1 Yet ispaxayti Comam Jes'us iswi' hune' won̈an tu', caw hantan̈e anma oc tzujno yinta Comam. 2 Yelilo hune' naj yul beh, ayco hune' yabil chiyij lepra yin̈. Ishitzico naj isc'atan̈ Comam, yay jahno naj sata Comam, yalni naj: --Mamin, ta chawoche chu hawinilo hune' yabil ti' win̈an, ẍi naj tet Comam. 3 Yanayo Comam isk'ab yiban̈ naj, yalni Comam: --Ho', chiwochehan ta chiel hune' yabil ti' tawin̈, ẍi Comam. Yin̈n̈ena xin yel hune' yabil tu' yin̈ naj. 4 Lahwi tu', yalni Comam tet naj: --Machi mac tet chawalic'o hune' ti', wal xin as ye haba tet naj sacerdote, cat hawak'ni haxahanbal haca' yalni isley naj Mois'es, yun̈e yohtan̈encanilo anma tato xaelcano hune' yabil ti' tawin̈, ẍi Comam tet naj. 5 Hayet yoc apno Comam Jes'us yul con̈ob Capernaum, yapni hune' naj capit'an romano isc'atan̈ Comam, isk'anni naj ta chak' cawxo Comam hune' ischejab naj. 6 Yalni naj tet Comam: --Mamin, ay hune' inchejaban caw ya'ay, mach chibili isnimanil, caw xin ch'ec'ya' yanma naj yu hune' yabil tu', ẍi naj tet Comam. 7 Yalni Comam tet naj: --C'ultic'a, chintohan wak'a' cawxojan naj, ẍi Comam. 8 Istak'wi naj capit'an tu' tet Comam: --Mamin, caw mach chu hawapni yul watutan chiwabehan yuto caw matzet welapnojan. Wal xin ton̈e chachtzotelnato yin̈ hacn̈e ti' cat iscawxican̈ inchejabtu'an. 9 Wohtajan hune' ti', yuto haninti'an ayinictojan yalan̈ ischejbanil ebnaj wahawan, aypaxo xin ebnaj soldado ayico yalan̈ wipan. Ta chiwalan tet hunu naj: "Asi' bey tu'," ta quinchiyan, cat isto naj. Taca chiwalan tet hunuxa naj: "Cata," ta quinchiyan, cat istit naj. Yebpaxo xin ta chiwalan tet hunuxa naj inchejaban: "Watx'e hune' tilah," ta quinchiyan, cat yoc naj iswatx'enoj, ẍi naj. 10 Hayet yaben Comam yalni naj haca' tu', caw c'ayilo isc'ul Comam, yalni Comam tet anma tzujanico yinta tu': --Yin̈ caw yeli chiwalan teyet, maẍto hunu mac chiwilan yanico yanma yin̈ Comam Dios yul con̈ob Israel haca' hune' naj ti'. 11 Wal xin chiwalan teyet, chitit anma bay chiahilo tz'ayic, yeb bay chito tz'ayic cat iscutxbanico isba yeb naj Abraham, naj Isaac yeb naj Jacob sat ismeẍa Comam Dios bey satcan̈. 12 Ha' anma Israel yettic'a ay yoc sat hune' meẍa tu', yaj ay ebnaj chicancano yintajilo xol k'ejholo. Ha' bey tu' xin ch'oc ok'oj cat isn̈etx'la yeh yu isya'tajil, ẍi Comam tet anma. 13 Lahwi tu' xin, yalni Comam tet naj capit'an: --Paxan̈to hawatut, yubojab haca' chawoche yuto maxawayto yul hawanma win̈an, ẍi Comam tet naj. Yin̈tic'a hune' orahil tu' xin cawxican̈ ischejab naj capit'an. 14 Lahwi tu' xin, isto Comam Jes'us yatut naj Pedro. Yet yapni Comam yilni tato hilanto ismi' yixal naj Pedro tu' sat tx'at yu hune' niman k'a'. 15 Yoc tzabno Comam yin̈ isk'ab ixnam, yelna hune' k'a' tu' yin̈ ixnam, iscawxican̈ ixnam. Lahwi tu' yahwano ixnam, yoc ixnam iswatx'eno tzet chislo Comam. 16 Hayet lan̈anxa yay numnahi caw hantan̈e anma ayco ischejab naj matzwalil yin̈ ilaxto isc'atan̈ Comam. Caw xin hune'n̈ech'an tzoti' chal Comam cat yel ischejab naj matzwalil yin̈ anma. Yak'nipaxo cawxo Comam anma ya'ay. 17 Yin̈ huntek'an iswatx'e Comam tu' yijcano isba tzet halbilcano yu naj Isa'ias, hune' ischejab Comam yet payat, yet yalni naj haca' ti': "Yiban̈ naj chitocano yabil ayco jin̈, cat xin yabenpaxo isya'il coseleloj," ẍi naj Isa'ias tu'. 