1 Atik uma'l u naj tu u tenam uva' Cesarea uva' Cornelio ib'ii. As naj iq'esal o'k'alal (100) sol uva' «Italiano» ch'elelike. 2 As aya'l chit ik'u'l u Cornelio nik toksa taama ti' inachat Tiixh, tan nik ixo'va naj u Tiixhe' tuk' unq'a tatine' tikab'al. As b'enameen nik inach naj Tiixh. As nimal lochb'al nik ib'an naj te unq'a uxhchile'. 3 As tu uma'l u ku'q'ii tu oxva'l oora, as ik'uch ve't tib' tivatz u Cornelio uva' kat ok ve't uma'l u ángel k'atz naj. As ech tal ile': —Cornelio,— ti'k u ángel. 4 As yak kuxh samun ve't u Cornelio ta'n xo'vichil. As isaji ve't naj u ángel. As ech tal naj ile': —¿Kam nasa', pap?— ti'k naj. As ech tal ve't u ángel ile': —As at sk'u'l u Tiixhe' uva' naloch unq'a meeb'a'e', as b'enameen nanach Tiixh. 5 As chaj b'en ka'vo'j uxhchil tu u tenam uva' Jope. As la b'en eq'oloj tzan uma'l u naj uva' Simón uva' «Lu'» ch'elel. 6 As a' atkat naj tikab'al uma't u naj uva' Simón uva' nitzaq'san tz'u'm. As a' jejle'lkat naj tzi' u mar. As la tal u Simón uva' «Lu'» ch'elel as la tal isuuchil see kam uve' la ab'ane',— ti'k u ángel. 7 As tul b'en ve't u ángel yolon te u Cornelio, as imolo ve't naj ka'va'l vik'am tuk' uma't u sol uva' k'ujle'l ik'u'l naj sti', tan aya'l chit ik'u'l u sole' nik inach Tiixh. 8 As tal ve't u Cornelio isuuchil te chajnaj ti' uva' kat ik'uch tib' te naj. As ichaj ve't b'en naj chajnaj tu u Jope. 9 Tu ve't uma't q'ii kamal chaq'aal q'ii, as tul b'iitik toon unq'a naje' tu u Jope, as je' ve't u Lu'e' vi' u kab'ale' ti' inachat Tiixh. 10 As nik isa' ve't u Lu'e' itx'a'ne', tan va'lik chit iva'y ve'te'. As tul nikat ib'anchu tuch u echb'ub'ale', as ik'uch ve't tib' tivatz u Lu'e' uva' eche' vatzik'. 11 As til ve't u Lu'e' uva' jajlik ve't u almika'e'. As ku' ve't ch'u'l eche' uma'l u nimla ixb'u'j uva' k'alel junun ixoob'. As ku' ve't ch'u'l vatz u tx'ava'e' uve' til u Lu'e'. 12 As atik ku' ka'l unq'a txoo stuul uva' kajva'l toj, tuk' unq'a txooe' uve' nijuxu tib' vatz tx'ava', tuk' unq'a tz'ikine'. 13 As tab'i ve't u Lu'e' uma'l u tuul vi' uva' ech tal ile': —Txakpen, Lu'. As yatz' unq'a txooe'. As echb'u,— ti'k u yole'. 14 As ech tal ve't u Lu' ile': —Ye'le, Pap, tan ye' atixoj vechb'u umaj txoo uve' ye' la uch techb'ule',— ti'k u Lu'e'. 15 As ech tal ve't u yol ile' tika'pa te u Lu'e': —Jank'al uva' ni vale' uva' la uch techb'ule', as ye' la uch aalata' uva' ye' la echb'uli,— ti'k u yole'. 16 Oxpajul chit ib'ana. As eq'ol ve't je' u nimla ixb'u'je' tu almika'. 17 As teq'o ve't taama u Lu'e', tan ye' nikat ipal stuul uva' kam isuuchil uve' kat tila. As tul titz'a ve't naj, as b'ex oonoj unq'a naje' tzi' u kab'ale' uva' ichaj b'en u Cornelio, tan ma'tik tab'it chajnaj katil atikkat vikab'al u Simón uva' tzaq'san tz'u'm. 18 As ich'oti ve't chajnaj te u b'aal kab'ale'. As ech tal chajnaj ile': —¿Ma a' atkat u Simón tzitza' uva' «Lu'» ch'elel?— ti'k chajnaj. 