Roma 8

1Gaggafen, awan ngin nga kakondena ya totolay nga netadday kan y Jesu Cristo. 2On, gafu ta, ya pakapangngua ya Espiritu Santo nga mangiddan kan ittera kan angat kannia neketadday tera kan y Jesu Cristo, sinueltan nak kan ya pakapangngua ya liwat en ya patay. 3On, gafu ta, ya mari makua ya dorob megafu kan ya negagangay nga kafi ya totolay, kiningngua y Afu Dios kattu binon na ya Anak na nga megitta ya baggi na kan ya baggi tolay nga minalliwat en megafu kan liwat. Pinabbalin na nga awan nga kuenta ya pakapangngua ya liwat kan ya gibbaggian tera, 4tase ya kinatunung nga ipakua zinan ya dorob, matumpal kan ittera nga mattolay segun kan ya uray ya Espiritu Santo en mari na kan segun kan ya ikayat ya gibbaggian teran. 5Ira nay nga mattolay segun kan ya ikayat ya gibbaggian da, yan laman ya panapanonotan da, ya ganagannud nga ikayat ya gibbaggian da. Ngam ittera nga mattolay segun kan ya ikayat ya Espiritu Santo, yan laman ya panapanonotan tera, ya ganagannud nga ikayat ya Espiritu Santo. 6Ya innia laman nga mappanapanonot kan ya ganagannud nga ikayat ya baggi na, mattumpal kan ipappatay. Ngam ya innia laman nga mappanapanonot kan ya ganagannud nga ikayat ya Espiritu Santo, mattumpal kan angat en imamak. 7On, gafu ta, ya innia laman nga mappanapanonot kan ya ganagannud nga ikayat ya baggi na, turiyan na y Afu Dios gafu ta mari na tumuluk kan ya dorob na, gafu ta kakurruan na, mari na makua. 8En ira nay nga mattolay segun kan ya ikayat ya gibbaggian da, mari ra mapayayat y Afu Dios. 9Ngam mari tera mattolay segun kan ya ikayat ya gibbaggian tera nu azzi segun kan ya ikayat ya Espiritu Santo, nu kurug nga makipaddian ya Espiritu Santo kan ittera. Ya innia laman nga awan kan iggina ya Espiritu Santo, mari na kua y Cristo. 10Ngam gafu ta makipaddian y Cristo kan ittera, maski kuenta natay ya gibbaggian tera megafu kan liwat, matolay ya gikkaralluan tera megafu kan kinatunung. 11Nu makipaddian kan ittera ya Espiritu y Afu Dios nga namaginnolay kan y Jesu Cristo, y Afu Dios nga namaginnolay kan y Jesu Cristo, iddannan na pay kan angat ya matay nga gibbaggian tera megafu kan ya Espiritu na nga makipaddian kan ittera. 12Gafu ta kunna tian, wawwahik ira, hinnian/asan annungan tera, ngam bakkan kan ya gibbaggian tera ya pangannungan tera nga mattolay segun kan ya ikayat da. 13On, gafu ta, nu mattolay kayu segun kan ya ikayat ya gibbaggian nu, matay kayu mamba. Ngam nu memmang kayu nga maka-angngua kan ya ikayat ira ya gibbaggian nu megafu kan ya uffun ya Espiritu Santo nga arig patayan nu ira yan, matolay kayu. 14Ngammin ya totolay nga igiggiya ya Espiritu Santo, ira ya anak y Afu Dios. 15Ya Espiritu Santo nga nalawat nu, mari na kayu uli ipakohung kan talaw, nu azzi pinabbalin na kayu kan anak y Afu Dios, en megafu kan iggina, awayya tera nga akkulan y Afu Dios kan "Ama, Ama." 16Mismu ya Espiritu Santo en ya gikkaralluan tera pay, mattaradday ra nga mattestigu nga anak y Afu Dios ittera. 17En gafu ta anak na ittera, meddan kan ittera ya netabba ira y Afu Dios. Megitta tera kan y Jesu Cristo nga meddannan kan ira yan, basta makipazziyariyat tera kan iggina, tase mesipat tera pay kan ya kedayarayaw na. 18Ya azziyariyat tera kannia attolotolay tera kan yaw nga mundo, ibilang ku kan mari mepangngat nga meparig da kan ya kedayaw nga kesipattan tera nattaruk. 