Tito 3

1Kanakanayun nga iparandam mu kan ya wawwahi tera kan pangurug nga makimoray ra kan ya mammoray ira en ya hinnian/asan paka-awayya ra, minammarulot da, siggaparan da nga mangngua kan hanna laman nga napia, 2mari ra mamaraparakat kan innia laman, mari ra makiggungut, nasimpat da, en mammakakua ra kan ngammin nga totolay. 3On, gafu ta maski ittera, mari tera ammu kattun ya napia, mari tera minammarulot, pinallikud da ittera kan ya kurug, en kuenta nakohung tera kan ya narakat/napot nga akkelug en maddumuruma nga appayayat. Kanakanayun nga ikayat tera kattun nga hinnian narakat nga mesimmu kan ya ikattolay tera ira, minappassapassil tera en nakkaralullussaw tera. 4Ngam y Afu Dios nga mamalliad kan ittera, kattu nepakammu na ya allak en idduk na, 5pinalliad na ittera, mari megafu kan ya napia nga kinikkingngua tera gafu ta natunung tera, nu azzi megafu kan ya inaggallallak na. Pinalliad na ittera kannia nekabawtiso tera kannia uli neke-anak tera en ya nepannalibahu ya Espiritu Santo kan ittera. 6Awan nga gukud ya nepangngiddan na kan ya Espiritu Santo kan ittera, megafu kan y Jesu Cristo nga mamalliad kan ittera. 7Kiningngua na yan tase mapatunung tera megafu kan ya allak na, en malawat tera ya angat nga awan na nga panda nga innanaman tera. 8Kurug ya bahu neturak ku. Ikayat ku nga itaddataddan mu ira yan kan napia kan ya mangurug ira kan y Afu Dios, tase mallallappat da nga maka-angngua kan napia. Napia ya neturak ku en pammakapianan ya totolay. 9Ngam ibitam ya diddiskusion ira nga awan da nga serbi, ya annaraddu nga lista ya ginafu ira, ya akkitabbatabbag en ya aggurungut nga me-annung kan ya dorob, gafu ta awan nga malak kan ira yan onu serbi ra. 10Nu hinnian tolay kannian nga mappagurungay kan ya mangurug ira, itabarang mu nga memmang iggina. Nu mari na ka ginan, ullian mu kayan. Nu mari na ka peba gigginan, porrian mun. 11Ammum nga, ya innia laman nga kunna tian, killu ya appanapanonot na, minalliwat iggina, en kondenan na iggina pe laman. 12Bonan ku y Artemas onu y Tikico kan ikaw, en so nu makalabbet ya ke-esa kan ira, kuan mu ya panda mawayyam nga umang dumafung kan yakan kan ya siudad ya Nicopolis, gafu ta zinisidi kun nga kannay ya paddianan ku kan ya tiempo lammin. 13Kuan mu ya panda mawayyam nga manguffun kan y Zenas nga abugadu en y Apolos, en siguraduan mu nga malak da ngammin ya mawag da. 14Mawag kan gilammuan ya wawwahi tera kan pangurug nga usan da ya tiempo ra nga mattrabahu kan napia, tase ira pe laman ya mamalawan kan ya mawag da kan kagalgaw, senannu hinnian serbi ya attolay ra. 15Ngammin ya kakavulun ku kanniaw, ipe-addet da ya diot da kan ikaw. Diot ku pay kan ya wawwahi tera kan pangurug nga mangayat kan ittera. Pare zinan ta hinnian ya allak y Afu Dios kan ikayu ngammin.

will be added

X\