Roma 15

1Ittera nga nasikan kan pangurug, mawag kan pasensian en uffunan tera ya wawwahi tera nga nakafi peba ya angngurug da. Mari na kan ya gibbaggian tera laman ya panonotan tera, 2nu azzi panonotan ya kada isa kan ittera ya pammakapianan ya kagitta tera kan pangurug tase dumakal ya angngurug da. 3On, gafu ta mari pinanonot y Cristo ya pammakapianan na pe laman, nu azzi natumpal kan iggina yaw nga neturak kan ya Sagrado nga Turak nga kunna, "O Dios, ya angnguyu-uyaw ya totolay nga manguyu-uyaw kan ikaw, attamman ku nga kuenta panguyu-uyaw ra kan yakan." 4Ngammin ya neturak kattun kan ya Sagrado nga Turak, neturak tase metuldu kan ittera pay, senannu awayya na nga hinnian/asan innanama tera megafu kan ya appasapasensia tera en megafu kan ya kapagapagutuk/kapatapaturid/kapatapataggad tera nga maggafu kan ya Sagrado nga Turak. 5En y Afu Dios nga mappapasensia en mamagapagutuk kan ittera, pare zinan ta pabbalinan na kan makkara-ana-anahut kayu kannia ammaraparig nu kan y Jesu Cristo, 6tase mapakesa ya ginnonotan nu, en awayya nu nga mattangesa nga maddayarayaw kan y Afu Dios nga Ama y Afu tera nga Jesu Cristo. 7Gaggafen, makkara-ala-alawat kayu kan kagitta ya nepangngalawat y Cristo kan ikayu, tase madayarayaw y Afu Dios. 8Kayan ku kan ikayu nga kuan nu yan gafu ta nabbalin y Cristo kan serbidor mi nga Judio nga pangipasingannan na nga makurug y Afu Dios, tase tumpalan na ya netabba y Afu Dios kan ya ginafu mi ira kattun, 9en tase ikayu nga mari Judio, dayarayawan nu pay y Afu Dios megafu kan ya allak na kan ikayu. Kunna kan ya Sagrado nga Turak, "Megafu kan yan, dayarayawan ta ka kan ya dian ya mari Judio ira, en ikansion ku ya addayarayok kan ya Ngahan mu." 10En neturak na peba kan isa nga lugar nga kunna, "Ikayu nga mari Judio, makipaggaragarassia kayu kan ya totolay y Afu Dios." 11En neturak na pay kan isa nga lugar nga kunna, "Ikayu ngammin nga mari Judio, dayarayawan nu y Afu Dios, ikayu ngammin nga totolay, dayarayawan nu iggina." 12En neturak y Isaias pay nga kunna, "Hinnian nattaruk tolay nga me-anak kan ya gakagaka y Jesse nga me-atanang nga mabbalin kan mammoray kan ya mari Judio ira, en iggina ya panginnanaman ya mari Judio ira." 13Sangaw, y Afu Dios nga paggafanan ya innanama tera, pare zinan ta pannuan na kayu kan payayat en imamak megafu kan ya angngurug nu kan iggina, tase dumakal ya innanama nu megafu kan ya pakapangngua ya Espiritu Santo. 14Siguradu nak mismu me-annung kan ikayu, wawwahik ira, nga napannu kayu kan napia, en hinnian kan ikayu ngammin ya fustu nga pakakammu, en awayya nu ya makkaratabatabarang. 15Ngam maski nu kunna tian peba, nagutugutuk nak nga natturak kan ikayu kan me-annung kan ya dudduma/karruan nga ganagannud nga neparandam ku kan ikayu kan yaw nga turak. Kiningnguak yan megafu kan ya allak y Afu Dios nga neddan na kan yakan, 16tase pabbalinan nak kan serbidor y Jesu Cristo para kan ikayu nga mari Judio kannia angngipalapalappat ku kan ikayu kan ya napia nga dumug nga naggafu kan y Afu Dios, senannu mabbalin ya ke-ofresi/kededika nu nga mari Judio kan makapayayat kan y Afu Dios, ofresi nga pabbalinan ya Espiritu Santo kan nasantuan. 