Roma 6

1Hanna gafen ya kayan tera? Massigisige tera kazze/pano nga malliwat tase mas dumakal ya allak y Afu Dios kan ittera? 2Mari na awayya. Ittera nga kuenta natay nga nasueltan kan liwat, annianna/kunnasi/manna ya assige tera nga malliwat? 3Mari nu kazze ammu nga ittera ngammin nga nabawtisowan nga netadday kan y Jesu Cristo, nabawtisowan tera pay nga nesipat kan ya nepappatay na? 4Kannia nekabawtiso tera, kuenta netangetanam tera kan iggina kan ya nepappatay na, tase megitta kan ya nepagginnolay y Cristo megafu kan ya kekapalat y Dios Ama, kunna tian pay awayya na nga mattolay tera kan bahu nga attolay. 5On, gafu ta, nu netadday tera kan iggina kan ya negittan ya nepappatay na, kunna tian pay, siguradu nga mapaginnolay tera nattaruk kan kagitta ya nepagginnolay na. 6Ammu tera nga, ya katakatolay tera kallie tera nga nangurug, kuenta netangepatak kan y Cristo kan kurut, tase madaral ya pakapangngua ya narakat/napot nga akkelug nga hinnian/asan kan ya gibbaggian tera, senannu mari teran nga maka-angngua kan liwat nga arig nakohung tera kan liwat. 7Ya tolay nga natay, nasueltan kan ya paka-awayya ya liwat. 8Ngam nu netangepatay tera kan y Cristo, kurruan tera nga makipattolay tera pay kan iggina. 9Ammu tera nga napaginnolay y Cristo, en mari na uli matay ngin. Awan ngin nga paka-awayya ya patay kan iggina. 10Nu me-annung kan ya nepappatay na, missa laman nga natay iggina megafu kan ya liwaliwat ya totolay, en mari na uli matay ngin, ngam massige iggina nga matolay para kan y Afu Dios. 11Kunna tian pay gafen, ibilang nu zinan nga natay kayun nga nasueltan kan ya paka-awayya ya liwat, ngam matolay kayu para kan y Afu Dios megafu kan ya neketadday nu kan y Jesu Cristo. 12Gaggafen, mari nu ituluk ngin nga mammoray ya liwat kan ya gibbaggian nu nga matay mamba, tase mari nu vulunan ya narakat nga akkelug da ira. 13Mari nu ituluk ya parte ira ya gibbaggian nu nga malliwat nga arig rumienta ya dakkut, nu azzi ituluk nu ikayu kan y Afu Dios nga totolay na nga kuenta natay kattun, ngam napaginnolay en ituluk nu pay ya parte ira ya gibbaggian nu kan iggina nga arig rumienta kinatunung. 14Awan ngin nga paka-awayya ya liwat kan ikayu gafu ta awan kayun kan ya paka-awayya ya dorob, nu azzi hinnian kayun kan ya paka-awayya ya allak y Afu Dios. 15Sangaw, hanna gafen ngin? Massige tera kazze peba laman nga malliwat gafu ta hinnian teran kan ya paka-awayya ya allak y Afu Dios, en awan teran kan ya paka-awayya ya dorob? Mari na awayya. 16Mari nu kazze ammu nga, nu ituluk nu ya gibbaggian nu nga makikohung nga mamaraparulot kan ya isa, kohung na kayu ya paraparulotan nu? Nu liwat ya pakikohungan nu, patay ya pattumpalan nu. Nu ammarulot ya pakikohungan nu, kinatunung ya pattumpalan nu. 17Ngam mappabalat tera kan y Afu Dios gafu ta, maski kohung na kayu ya liwat kattun, nabbalin kayun kan minammarulot kan ya tuldu y Afu nga nepakammu kan ikayu. 18Nasueltan kayun kan ya paka-awayya ya liwat, en kuenta nabbalin kayun kan kohung ya kinatunung. 19Iyangngarig ku yan kan ya negagangay nga pasan ya totolay, gafu ta tolay kayu laman. Netuluk nu ya parte ira ya gibbaggian nu kattun nga arig kohung da kayu ya nadaping en ya aggaru ya kinadakkut nu, en kunna tian pay kan sangaw, ituluk nu ya parte ira ya gibbaggian nu nga arig kohung na kayu ya kinatunung tase mas mabbalin kayu kan nasantuan. 20Kattu kohung na kayu ya liwat, awan nga annungan nu nga mangngua kan kinatunung. 21Hanna gafen ya pammakapianan nu kan ira nay nga ganagannud nga kinikkingngua nu kattun nga ipasiran nu kan sangaw? On, gafu ta, ya pattumpalan ira yan nga ganagannud, ipappatay. 22Ngam ya maddaggun nga situasion nu, nasueltan kayun kan ya liwat, en nabbalin kayun kan kohung y Afu Dios, en ya pammakapianan nu, nabbalin ya attolay nu kan nasantuan nga manamfut kan angat nga awan na nga panda. 23On, gafu ta, ya balat ya alliwat, ipappatay; ngam ya mari kapagapagan nga regalu nga iddan y Afu Dios, angat nga awan na nga panda megafu kan ya neketadday tera kan y Afu tera nga Jesu Cristo.

will be added

X\