18 Hayet yilni Comam Jes'us tato caw hantan̈e anma hoyanico yin̈, yalni Comam tet ebnaj iscuywom tato chiec'to ebnaj yeb Comam isk'axepic'to ha' lago. 19 Yaja' yet yalan̈to maẍto chito Comam yeb ebnaj, ishitzico hune' naj chicuywa yin̈ isley naj Mois'es isc'atan̈ Comam, yalni naj: --Mam cuywawom, chinoc tzujnojan tawintaj bajxan̈etu'wal chachtohi, ẍi naj. 20 Yalni Comam tet naj: --No' wech ay isn̈ach'en no' bay chiwayi, yebpaxo no' ch'ic ay yatut no'. Yaja' Hanin Ak'bilintijan texol yu Comam Dios, machi watutan bay chinxewninojan, ẍi Comam. 21 Yalnipaxo hune'xa naj iscuywom Comam: --Mamin, chinoc tzujnojan tawintaj, yaj estam chawak' inhamanilan chito inmujcano inmaman babel, ẍi naj. 22 Yalni Comam tet naj: --Wal xin ocan̈ tzujno wintajan yuto ha' mac camom yul sat Comam Dios, ha' chimujni yet camomal, ẍi Comam tet naj. 23 Lahwi tu' xin, yocto Comam Jes'us yeb ebnaj iscuywom yul hune' te' barco. 24 Hayet lan̈an yec'to Comam yeb ebnaj yiban̈ ha ha' tu' xin, yichico yec' hune' niman jak'ek' caw how. Toxan̈e chitiẍla yah ha ha' tu' yin̈ te' barco, wal Comam Jes'us xin wayo chu yul te'. 25 Hayet yilni ebnaj iscuywom Comam hune' tu', yoc ebnaj yinolo iswayan̈ Comam, yalni ebnaj: --¡Mamin colon̈an̈, yuto lan̈an coto yich ha'! ẍi ebnaj tet Comam. 26 Istak'wi Comam tet ebnaj: --¿Tzet yin̈ xin caw chexxiwi? ¡Caw mach cheyaco heyanma yin̈ Comam Dios! ẍi Comam tet ebnaj. Lahwi tu' xin yahwano Comam, iscachni Comam jak'ek' yeb ha ha'. Hac tu' yu islin̈ban isbili ha ha' tu' yeb jak'ek', ispaxtz'in̈nahi. 27 Wal ebnaj iscuywom Comam tu', caw c'aycanilo isc'ul ebnaj, yalni ebnaj tet hunun: --¿Mac anmahil hune' ya' ti' yuxin chisyije jak'ek' yeb ha ha' tzet chal ya'? ẍi ebnaj yin̈ Comam. 28 Hayet yapni Comam Jes'us yeb ebnaj iscuywom isk'axepic'to ha' lago bey hune' tx'otx' chiyij Gadara, yapni cawan̈ ebnaj ayco ischejab naj matzwalil yin̈ isc'atan̈ Comam; ispeto ebnaj yul camposanto. Ebnaj cawan̈ tu' caw chixiw anma tet ebnaj yuto caw aycano yip ebnaj. Caw xin machi hunu mac chiec' bay ay ebnaj tu'. 29 Yah yaw ebnaj tet Comam yin̈ caw ip: --¿Tzet hawoc jin̈an̈ hach Jes'us Isc'ahol Dios? ¿Tom chachhul hawak'a' ec'oya' janmahan̈ yalan̈to maẍto chiapni istiempohal? ẍi ebnaj tet Comam. 30 Iscawilal tu', ay huntek'an no' txitam lan̈an istan̈elaxi, 31 yuxin isk'an ebnaj ischejab naj matzwalil tu' tet Comam haca' ti': --Tato chon̈hawilojan̈ yin̈ ebnaj ti', chicok'anan̈ tawet, chejon̈tojan̈ yin̈ no' txitam tu' lah, ẍi ebnaj tet Comam. 32 Istak'wi Comam: --C'ultic'a, asi'wej, ẍi Comam. Hac tu' xin yu yel ebnaj ischejab naj matzwalil yin̈ ebnaj cawan̈ tu', istocano ebnaj yin̈ no' txitam. Lahwi tu' xin yelcan̈ no' txitam tu', isk'ojnito isba no' sat pahaw, yay apno no' xol ha ha', ishik'nito no' ha'. 33 Wal ebnaj tan̈em txitam xin elcan̈ ebnaj. Hayet yapni ebnaj yul con̈ob yalni ebnaj tet anma yin̈ tzet yu ebnaj cawan̈ bay aytic'aco ebnaj ischejab naj matzwalil. 34 Yuxin sunil anma yul con̈ob tu' to ilno Comam. Hayet yapni anma isc'atan̈ Comam tu' xin, yoc anma isk'anno tet Comam tato chiel Comam yul ismajul istx'otx' ebnaj tu'.
Copyright ℗ 2001 Hosanna Grabado por Vina, Solola, Guatemala