1 CORINTIOS 10

1- 2Hex wuẍtaj hex wanab', wocheb'alan cheyohtajn̈e tzet xa'le hej jichmam yet payxa yet tzujan yin̈ ya' Moisés. Sunil heb'jetb'i aycoj yalan̈ hune' asun ch'en̈leni, b'oj sunil heb'jetb'i tu' x'ec'toj yul ha' Mar Rojo. Hactu' xu shunicoj heb'jetb'i sunil yin̈ ya' yu hune' asun b'oj ha' mar, haca'tic'a xi'can ha' heb'jetb'i. 3Sunil heb'jetb'i xloni hune' ita x'ayiloj satcan̈, hune' xatij Comam yu scan̈il yeyi. 4Sunil heb'jetb'i x'uc'ni ha'ha' xa' Comam yu scan̈il yeyi. Haxca sunil heb'jetb'i x'uc'ni ha'ha' ch'eltij yin̈ sc'ul hune' ch'en niman ch'en tzujan yin̈ yulb'al ẍb'elwi. Hune' ch'en ch'en tu' yechel Comam Cristo ye ch'en. 5Yaja' caw tx'ihal heb'jetb'i tu' b'ay mach stzala Comam Dios, yuxin tx'ihal heb'jetb'i xcamc'oj, nanann̈e b'ay xcan hanoj snimanil heb'jetb'i yul tajin̈ witz ac'al. 6Hunk'aan tzet xa'le heb'jetb'i tu' xcancan syeb'aniloj jet, yun̈e mat ẍjochetoj hej tzetet tx'oj, haca' xute heb'jetb'i tu'. 7Mach ẍco hak'e hej tioẍ haca' xute hunmajan heb'jetb'i tu', haca' yalni Yum Comam Dios: X'oc hune' con̈ob' tu' yec'tze' k'in̈, wa'oj, uc'uj, lawitu' x'oc heb'jetb'i tu' can̈alwoj, x'oc heb'naj yetanoj heb' ix ix, ẍi. 8Machon̈ ixli, machca say heb'ix ix swinaj, mach jute haca' xute hunmajan heb'jetb'i tu'. Yu hune' tu' 23 mil heb'jetb'i x'ec' b'ulna scam yin̈ hune' tz'ayic. 9Machca ẍjacoj Comam Jahaw yin̈ ilweb'al, haca' xute hunmajan heb'jetb'i tu', yu hune' tu' xchiot heb'jetb'i yu no' lab'ah, xcamic'oj. 10Mach'ah jaw yin̈ Comam Dios haca' xute hunmajan heb'jetb'i tu'. Yu hune' tu' xtan̈iloj heb'jetb'i yu naj ángel tan̈tzeomiloj anma. 11Sunil ti' x'ec'toj yin̈ heb'ya' jichmam tu'an yun̈e scan syeb'aniloj jet hayon̈ ayon̈toc'oj yin̈ yulb'al slahub'al tz'ayic ti'. Yun̈e johtajn̈eni to caw xiquiltaj juni hej tzetet tx'oj, yuxin stz'ib'n̈elaxcan yul Yum Comam Dios. 12Tinan̈ hex t'in̈anxa heyecoj heyalni, nann̈e heyu taj xe yetatoj he b'a. 13Hantaj ilweb'al ch'aot jila', lahan b'oj ilweb'al chil sunil anma, yaja' chu scawxi co c'ul yin̈ Comam Dios ta machon̈ sb'ejtzo yul sk'ab' hunuj ilweb'al mach techa ju, haxca chu syeniltoj Comam tzet chu co colcha tet hej ilweb'al tu' ta chul jin̈, yun̈e machon̈ ay yu. 14Tinan̈ hex wuẍtaj hex wanab' xahan ay wuan, nann̈e heyu taj che hak'e hej tioẍ. 15Ẍwal hunk'aan ti' teyetan haxca hexti' xa e txumu, hex caw che txumiloj ta t'in̈an ye tzet ẍwal ti'an. 16Ha' yet ẍjec'tzen Santa Cena, yet ẍjuc'ni yul ch'en copa b'ay ẍja' yuch'antioẍ, ay joc yin̈ schiq'uil Comam Cristo. Yet ẍco k'axpon ixim pan co wab', ay joc pax yin̈ snimanil Comam. 