Roma 5

1Nanawag gafen nga nebilang kan natunung tera megafu kan ya angngurug tera, en napia ngin ya relasion tera kan y Afu Dios megafu kan y Afu tera nga Jesu Cristo. 2Megafu kan iggina en kan ya angngurug tera kan iggina, nakaranni tera kan y Afu Dios megafu kan ya inaggallallak na nga mapasapasan tera, en mayayat megafu kan ya innanama tera nga isipat na ittera kan ya kedayaw na. 3Bakkan kan yan laman, nu azzi mayayat tera pay megafu kan ya azziyariyat tera gafu ta ammu tera nga ya resulta na, pappasensian na ittera. 4En nu napasensia tera, napurba ya katakatolay tera. En nu napurba ya katakatolay tera, hinnian/asan innanama tera. 5En awan nga kelohotan tera kan ya agginnanama tera, gafu ta ne-aluhu y Afu Dios ya ayat na kan ya giffutuan tera megafu kan ya Espiritu Santo nga neddan na kan ittera. 6Gaggafen, kattu awan tera nga makua nga makapalliad kan ittera pe laman, natay y Cristo kan ya fustu nga tiempo para kan ya totolay nga manuriya kan y Afu Dios. 7Talataggit nga hinnian tolay nga mangipamavulun kan ya kapatay na para kan ya isa nga natunung nga tolay. Ngam awayya na maffugab hinnian tolay nga mangigutuk/mangiturid/mangitaggad nga mangipamavulun kan ya kapatay na para kan ya isa nga napia nga tolay. 8Ngam y Afu Dios, nepasingan na ya kuru dakal nga ayat na kan ittera kan yaw nga nepakua na, kattu minalliwat tera peba, natay y Cristo para kan ittera. 9En sangaw, gafu ta nebilang kan natunung teran megafu kan ya daha na nga natturut kattu natay iggina kan kurut, yammanno ya kapalliad tera kan ya lussaw y Afu Dios megafu kan iggina. 10On, gafu ta, kattu kontra y Afu Dios ittera, pinabbalin na ittera kan kakkofun na balalaman megafu kan ya nepappatay ya Anak na, yammanno ya kapalliad tera, nga napabbalin kan kakkofun na, gafu ta siggamatolay iggina. 11Ngam mari na kan yan laman; mayayat tera pay kan ya kiningngua y Afu Dios megafu kan y Afu tera nga Jesu Cristo nga namabbalin kan ittera sangaw kan kakkofun y Afu Dios. 12Hinnian liwat kan ya utun lusak megafu kan ya isa nga tolay, y Adan, en hinnian pay ipappatay megafu kan ya liwat. En luminabbet ya ipappatay kan ngammin nga totolay gafu ta nalliwat da ngammin. 13On, gafu ta, kallie ya nepangngiddan y Afu Dios kan ya dorob na, nakkaliwat da, ngam nu awan nga dorob, awan nga mebilang kan liwat. 14Maski kurug yan, ngammin ya totolay, namegafu kan y Adan addet kannia nepangngiddan na kan ya dorob na kan y Moises, maski mari ra nalliwat kan kagitta ya nepalliwat y Adan, natay ra balalaman. Kinahi y Afu Dios kattun nga hinnian bonan na kan ya utun lusak, en hinnian ke-angngarrian y Adan kan iggina. 15Ya mari kapagapagan nga regalu y Afu Dios, kuru neruma kan ya nepannuriya y Adan. Napakaru ya nakkakatay ira megafu kan ya nepannuriya ya isa nga tolay, ngam mas dakal peba ya allak y Afu Dios en ya regalu nga iddan na kan napakaru nga totolay megafu kan ya allak ya isa nga tolay, iggina y Jesu Cristo. 16En ya regalu y Afu Dios, neruma kan ya liwat ya isa nga tolay. On, gafu ta, megafu kan ya missa nga nepalliwat y Adan, hinnian ammanunut, en kakondena ya resulta na, ngam megafu kan ya mari kapagapagan nga regalu y Afu Dios, awayya na nga mebilang kan natunung ya totolay maski napakaru ya liwaliwat da. 17Megafu kan ya nepannuriya ya isa nga tolay kan ya mandu y Afu Dios, matay ya totolay megafu kan iggina. Ngam mas peba matolay nga mammoray ya mangalawat ira kan ya mari magukugukud nga allak y Afu Dios en ya regalu nga kebilang tera kan natunung megafu kan ya isa nga tolay, iggina y Jesu Cristo. 18Nakondena ngammin ya totolay megafu kan ya nepannuriya ya isa nga tolay. Kunna tian pay, masueltan en matolay ngammin ya totolay megafu kan ya natunung nga kiningngua ya isa pay nga tolay. 19On, gafu ta napabbalin ya maru kan minalliwat megafu kan ya zi nepammarulot ya isa nga tolay, en kunna tian pay, mapabbalin ya maru kan natunung megafu kan ya nepammarulot ya isa pay nga tolay. 20Neddan y Afu Dios ya dorob na tase pakarruan na ya annuttutturiya. Kannia nepaggaru ya annuttutturiya, mas ziminakal peba ya allak y Afu Dios. 21Matay ngammin ya totolay megafu kan liwat nga arig mammoray kan ittera kannia appatay tera. Kunna tian pay, awayya na nga kuenta mammoray ya allak y Afu Dios kannia angngibilang na kan natunung ya totolay, en matolay tera kan awan na nga panda megafu kan y Afu tera nga Jesu Cristo.

will be added

X\