19 As tul nik titz'a ve't u Lu'e' uva' kam kat ik'uch tib' tivatz, as ech tal ve't u Tiixhla Espíritu ile' ste: —Il oxva'l unq'a naj nichukun see'. 20 As txakpen. Kuxh ila. As ye' la ka'kab'in aama ti' ab'en ti' chajnaj, tan ine' chajol tetz chajnaj,— ti'k u Tiixhla Espíritu. 21 As tul ku' ve't ch'u'l u Lu'e' vi' u kab'ale', as ul til ve't u Lu'e' unq'a naje' uva' ichaj tzan u Cornelio. As ech tal ve't u Lu' ile': —As kat alpu sve uva' in nechuk in. ¿As kam ni tal etaama?— ti'k u Lu'e'. 22 As ech tal ve't unq'a naj ile': —Kat ichaj tzan o' u kuq'esale' uva' Cornelio, tan jik chit itxumb'al. As ninima u Tiixhe'. As b'a'n iyolb'ele' vatz unq'a tiaal Israel uve' Cesarea. As nisa'b'ela axh u Cornelio Lu', tan kat ik'uch tib' uma'l u ángel ste. As a'e' kat alon ste uva' la ul kumolo axh ti' ab'en tu vikab'ale', tan nisa' tab'it u Cornelio vayole' kam uva' la aale',— ti'k chajnaj te u Lu'e'. 23 As teq'o ve't ok u Lu'e' chajnaj tu vikab'ale'. As aq'pu ve't ivatb'al chajnaj. As tu ve't uma't q'ii, as b'en ve't u Lu'e' ti' chajnaj tuk' ka't unq'a qitz'in qatzike' uve' atik tu u Jope. 24 As tu ve't uma't q'ii, as oon ve't chajnaj tu u Cesarea uva' nik itx'eb'onkat u Cornelio, tuk' unq'a titz'in tatzike', tuk' unq'a tetz k'ultzi'e' uva' ma'tik imolata'. 25 As tul b'iitik kuxh toon ve't u Lu'e' tu vikab'al u Cornelio, as ul ik'ul ve't u Cornelio u Lu'e'. As ku' ve't u Cornelio qaaloj ti' toksal iq'ii u Lu'e'. 26 Ech tal ve't u Lu' ile': —Txakpen, tan in kuxh naje', eche' axh,— ti'k u Lu'e'. 27 As txakpu ve't u Cornelio. As yolon ve't chajnaj tul ok ve't chajnaj tu kab'al. As tul til ve't u Lu'e' uva' nimal tenam molik ve't tib' tu kab'ale', 28 as ech tal ve't ile': —Ate' sek'u'l uve' ni qale' uva' o' tiaal Israel uva' ye' la uch kumolot qib' setuk', tan jit ex tiaal Israel. As mita'n la uch qok tekab'al. Pet ech koj cheel, tan kat ik'uchlu u Tiixhe' sve uva' ye' la uch voksat ve't ixo'l unq'a uxhchile' vatz u Tiixhe'. 29 Esti'e' uva' oora kat tzaa in, tul kat emolo in. As ye' kat unpi'u vib' ti' untzaae'. As nunsa' uva' la vootzi kam sti' kat emolokat in,— ti'k u Lu'e'. 30 As ech tal ve't u Cornelio ile': —Kat ib'anlu ve't kajva'l q'ii cheel ech oorae' u vaa', as nikat unkuy unva'y. As tu oxva'l oora ku'q'ii tul atik in tzitza' tu vunkab'ale' ti' unnachat Tiixh, as aat kuxh vil ik'uchat tib' uma'l u uxhchil tunvatz uva' va'lik chit ilitz'kab'an u toksa'me'. 31 As ech tal ile' sve: «Cornelio, kat tab'il u Tiixhe' vayole' uve' naale'. As at sk'u'l u Tiixhe' uva' naloch unq'a meeb'a'e'. 32 As chaj b'en umaj uxhchil tu u tenam uva' Jope ti' b'en teq'ol tzan u Simón uva' Lu' ni talpe'. A' echenkat tu vikab'al uma'l u tzaq'san tz'u'm uva' Simón, uva' echen tzi' u mar,» ti'k sve. 33 Esti'e' uva' oora chit kat unchaj b'en ka'l unq'a unk'am ti' b'en eeq'ol tzan. As kat ab'anlu b'a'nil ti' oole'. As il o' molel ve't qib' skukajayil vatz u Tiixhe'. As nu kusa' uva' la aal sqe kam uva' kat tal u Tiixhe' see,— ti'k u Cornelio. 