1 CORINTIOS 1

1- 2Hanin Pablo inti'an, awtebilinan wocan ischejabo Comam Jesucristo, yuto hac tu' el yin̈ isc'ul Comam Dios. Ha' hun juẍta Sóstenes chitz'ibn̈ento hune' carta ti' wintajan teyet, hex ayexxaco yul isk'ab Comam yul con̈ob Corinto. Yu Comam Jesucristo yuxin ayexxaco yul isk'ab Comam Dios. Awtebilexpaxo yu heyoc iscon̈obo Comam, yeb sunil mac bayxan̈etu'wal aya chiawten isbi Comam Jesucristo yin̈, Comam Jahawil yeb yahawilpaxo ebnaj tu'. 3Yak'ab Comam Dios yeb Comam Jesucristo isc'ulch'anil isc'ul teyet, yeb ak'anc'ulal yul heyanma. 4Maẍtic'a chinbejan wak'nihan yuch'andiosal tet Comam Dios teyin̈ yu isc'ulch'anil isc'ul xayayo teyiban̈ yu Comam Jesucristo. 5Yu hune'n̈e heye yeb Comam Jesucristo, yuxin xayaco Comam Dios sunil isc'ulch'anil yin̈ heyanma, hehelanil hetzoteli, yeb yitz'atil hewi'. 6Yuxin sunil tzet halbil teyet yin̈ Comam Jesucristo caw lan̈an isyenilo isba teyin̈. 7Tinan̈ xin machi hunu isc'ulch'anil isc'ul Comam Dios matzet teyin̈ yulbal ayexic'o heyechman istz'ayical bay chul Comam Jesucristo. 8Ha' Comam Dios chiak'ni heyip helin̈ban heba masanto yet chihul islahobal tz'ayic, haxinwal machi istx'ojal chiilcha teyin̈ yet chul Comam Jesucristo Jahawil. 9Sunil tzet chalte Comam Dios masan caw chij isba, ha' xin Comam quexawtenico yul isk'ab Isc'ahol, ha' ton Comam Jesucristo Jahawil. 10Hex wuẍtaj, hex wanab, yin̈ isbi Comam Jesucristo chiwaltojan teyet, hunxan̈ehojab cheyute henabal, mach comono chepohleto heba. Wal xin ayojab ak'anc'ulal texol, hunxan̈ehojab tzet chiec' yin̈ henabal yeb yul heyanma. 11Chiwaltojan hune' ti' teyet, hex wuẍtaj, hex wanab, yuto xawabehan hek'umal tato ay howal texol bey tu', hac tu' yalni yuninal juẍta Cloé wetan. 12Tolab ayex cheyal haca' ti': “Han̈on̈ti'an̈, yinta juẍta Pablo ayon̈icojan̈,” yeb ayex cheyalpaxoj: “Yinta juẍta Apolos ayon̈icojan̈.” Ayexpaxo xin cheyala: “Han̈on̈ti'an̈ yinta juẍta Pedro ayon̈icojan̈,” quexchi. Tolab ayex cheyalpaxoj: “Han̈on̈ti'an̈ yet Comam Jesucristo jehan̈,” quexchi. 13¿Tom pohbilayo Comam Cristo heyalni? ¿Tom haninan quinalaxcan̈an yin̈ culus yu hecolchahi? yeb ¿tom yin̈ inbihan alaxcan̈ ha' hewi' xin? 14Wal xin chiwak'an yuch'andios tet Comam Dios yuto machi hunujex ti' wacan̈an ha' hewi', cachann̈e juẍta Crispo yeb juẍta Gayo, 15yuxin mach chu heyalni ta yin̈ inbihan alaxcan̈ ha' hewi'. 16Wapaxocan̈an ha' iswi' yuninal juẍta Estéfanas, matxa hunuxa mac ahna ha' iswi' wuhan. 