̈e syeniltoj sb'a mac k'a' t'in̈an yecoj. 20Yuxin yet che yamb'an he b'a tu', matxataj Cena Comam Jahaw cheyec'tze, 21haxca yet ch'apni yorail wa'oj, nanan heyiniatij tzet che lo, yuxin ay mac te xol ẍto n̈ohchayi, ay mac hasta scamtze swi'. 22¿Tox mach heyatut b'ay chu he to wa'oj? ¿Tzet yuxin cheyiloj spixan mac yiglesia Comam Dios yet cheyanicoj heb'ya' jetb'i matzet ay yin̈ tx'ixwilal? ¿Tox chin tzalaoj teyin̈ yu hune' cheyu tu'an? Machoj, caw mat yetoj aya. 23Haxca tet Comam Jahaw xin cha hune' cuyb'anile xwa' pax teyet ti'an. Hatic'a yet hune' ak'b'al b'ay x'alaxcoj Comam Jesús yul sk'ab' heb'naj xpotx'ni, xican̈ ixim pan. 24Lawi ya'ni yuch'antioẍ sk'axponayoj ixim, xalni Comam: Ha' ti' hin nimanil ch'alaxojcoj yul sk'ab' camical yu sc'ulaloj heyetan. Ha' hune' ti' cheyub' walb'anilojan, 25Lawi swa'iloj Comam, xinican̈ ch'en copa, xalni tet heb'ya': Tzet ahaytoj yul hune' copa ti' yechel scab' lahc'ulal chija' sb'a yu hin chiq'uilan. Huntaj el cheyuc' hune' ti', walb'aniloj chu heyuc'nujan 26Haxca huntaj el ẍco wa hune' pan tu', cat juc'ni tzet ahaytoj yul hune' copa, scamical Comam Jahaw lan̈an jalnic'oj masanto chuluj Comam hunecxa. 27Yuxin ta ay hunuj mac mach yelapnoj ye hune' pan tu' yul sat, b'oj tzet ahaytoj yul scopa Comam Jahaw yet swani b'oj yet chuc'ni, chacoj smul yin̈ snimanil Comam b'oj yin̈ schiq'uil. 28Yuxin yet maẍto ẍco wa hune' pan tu', ẍjuc'ni tzet ahay yul ch'en copa, yilal co pich'niloj co b'a yin̈ tzet je hununon̈. 29Haxca ta ẍco wa hune' pan tu' cat juc'ni tzet ahaytoj yul copa, yaja' mach ẍco txumu ta snimanil Comam jeyi, ẍjitij sya'tajil jib'an̈. 30Yu hune' ti' tx'ihal mac tx'oj ye sc'ul te xol, b'oj ay mac soan ya'ni, hasta ay mac xax cami. 31Ta ẍco txumu tzet je hununon̈, mach cha'a Comam Jahaw sya'tajil jila'. 32Yaja' ta ha' Comam cha'acoj yet jin̈, cha'a sya'tajil jila' yun̈e machon̈ tz'atoj yin̈ anma yet satyib'an̈k'inal ti'. 33Yuxin tinan̈ hex wuẍtaj hex wanab', yet che yamb'an he b'a heyec'tzen Cena Comam, cheyechma heyetb'i, haxin̈wal yamanex che yec'tzeni. 34Ta ay hunuj mac mach techa n̈ohchalal yu, wa'ojab'can yatut, haxin̈wal mach cha' Comam Dios sya'tajil teyet yu hune' tzet cheyu yet che yamb'an he b'a tu'. Wal hunk'aanxa tzetet mat t'in̈anoj yecoj, xa hin watx'ean yet chin apnoj hex wilnojan.


Copyright
Learn More

will be added

X\