1 CORINTIOS 1

1Hayin Pablo hin ti'an, awteb'ilin yu woc apóstolal yin̈ Comam Jesucristoan, haxca hactu' x'el yin̈ sc'ul Comam Dios. Ha'hun ya' juẍtaj Sóstenes 2ẍwet tz'ib'n̈entoj hune' hum ti' teyet hex yiglesia Comam Dios ay yul con̈ob' Corinto. Yeli hex yet-xa Comam haxca ayexxacoj yin̈ Comam Cristo Jesús. Awteb'ilon̈xa yetoj Comam b'oj sunil heb'ya' nanann̈e b'ay aya, ch'awten Comam Jahaw Jesucristo yin̈, Jahaw b'oj Yahaw heb'ya' ye paxoj. 3Ya'ab' co Dios co Mamwej b'oj Jahaw Jesucristo sc'ulch'anil sc'ul teyet, b'oj ak'anc'ulal. 4Ẍtic'a wa' yuch'antioẍ tet Comam Dios heyuan, yu sc'ulch'anil chatij Comam teyet yu Comam Cristo Jesús, 5- 6haxca syeloj sb'a teyin̈ ta st'in̈anil ye tzet ẍjal yin̈ Comam Cristoan. Yu Comam chatij Comam Dios sunil k'alomal yin̈ heyanma, yin̈ he tzoteli b'oj yin̈ he txumni. 7Yu hune' ti' machex mahlan yin̈ hunuj scan̈il heye cha' Comam Dios, ay he yala'nayi xax hulna hune' tz'ayic b'ay syeb'can̈ sb'a Jahaw Jesucristo. 8Comam Dios ch'a'noj heyip he lin̈b'an he b'a masanto slahub'al tz'ayic, yun̈e mach tx'ojal chila'coj Comam Jahaw Jesucristo teyin̈ yet chuluj Comam hunecxa. 9Ẍtic'a yij sb'a tzet chalte Comam Dios, ha' Comam xquex awteni quex shunb'ancoj yin̈ Jahaw Jesucristo Sc'ahol, haca' xu hon̈ yawtencoj yin̈an. 10Hex wuẍtaj hex wanab', hacojtam Jahaw Jesucristo ẍhalni teyet, ta lahc'ulal cheyute he b'a, mache pohtoj he b'a. C'ulch'an cheyute he c'ul te yin̈ hunun hex, hune'xan̈e cheyute he nab'al. 11Ẍwal hune' ti'an haxca xhalot wet yu heb'ya' ay sc'atan̈ ya' Cloean to xe pohtoj he b'a b'etu'. 12Ha' ch'elicoj hune' ẍwal ti'an, ab' ayex cheyala: Hayon̈ ti'an yin̈ ya' Pablo ayon̈cojan, quex chi. Ay hunmajanxa ẍhalni: Yin̈ ya' Apolos ayon̈cojan, ẍipaxoj. Ay hunmajanxa ẍhalni: Yin̈ ya' Pedro ayon̈cojan, ẍi. Ay hunmajanxa ẍhalni: Yin̈ Comam Cristo ayon̈cojan, ẍipaxoj. 13¿Tox pohb'ilay sb'a Comam Cristo yu? ¿Tox xax quin alaxcan̈ yin̈ culus heyuan? ¿Mato yin̈ hin b'ih xeyi' ha'an? 14Hunc'am yala' mach hunuj hexti' xwa' ha' heyi'a'an to han̈c'a ya' Crispo b'oj ya' Gayo. 15Yuxin mach mac chu yalni ta yin̈ hin b'ih xi' ha'an. 16Xwa' pax ha' yi'a' heb'ya' ay sc'atan̈ ya' Estéfanasan. Wal hunujxa maca, mach ẍtit yin̈ hin c'ulan ta xwa' ha' yi'a'an, 17haxca mach b'ay xa' Comam Cristo hin chejb'anil yin̈ wa'ni ha' yi'a' anmaan, to ha' walnic'oj tzoti' yet colb'anilan, ha' schej Comam wub'an. Scomonaln̈e chu hin tzotelan yun̈e mat yin̈oj stz'ajanil hin c'ul ẍcawxi sc'ul anmaan, to yin̈ scamical Comam Cristo yin̈ culus. 