19Ya naparatu, mattalattaron nga iggalayan na ya angngipakammu y Afu Dios kan ya anak na ira. 20On, gafu ta, ya naparatu, dana napatuluk nga nabbalin kan awan na nga serbi, mari megafu kan ya uray na pe laman, nu azzi megafu kan ya uray y Afu Dios. Ngam hinnian peba innanama, 21iggina yaw, mismu ya naparatu, masueltan nattaruk kan ya kavurut na nga nakohungan na, en mesipat nattaruk kan ya mekapalat nga kasuelta ya anak ira y Afu Dios. 22On, gafu ta ammu tera nga addet kan sangaw, ngammin ya naparatu ira, paraparehu ra nga maddahadahin nga megitta kan babay nga maddaggun nga mattuliwan/mappasikal. 23Mari na kan ya naparatu laman ya maddahadahin, nu azzi maski ittera mismu pay nga pakipaddianan ya Espiritu Santo nga kuenta unna nga regalu y Afu Dios kan ittera, maddahin tera kan ya kononaggan tera nga aggataron kan ya kepasingan tera kan anak y Afu Dios, yan ya katalibahu ya gibbaggian tera. 24On, gafu ta, kan yaw nga innanama tera, napalliad tera. Ya innanama nga masingan, mari na kurug nga agginnanama. On, gafu ta, innia ya manginnanama kan ya aggasinnan nan? 25Ngam nu innanaman tera ya mari tera masingan, pasapasensian tera nga taronan. 26Kunna tian pay, uffunan ya Espiritu Santo ittera kan ya pakkafiyan tera. On, gafu ta mari tera ammu ya maddasal kan ya kepangngattan na, ngam mismu ya Espiritu Santo, idarahin na nga idasadasal ittera kan mari mekahi kan ergo tolay. 27Y Afu Dios nga makakammu kan ya giffutuan ya totolay, anahutan na ya hinnian kan ya panonot ya Espiritu Santo, gafu ta idasadasal na ya totolay y Afu Dios segun kan ya uray y Afu Dios. 28Ammu tera nga iyusa y Afu Dios ngammin ya mesissimmu para kan ya pammakapianan ya innia laman nga mangayat kan iggina, nga inakkulan na kan kua na segun kan ya pinalano na kattun. 29Ya totolay nga dana ammu na, dana zinisidi na pay nga mabbalin da kan megitta kan ya Anak na, tase awayya na nga iggina ya mekakua nga paluntarad kan ya napakaru nga maggurwahi. 30Ya totolay nga dana zinisidi na nga mabbalin kan kunna tian, inakkulan na; en ya inakkulan na ira, nebilang na kan natunung; en ya nebilang na ira kan natunung, nesipat na kan ya kedayaw na. 31Megafu kan ngammin ira yan, hanna gafen ya makahi tera? Gafu ta hinnian y Afu Dios kan ittera, innia peba ya maka-awayya nga mangontra kan ittera? 32Maski ya mismu Anak na, mari na nekani kan patay, nu azzi netuluk na nga napatay para kan ittera ngammin, yammanno gafen ya angngiddan na pay kan ngammin nga ganagannud kan ittera kan kagitta ya nepangngiddan na kan iggina kan ittera. 33Innia ya mamaliwat kan ya totolay nga pinili y Afu Dios? Mismu iggina ya mangibilang kan natunung tera. 34Innia gafen ya makakondena kan ittera? Mari kuan y Jesu Cristo yan, gafu ta natay iggina para kan ittera, en mas peba kan yan, napaginnolay, en hinnian iggina kan ya ziwanan y Afu Dios, en makimemallak iggina para kan ittera kannay. 35Hanna gafen ya makegungay kan ittera kan ya ayat y Cristo? Awayya na kazze nga gulugulu? Ziyariyat? Katattazzi? Bisin? Kakurang kan sinnun? Kapeligro? onu Kapatay? 36Kunna kan ya Sagrado nga Turak. "Para laman kan ikaw, patapatangalgaw nga mappeligro kami kan patay, en nebilang kami kan kagitta karneru nga maparti." 37Mari ra awayya nga igungay ittera kan ya ayat na! Ngam kan ngammin ira yan nga mesissimmu kan ittera, mangaffut tera nga mangaffut megafu kan y Jesu Cristo nga mangayat kan ittera. 38Siguraduan ku yaw: maski ya patay onu katolay, onu anghel ira, onu ya hinnian paka-awayya ra, onu ya hinnian pakapangngua ra, onu ya maddaggun ira onu mappanget ira nga mesissimmu, 39onu ya hanna laman nga hinnian kan utun onu kan gukab, onu ya hanna laman nga naparatu, mari ra megungay ittera kan ya ayat y Afu Dios kan ittera nga neddan na kan ittera megafu kan y Afu tera nga Jesu Cristo.

will be added

X\