1 Hex wuẍtaj hex wanab, hex ti' heyohtaxa ley. Hune' ley tu' ay yip yiban̈ anma, yaja' han̈c'an̈e yet ayc'o yul sat yiban̈k'inal ti'. 2 K'inalo hunu ix ix mohyinaxa tinan̈, hunbabilxa ix yeb yichamil yu ley, yaja' han̈c'an̈e yet ayic'o naj yul sat yiban̈k'inal ti'. Yaja' ta chicam naj xin, chielcanti ix yalan̈ hune' ley hunban̈ecano tu'. 3 Yuxin tato itzitzto yichamil ix cat ishunban isba ix yeb hunuxa naj winaj, chaco ismul ix yin̈ haca' tu'. Wal ta xacam naj xin waxan̈ca chik' ix hunxa yichamil, matxa chaco ix ismul yuto xaelti ix yalan̈ hune' ley mohban̈e ix yeb yichamil tu'. 4 Hacon̈ tu' hex wuẍtaj hex wanab, yet iscam Comam Jesucristo cocampaxo yebi, yuxin yul sat Comam Dios camomon̈xa tet isley naj Mois'es. Wal tinan̈ yeton̈xa Comam Jesucristo, Comam pitzc'acan̈ xol camom. Hac tu' xin haxa tzet choche Comam Dios ha' chicowatx'e. 5 Yet yalan̈tocanoj yet ayon̈toco cowatx'en tzet choche isc'ul hune' conimanil ti', ha' hune' ley tu' ak'ni yochecan̈ janma istx'ojal choche conimanil ti', ha' xin con̈inito yin̈ camical. 6 Yaja' wal tinan̈ xin camnajon̈xa yin̈ hune' ley bay ayon̈icto yet yalan̈tocano tu', hac tu' xin yu joccano yalan̈ yip hune' ac' beybale yet Comam Esp'iritu Santo, matxataj yalan̈ ischejbanil ley tz'ibn̈ebilcano yet payat ayon̈icoj. 7 ¿Tzet cheyute hetxumni? ¿Tom tx'oj isley naj Mois'es tu', chal tu'? ¡Machoj! Wal xin ta machi ley machim wohtajojan tzet challax mulehal. Caw machim wohtajojan ta tx'oj jochenico hunu tzet ye tu' ta mach chal ley haca' ti': "Mach chu hawochenico hunu tzet ye tu' mach hawetoj," ẍi. 8 Yu hune' chejbanile ti', yuxin pitzc'a sunil istx'ojal win̈an, wilnilojan wochenicojan tzet ye tu' mach c'uloj. Yuto ta machi ley, machim tzet chal yelapno mule. 9 Yet maẍto wohtajojan ley tu' caw itzitzinan, yaja' yet wohtan̈enilojan ley tu' intxumnilojan ta camominan yul sat Comam Dios. 10 Hune' ley tu' ak'laxi yu yak'ni k'inale, yaja' xin ha' camical yiti wiban̈an. 11 Yu hune' ley tu' yuxin yik' yip mule win̈an, quinyak'ni subchahojan, ha' xin initi camical wiban̈an yu inmulan. 12 Wal xin yin̈ caw isyelal, hune' ley tu' yet Comam Dios yehi, hacpax tu' xin chejbanile ayco yin̈ yet Comam, caw toholcanoj yeb caw c'ul. 13 ¿Tzet xin chu hetxumni? ¿Tom ha' hune' ley c'ul tu' initi camical wiban̈an? ¡Machoj! Walxinto yu isyenilo isba tato caw tx'ojcano mule, yuxin yiti camical wiban̈an yu hune' mule. Ha' hune' ley c'ul tu', ha' yeniloj tato caw machiswalilcano mule. 14 Caw johtaj tato ha' Yesp'iritu Comam Dios an̈eti hune' ley tu', yaja' walinan ayinicojan yin̈ hune' nimanile yet yul sat yiban̈k'inal ti', yuxin haca'tan̈e txon̈bilinan ischejabo mule. 15 Ha' tzet chinwatx'ehan mach c'ulo chiwilan, yuto ha' isc'ulal chiwochehan inwatx'ehan mach chinwatx'epaxojan. Wal xin ha' huntek'an tzet yahbil wuhan ha' chinwatx'epaxojan. 16 Yuxin tato ha' istx'ojal machi wochehan inwatx'ehan ha' chinwatx'epaxojan, hac tu' chu wohtan̈enilojan tato maẍtaj ley tu' tx'oj, to caw c'ul. 17 Yuto maẍtaj-caw-inan chinwatx'ehan huntek'an istx'ojal tu', to ha' mule ik'biltic'a yu hune' innimanilti'an, ha' chiwatx'eni. 18 Caw wohtajan tato hune' innimanilan caw mulum ti', machi nino isc'ulal ayco yin̈, yuto hayet chiwochehan inwatx'enan isc'ulal, mach chu inwatx'enan. 19 Ha' isc'ulal chiwochehan inwatx'e'an, mach chinwatx'epaxojan. Wal xin ha' istx'ojal mach chiwochehan inwatx'ehan, ha' chinwatx'epaxojan. 20 Yuxin tato ha' tzet mach chiwochehan inwatx'ehan, ha' chinwatx'epaxojan, maẍtajinan chinwatx'ehan huntek'an tu', to haxa mule ayco win̈an ha' chiak'ni wuban. 21 Caw chiwilan tato hayet chinwatx'enan isc'ulal walnihan, to ha' istx'ojal chati isba yin̈ insatan. 22 Wal wanmahan, caw chitzala yin̈ isley Comam Dios, 23 yaja' xin ay hune' tzet chicachni inyijenan, hune' ley bay chintzalatu'an, ha' ton isley mule ayco win̈an, yuxin haca' preso wehan yu hune' mule chichejni wuban istx'ojal. 24 Caw c'anch'aninan, ¿mactaxca chu quiniscolnihan yul isk'ab hune' camical ayco win̈ti'an? 25 Wal xin han̈c'an̈e Comam Dios chu quiniscolnihan, yaja' yu Comam Jesucristo Jahawil; yuxin caw chiwak'an yuch'andiosal tet Comam. Yuxin chiwohtan̈elojan tato wanmahan choche isyije' yin̈ tzet chal Comam Dios, yaj wal mule ayco win̈an xin ha' chinijbanan yin̈ istx'ojal.
Copyright ℗ 2001 Hosanna Grabado por Vina, Solola, Guatemala