18Ha' cuywab'al tzet chu co colcha yu scamical Comam yin̈ culus, sucaln̈e ye tet anma lan̈an sc'aynitoj sb'a, yaja' wal jet hayon̈ lan̈an co colcha ti', hune' cuywab'al ti' scan̈il ye Comam Dios yeyi. 19Haca' yalni Yum Comam:Chin c'aya'loj stz'ajanil sc'ul heb'naj tz'ajan sc'ulan, cat hin b'alnic'ayoj scan̈il ye heb'naj cuywinajan, ẍiayoj. 20Matzet chaliloj stz'ajanil sc'ul heb'naj tz'ajan sc'ul, heb'naj cuywaom, b'oj heb'naj caw helan sk'umlan yin̈ tzet ye satyib'an̈k'inal ti'. Xax sye Comam Dios to sucaln̈e ye stz'ajanil sc'ul heb'naj. 21Yin̈ stz'ajanil sc'ul Comam Dios xitij, ta machu yohtajn̈elax Comam yu stz'ajanil sc'ul anma yet satyib'an̈k'inal ti'. To ha' chute Comam to yu stzoti' ẍjalic'ojan ẍcolcha anma cha' yuluj sc'ul yin̈, waxan̈ca ay mac ẍhalni ta sucal ye hune' tzoti' ti'. 22Heb'naj wetcon̈ob' israelan, ha' c'ayb'alc'ule choche heb'naj yila' yun̈e syeniltoj tato schejab' Comam Dios ye hune' maca. Wal heb'naj griego, ha' stz'ajanil sc'ul anma choche heb'naj yab'e'. 23Yaja' walon̈an, ha' scamical Comam Cristo yin̈ te culus ch'a'ni co colb'anil, ha' chon̈ ec' co pujb'ac'ojan. Tx'ixwilal ye hune' ti' tet heb'naj wetcon̈ob' israelan. Tet anma griego, sucaln̈e ye pax tet chab'e. 24Yaja' wal jet hayon̈ awteb'ilon̈xa yu Comam Dios, ta israelon̈ maca griegoon̈, johtaj ta yin̈ Comam Cristo syeloj sb'a scan̈il ye Comam Dios b'oj stz'ajanil sc'ul Comam. 25B'aytet sucal ye yin̈ yet Comam Dios yalni anma, k'a' ec'b'alto tz'ajanc'uleal ye sataj stz'ajanil sc'ul anma. B'aytet mach yip yin̈ yet Comam Dios yalni anma, k'a' ec'b'alto yip sataj yip anma. 26Hex wuẍtaj hex wanab', chim heyila te xol hex awteb'il yu Comam Dios, haywan̈exn̈e ay stz'ajanil he c'ul haca' yalni anma yet satyib'an̈k'inal ti', haywan̈exn̈e ay he may haca' swi' con̈ob', b'oj haywan̈exn̈e quex el yin̈ mac caw ay yelapnoj yeyi. 27Yaja' sic'le Comam mac suc sc'ul yul sat anma, yun̈e ya'ni tx'ixwoj mac caw tz'ajan sc'ul yalni. Sic'le Comam mac mach yip yul sat anma yun̈e ya'ni tx'ixwoj mac caw can̈ yeyi. 28Sic'le Comam Dios anma comon b'oj yahb'il, anma matzet chaliloj, yun̈e matxa yelapnoj chucan anma can̈ ye chab'e. 29Yin̈ hactu' mach mac chu yalni sb'a can̈yeal yul sat Comam Dios. 30Wal hayon̈ ti', ha' Comam Dios xcon̈ hunb'ancoj yin̈ Comam Cristo Jesús. Ha' hune' stz'ajanil sc'ul Comam Cristo ha' xa' Comam Dios jet. Yu Comam Cristo chon̈ can c'ulal yul sat Comam Dios, yet-xan̈e Comam jeyi, b'oj colchanajon̈xa. 31Yu hune' ti', chij sb'a haca' yalni Yum Comam Dios: Ta ay mac choche ya'acoj scawxob'al sc'ul yin̈ hunuj tzetet, k'a' c'ul tu' ta yin̈n̈e Comam Dios Jahaw ẍcawxi sc'ul.


Copyright
Learn More

will be added

X\