17Mach chejbilojinan wanican̈an ha' iswi' anma yu Comam Cristo, walxinto ha' inchejbanilan ha' walnic'ojan Tzoti' yet colbanile. Yaja' machi bay quintzotelan yin̈ nimeta tzoti' teyet yun̈e heyanico heyanma yin̈, wal xin han̈e iscamical Comam Jesucristo yin̈ culus, ha' walic'ojan. 18Hune' cuybanile yin̈ iscamical Comam Jesucristo yin̈ te' culus, sucal ye yul sat anma chic'aytoj. Wal yul cosat han̈on̈ xacon̈colcha xin, hune' cuybanile yet colbanile ti' yip Comam Dios yehi. 19Haca' yalni yul Yum Comam Dios: Chintan̈tzelojan ishelanil anma ay ishelanil sat yiban̈k'inal ti', cat intan̈tzenpaxilojan isnabal anma ay yitz'atil iswi', ẍiayoj. 20¿Tzet xin tan̈cano ebnaj ay ishelanil yeb ebnaj cuywawom, yeb ebnaj caw helan istzotel yin̈ hune' yul sat yiban̈k'inal ti'? Wal xin xaismeltzoco Comam ishelanil anma tu' yin̈ sucal. 21Yu ishelanil Comam Dios yuxin el yin̈ isc'ul tato maẍtaj yu ishelanil yul sat yiban̈k'inal ti', yuxin chiohtan̈elaxilo Comam, wal xin el yin̈ isc'ul Comam ta yu Istzoti' chijalic'ojan̈, ha' chicolni anma chianayto yul yanma, waxan̈ca ay mac chalni tato sucalil ye hune' Tzoti' ti'. 22Anma Israel, ha' c'aybalc'ule choche anma yila', wal ebnaj griego xin, ha' ishelanil anma choche ebnaj yabe'. 23Yaja' wal han̈on̈ti'an̈ ha' Comam Cristo alaxcan̈ yin̈ culus, ha' chijalic'ojan̈. Yul sat anma Israel caw tx'oj hune' tu', walpaxo yul sat anma mach Israelo xin sucal yehi. 24Wal han̈on̈ awtebilon̈xa yu Comam Dios ti' xin, waxan̈ca Israel maca mach Israeloj johtaj tato yip yeb ishelanil Comam Dios ayco yin̈ Comam Jesucristo. 25Huntek'an sucal ye yin̈ Comam Dios yalni anma, ha' ec'bal yelapno sata ishelanil anma. Haxa huntek'an machi yip yin̈ Comam Dios yalni anma xin, ha' caw ec'bal yip sata yip anma. 26Hex wuẍtaj, hex wanab, chimheyil texol hex awtebilhexxa yu Comam Dios tato caw haywan̈exch'an ay hehelanil haca' ishelanil anma. Haywan̈exch'anpaxo yahaw hex, haca' ebnaj iswi'ehal con̈ob, yeb haywan̈exch'anpaxo hex yic'al anma aycano yelapnoj heyehi. 27Yuxin ha' mac machi nich'ano tzet yohta yul sat anma, ha' issic'can̈ Comam Dios yuninaloj yun̈e yel istx'ixobal mac caw ay ishelanil. Issic'nipaxocan̈ Comam mac machi yelapnoj yun̈e yel istx'ixobal mac caw ay yelapno yehi. 28Issic'can̈ Comam anma yahbil yeb anma machi yelapno yul sat yiban̈k'inal ti' yun̈e matxa yelapno chielcanico mac caw ay yelapno chabe. 29Hac tu' xin machi mac chu yalni isba can̈yehal yul sat Comam Dios. 30Ha' Comam con̈hunbancano yin̈ Comam Jesucristo, yak'nipaxo Comam ishelanil Comam Cristo cohelaniloj. Yu Comam Jesucristo yuxin chon̈can c'ulal yul sat Comam Dios, yeb yetxa Comam jehi, yupaxo Comam Cristo tu' yuxin colbilon̈xa. 31Hac tu' chu yijni isba tzet tz'ibn̈ebilcano yul Yum Comam Dios bay chala: “Tato ay hunu mac choche yik'a'can̈ isba, ha'ojab Comam Cristo chican̈,” ẍiayoj.

will be added

X\