Roma 4

1Nu me-annung kan yan nga gannud, hanna ya makahi tera me-annung kan y Abraham nga mekakua nga ginafu mi nga Judio? 2Kakurruan na, nu nebilang zinan y Abraham kan natunung megafu kan ya nepammaraparulot na kan ya bilin y Afu Dios, hinnian/asan zinan iparayag na. Ngam mari na awayya nga napparayag kan ya atubang y Afu Dios. 3Kunna kan ya Sagrado nga Turak, "Kinurug y Abraham y Afu Dios, en megafu kan ya nepangngurug na, nebilang y Afu Dios kan natunung iggina." 4Ya tolay nga mattrabahu, matandanan, ngam ya tandan na, mari mekuenta kan regalu, nu azzi mepangngat nga paga na. 5Ngam ya tolay nga mari makaparulot kan ngammin nga dorob y Afu Dios, nu azzi kurruan na y Afu Dios nga mangibilang kan natunung ya totolay nga mari natunung nga mangurug kan iggina, mebilang kan natunung yan nga tolay megafu kan ya angngurug na. 6Megitta kan yan pay ya ikayat nga kayan y David nga patul en profeta kattun kattu kinahi na nga mabendisionan ya tolay nga ibilang y Afu Dios kan natunung, maski mari na pinaraparulot ya dorob. Kunna tiaw ya neturak na, 7"Mabendisionan ya totolay nga napakoma ya narakarakat nga kinikkingngua ra en natakkuban ngin ya liwaliwat da. 8Mabendisionan ya tolay nga mari dandamman ngin y Afu Dios ya liwaliwat na." 9Yan nga kabendision nga kinahi y David, para kan ikami laman kazze nga nakugit onu para kan ikayu pay nga mari nakugit? Umanahut tera mamba nga kurug yaw nga neturak kattun, "Nebilang y Afu Dios kan natunung y Abraham megafu kan ya angngurug na." 10Kannia ya nekebilang kan natunung iggina, kallie ya nekakugit na onu kabalin na? Kallie ya nekakugit na, mari kan kabalin na. 11Nakugit iggina nga kuenta sennial en pamakurug kan ya nekebilang kan natunung iggina megafu kan ya angngurug na nga hinnian kan iggina kattu mari na peba nakugit. Megafu kan yan, nabbalin iggina kan kuenta ama ngammin ya mari nakugit ira nga mangurug, en mebilang gafen kan natunung da. 12Kunna tian pay, mebilang iggina kan ama mi ngammin nga nakugit nga mamuluvulun pay kan ya ehemplo ya angngurug na nga ginafu mi nga hinnian kan iggina kallie ya nekakugit na, en mari kan ya nekakugit mi laman ya kegittan mi kan iggina. 13Netabba y Afu Dios kan y Abraham en kan ya gakagaka na nga meddan kan ira ya interu mundo. En yan nga nepangngitabba na, mari megafu kan ya nepammaraparulot y Abraham kan ya bilin na, nu azzi megafu kan ya angngurug na nga negafanan ya nekebilang kan natunung iggina. 14Ya mamaraparulot ira kan ya dorob na, nu ira nay laman ya meddannan kan ya netabba na, mabbalin kan awan nga serbi ya angngurug ya innia laman nga tolay, en awan nga kuenta ya netabba y Afu Dios. 15Ya dorob, palattuaran na ya lussaw y Afu Dios. Ngam nu awan nga dorob, awan nga annuriya pay. 16Megafu kan ira yan, zinisidi na nga iddan na ya netabba na kan ittera megafu kan ya angngurug tera, tase awayya na nga maddepende ya katumpal ya netabba na kan ya allak na, en mepasiguradu kan ngammin nga mebilang kan gakagaka y Abraham, mari laman kan ikami nga Judio nga nangiddannan na kan ya dorob na, nu azzi kan ngammin nga totolay pay nga mangurug kan kagitta ya angngurug y Abraham nga kuenta ama tera ngammin nga mangurug. 17On, gafu ta, kan ya Sagrado nga Turak, kunna y Afu Dios, "Pabbalinan ta ka kan ama ya aru nga nasion." Kattu netabba na yan kan y Abraham, hinnian iggina kan ya atubang y Afu Dios nga kinurug na, nga mamaginnolay kan ya nakkakatay ira en mamalattuad kan ganagannud nga awan. 18Megafu kan ya innanama na kan ya netabba y Afu Dios kan iggina, maski kontra kan ya negagangay nga pabbaseyan ya totolay kan ya innanama ra, nesige na nga kinurug nga mabbalin iggina kan kuenta ama ya aru nga nasion, gafu ta yaw ya kinahi y Afu Dios kan iggina nga kunna, "Megitta kan yan pay ya karu ya gakagakam nattaruk." 19Mari nakkafi ya angngurug na, maski pinalappanonot na ya baggi na pe laman nga kuenta natay ngin gafu ta gunese matut ya dahun nan en ya baggi y Sara nga atawa na nga lupat en babakat ngin. 20Mari na nadduda, en mari na nemmang nga nangurug kan ya netabba y Afu Dios kan iggina, nu azzi mas nassikan ya angngurug na nga zinayarayaw na y Afu Dios. 21Kuru siniguradu na nga hinnian pakapangngua y Afu Dios nga mangngua kan ya netabba na. 22Yan ya gafu na kan nebilang y Afu Dios kan natunung iggina, megafu kan ya angngurug na. 23Ngam yaw nga kinahi na nga me-annung kan y Abraham, "Nebilang kan natunung iggina," neturak yaw, mari kan para kan iggina laman, 24nu azzi para kan ittera pay. Mebilang kan natunung tera megafu kan ya angngurug tera kan y Afu Dios nga namaginnolay kan y Afu tera nga Jesus 25nga napatay megafu kan ya liwaliwat tera en napaginnolay tase mebilang tera kan natunung.

will be added

X\