34 As ech tal ve't u Lu' ile': —Cheel kat palyu ve't in stuul uva' ye'l ixo'l unq'a uxhchile' nib'an u Tiixhe', 35 tan nitxuq'txun u Tiixhe' ti' unq'a uxhchile' uve' ni xo'van Aak, k'uxh kam kuxh tenamil. As nib'an u b'a'ne' tuk' u jike' vatz u Tiixhe'. 36 Tan kat ik'ujb'a' kan u Tiixhe' viyole' sukuxo'l uva' o' tiaal Israel. As kat tal kan Aak u b'a'nla yole' ti' uva' b'a'n qatin sukuvatzaj ta'n u Jesucristo, tan Aake' u Kub'aale' uva' at sqi' skukajayil. 37 As ootzimale' u yole' seta'n uva' b'axik paxsal tu u Galilea tul ma'tik ixe't u Xhune' ti' talax te unq'a tename' uva' la ku' xe' u a'e' tuk' vib'ii u Tiixhe'. As a'n paxsal u yole' xo'l unq'a aa Judea. 38 As a'e' u yole' ti' u Jesús uva' aa Nazaret uva' kat taq' ve't u Tiixhe' tijle'm ta'n u Tiixhla Espíritu. As ootzimale' seta'n uva' katil nikat ipalkat u Jesús, as nikat ib'an u b'a'ne'. As nik ib'a'nxisa Aak unq'a uxhchile' uve' nik paleb'en unq'a k'axk'oe' ta'n unq'a sub'ule', tan atik u Tiixhe' k'atz Aak. 39 As ni qal ve't isuuchil ti' uva' kat qila uva' kat ib'an u Jesús tu u Judea tuk' tu u Jerusalén. As kat tal unq'a tename' uva' la aq'pik je' u Jesús vatz u kuruse'. As kat yatz'pi. 40 As kat tulsa ve't u Tiixhe' taama u Jesús titoxvu q'ii. As kat ik'uch ve't tib' Aak uva' isle'l ve't Aak ta'n u Tiixhe'. 41 As ye' kat ik'uch tib' u Jesús te unq'a tename' skajayil. Pet sukuvatz kuxh kat ik'uchkat tib' Aak, tan ma'tik ik'ujb'a't kan o' u Tiixhe' ti' b'en qalat isuuchil uva' kat qila, tan kat tx'a'n o', as kat uk'a' o' tuk' Aak, tul ma'tik tul taama Aak unpajte. 42 As Tiixhe' kat chajon ve't o' ti' b'en qalat ve't u yole' te unq'a tename' uva' a' u Jesús uva' k'ujlu kan ta'n u Tiixhe' ti' ib'anax isuuchil unq'a tename' uve' kamnajle tuk' unq'a vee' isle'le. 43 As ti' u Jesús kat yolonkat kan unq'a q'ajsan tetz viyol u Tiixhe' ti' uva' jank'al unq'a tename' uva' la ik'ujb'a' ik'u'l ti' Aak as a'e' la sotz ipaav ta'n Aak,— ti'k u Lu'e' te unq'a uxhchile' uva' atik tikab'al u Cornelio. 44 As antelik kuxh iyolon u Lu'e' tul b'ex okoj ve't u Tiixhla Espíritu tu u taanxelal unq'a uxhchile' skajayil uve' nik ab'in u yole'. 45 As unq'a uxhchile' uva' xekik ti' u Lu'e' uva' ma'tik itzok'ax el unb'iil vichi'ole', as teq'o ve't taama ti' uva' kat ul u Tiixhla Espíritu ti' unq'a uxhchile' uve' jit tiaal Israel, 46 tan nikat tab'i ve't chajnaj iyolon unq'a uxhchile' tu uma't yolb'al uva' ye' ootzimalik sta'n. As nik toksa ve't unq'a uxhchile' iq'ii u Tiixhe'. 47 As ech tal ve't u Lu' ile': —¿Ab'il q'i la majon ivatz unq'a uxhchile' ti' ib'en xe' u a'e' tuk' ib'ii u Tiixhe'? Tan kat ulyu ve't u Tiixhla Espíritu sti' eche' uva' kat ib'an sqe, o' uva' o' tiaal Israel,— ti'k u Lu'e'. 48 As tal ve't u Lu'e' uva' la ku' unq'a uxhchile' xe' u a'e' tuk' vib'ii u Kub'aal Jesús. As ijaj ve't unq'a uxhchile' b'a'nil te u Lu'e' uva' la kaaik kan ka'toj q'ii.
Copyright ℗ 2008 Hosanna Grabado por Vina, Solola, Guatemala