17Waxan̈ca caw tx'ihalon̈, hune'n̈e pan ẍco wa co hunil, haxca hune'n̈e nimanile je co yamanil. 18I'wejiloj heyet yin̈ tzet ye con̈ob' israel: Yet sc'uxni heb'jetb'i no' chib'e ẍhaltelax xahanb'alil, ay yoc yin̈ hune' hak'eb'al ch'a'lax tet Comam Dios. 19Matzet lan̈an walnian ta ay yelapnoj ye hej tioẍ, b'oj no' chib'e ẍhaltelax tet. 20To ha' chaliloj hune' tzet ẍwal ti'an, ha' anma mat israeloj, yet chalten xahanb'al, mataj tet Comam Dios chalte, to tet yespíritu naj matzwalil chalte. Mach sje hin c'ulan ta ay heyoc yin̈ yespíritu naj matzwalil yu he c'uxni no' chib'e ẍhaltelax tet heb'naj. 21Machu joc juc'nuj yul scopa Comam Jahaw, ta ayon̈coj juc'nipax yul scopa yespíritu naj matzwalil. Machca chu joc co wanoj ixim pan ahatoj sat smeẍa Comam, ta ayon̈coj co loni tzetet ahatoj sat smeẍa yespíritu naj matzwalil. 22Mat yetoj ay jawtentij showal Comam jib'an̈ yu co to yin̈ hunujxa maca. Toc'anab' k'a' ayto jip sataj Comam. 23Ay mac ẍhalni: Chu juni sunil tzetet, ẍi. Yeli, yaja' mat suniloj yet ay juni. Chu juni sunil tzetet, ẍi. Yeli, yaja' mat suniloj ch'a'ni yak'b'il jip. 24Matn̈etaj sc'ulal jet ẍco sayc'oj, to yilal co nanipaxtoj jetb'i. 25Sunil no' chib'e ẍtxon̈laxi chu co c'uxni no', mach co k'amb'e b'ay ẍtit no', yun̈e mach ẍtac co c'ul. 26Haxca hune' satyib'an̈k'inal ti' b'oj sunil tzet ay sat, yet Comam Dios yeyi, ẍi Yum Comam. 27Ta ay hunuj anma machcoj yin̈ Comam chon̈ awten wa'oj yatut, ta sje co c'ul chu co toyi, chu co c'uxni no' chib'e cha'a jet tu', mach co k'amb'e b'ay xtiticoj no', yun̈e mach ẍtac co c'ul haxca ẍco c'ux no'. 28Yaja' ta ay hunuj mac ẍhalni: No' chib'e ti' xax haltelax no' xahanb'alil tet tioẍ, ta ẍi, mach co c'ux no', yu sc'ulaloj yet mac xhalni tu' 29yun̈e mach ẍtac sc'ul ju.Yaja' aymi mac te xol ti' ẍhalni: Hayin ti'an chu hin c'uxni no' chib'e ti'an, ¿tzet yuxin yilal hin cachni hin b'aan yun̈e ay anma xiw sc'uxni no'? 30Ta ẍwa' yuch'antioẍan chin c'uxni no' chib'e tu'an mach hunuj mac chu yalni tzet chal win̈an, ẍimi. 31Ta ay hunuj tzet ẍco lo maca tzet ẍjuc'u, mato hunujxa tzetet ẍju, sunil tu' smayoj Comam Dios ẍju. 32Mach ja' lectaoj mac israel, b'oj mac mat israeloj, mato mac tzujanxa yin̈ Comam. 33Haca' ẍwute hayin ti'an, nann̈e wu wuni hej tzetet yin̈ sat hantaj anmaan, yaja' matoj yu sc'ulaloj wetan, to yu sc'ulaloj yet anma tu', yun̈e ta c'uxan stzujchaapnoj scolb'anil yu.


Copyright
Learn More

will be added

X\