17Gaggafen, megafu kan ya neketaddek kan y Jesu Cristo, awayyak nga ilagaw ya trabahuk nga masserbi kan y Afu Dios. 18On, gafu ta awan nga tanakkuan nga iturak ku nu azzi ya kinikkingngua y Cristo nga nangiyusa kan yakan, tase mabensik ya mari Judio ira nga paraparulotan da ya ergo na. Kiningnguak yan kan ergo en kan pangapangngua 19kan ya pakapangngua ya mekapalat nga milagro ira nga sennial ya pakapangngua ya Espiritu Santo nga makipaddian kan yakan. Ya resulta na, nepalapalappat ku ya napia nga dumug kan ngammin nga lugar ira namegafu kan Jerusalem addet kan ya probinsia ya Ilirico. 20Ikayat ku ya umang mangipalappat kan ya napia nga dumug, mari kan ya lugar ira nga nekayanan ngin ya ngahan y Cristo, tase marik metadday kan ya pattrabahuan ya isa nga tolay nga alale mamatadag nak kan balay kan ya fundasion nga nekkua/neppay na. 21Kunna kan ya Sagrado nga Turak, "Ira nay nga awan peba nadumug da kan me-annung kan iggina, masingan da nattaruk, en ira nay nga awan peba nagina ra kan me-annung kan iggina, mantindian da nattaruk." 22Yan ya gafu na nga, addet kan sangaw, naming aru nga natalantan nak nga umang kan ikayu. 23Ngam sangaw, gafu ta awan ngin nga lugar kan yaw nga parte ya mundo nga marik nangipalappatan kan ya napia nga dumug, en gafu ta kan aru nga dahun ngin, kuru ikayat ta kayu nga umang innan, 24planowan ku nga kuan yan so nu annak kan ya nasion ya Espania. Ikayat ku ya massibal/maddahat kan ya dian nu nga mabbisita kan ikayu, tase mapayayat nak kan ya kasan ku kan ikayu kan pia nga algaw, en kabalin na, napia nu uffunan dak kannia aggannukat ku nga umang kan Espania. 25Ngam sangaw, angkami bitan kan ya siudad ya Jerusalem, tase iyangay mi ya kuartu nga uffun para kan ya totolay y Afu Dios kannay. 26On, gafu ta, ya wawwahi tera kan pangurug kan ya iglesia ira kan ya probinsia ya Macedonia en ya probinsia ya Acaya, na-ayat da nga mangiddan kan uffun kan ya pobre ira nga totolay y Afu Dios kan Jerusalem. 27Kiningngua ra yan gafu ta nekayat da. Ngam kakurruan na, annungan da ya manguffun kan ira. Gafu ta nesipat ya mari Judio ira kan ya na-espirituan nga bendision ira ya Judio ira, napia nu uffunan da ya Judio ira kan ya namateriyalan nga ganagannud. 28So nu mabalin ku yaw nga kuan ku, en ya kuartu nga kinolekta mi, iyalawat ku kan ya lalakay ira nga panakallan kan ya iglesia kan Jerusalem, massibal nak kan ikayu kannia aggangek kan Espania. 29En ammuk nga, so nu makakaddet nak kan ikayu, awan nga kurang ya bendision nga iddan y Cristo kan ittera kannia kasan ku kan ikayu. 30Megafu kan y Afu tera nga Jesu Cristo, en megafu kan ya ayat nu kan yakan nga neddan ya Espiritu Santo kan ikayu, ipakimallak ku kan ikayu, wawwahik ira, nga mesipat kayu pay kan yakan nga mangidasadasal kan yakan kan napafutu kan y Afu Dios, 31en idasal nu nga mapalliad nak kan ya maddian ira kan Judea nga mari mangurug kan y Jesus, en kan mapayayat ya totolay y Afu Dios kan Jerusalem nga mangalawat kan ya uffun nga iyangay mi kan ira nga yan ya asserbi mi kan ira. 32Kabalin na, nu uray y Afu Dios, mayayat nak nga umang kan ikayu, en mabannayan nak nga mabbisita kan ikayu. 33Pare zinan ta hinnian kan ikayu y Afu Dios nga paggafanan ya imamak tera. Amen.

will be added

X\