Roma 11

1Gaggafen, povutan ku, pinakimorrian kazze/pano y Afu Dios ya totolay na? Awan! Yakan mismu, isa nak nga Israelita, nga isa kan ya gakagaka y Abraham, en isa pay kan ya tribu y Benjamin. 2Mari pinakimorrian y Afu Dios ya totolay nga pinili na kattun. Mari nu kazze ammu ya kayan ya Sagrado nga Turak kattun nga me-annung kan y Elias nga nedasal na kan y Afu Dios yaw nga mekontra kan ya Israelita ira? Kunna: 3"Afu, pinatapatay ra ya profetam ira, en zinaral da ya angngiyofresian/angngidedikan da ira kan ayam ira kan ikaw. Yakan laman ngin ya natalan/nabattang, en ikayat dak pay nga patayan." 4Ngam hanna ya netabbag y Afu Dios kan iggina? "Piturivu nga lallaki ya nelinnek, ira ya mari peba nappalentud nga naddayarayaw kan y Baal." 5Megitta kan yan pay kan sangaw nga tiempo, hinnian/asan Israelita ira nga natalatalan/nabattabattang nga pinili y Afu Dios megafu kan ya allak na. 6Ngam ya ammili na, nu megafu kan ya allak na, mari na gafen kan megafu kan ya angnga-angngua ya tolay kan napia. On, gafu ta, ya kapili ya innia laman, nu megafu kan ya angnga-angngua na kan napia, mari allak ya allak y Afu Dios ngin. 7Hanna gafen? Mari natafulan ya Israelita ira ya tafatafulan da. Ngam hinnian dudduma/karruan kan ira nga pinili y Afu Dios; en natafulan da. Ngam ya dudduma, nanaggat ya giffutuan da. 8Kunna kan ya Sagrado nga Turak, "Iniddannan y Afu Dios ira kan giffutuan nga awan da nga pattatenap, gimmatan nga mari makasingan en giddaranggangan/gittalingan nga mari makagina addet kan sangaw nga algaw." 9En yaw pay ya kinahi y Patul David, "Ya makan kan ya lamesa ra, mabbalin zinan kan manilu en manggafut kan ira en kesikadulan en kabalattan da. 10Maddaram zinan ya gimmatan da tase mari ra makasingan, en kanakanayun nga paddungkuhan mu ira kan ya azziyariyat da." 11Gaggafen, povutan ku, nesikadul kazze ya Israelita ira tase matomba ra? Awan! Ngam megafu kan ya nepalliwat da, awayya na pay nga mapalliad kayu nga mari Israelita, en ya resulta na, passilan da kayu. 12Ya nepalliwat ya Israelita ira, nu yan ya negafanan ya nekabendision ya totolay kan ya mundo, en ya zi ra nepangngurug kan ya napia nga dumug, nu yan ya negafanan ya nekabendision nu nga mari Israelita, yammanno ya kabendision tera ngammin nattaruk nu fustu ya karu ra nga mangurug kan y Jesus. 13Sangaw, hinnian kayan ku kan ikayu nga mari Israelita. Apostol nak nga nabon kan ikayu, en ilagok ya trabahuk, 14tase, nu awayya na, pamassilan ku ya kagittak nga Israelita ira, senannu hinnian dudduma kan ira nga mapalliad. 15Ya neke-ammari ra, yan ya negafanan ya nekapabbalin ya totolay kan ya mundo kan kakkofun y Afu Dios. Hanna gafen ya kebalinan ya kalawat da nu mari na kan ya agginnolay ya nakkakatay ira? 16Nu neddan kan y Afu Dios ya unna nga pakkal/fukkal ya masa, kuenta neddan pay ya interu nga masa. En nu neddan kan iggina ya gamut ya isa nga kayu, kuenta neddan pay ya pangapanga na. 17Ngam natappang ya dudduma nga pangapanga na, en ikayu nga pangapanga ya kayu nga nororay nga nattuhu, netuvvud kayu kan ya bikat ya pangapanga na pe laman, en mesipat kayu kan ya pammakapianan nga maggafu kan ya fungut. 18Mari nu mallagalagaw nga mas atanang ya kekuentan nu annek/ngam kan ya pangapanga nga natappang. Ngam nu mallagalagaw kayu, dandamman nu nga bakkan kan ikayu ya manolay kan ya gamut, nu azzi ya gamut ya manolay kan ikayu. 19Kunnu mamba nga makkahi, "Hinnian pangapanga nga natappang tase metuvvud kami." 20Kurug yan. Natappang da megafu kan ya zi ra nepangngurug, ngam massige kayu kan ya nallugaran nu megafu kan ya angngurug nu. Mari nu mallagalagaw gafen, nu azzi memmuhud kayu. 21Gafu ta mari kinengan y Afu Dios ya pangapanga ya kayu pe laman, nanawag nga mari na kayu kengan pay. 22Yaw gafen ya ikkua/ippay tera kan ya ginnonotan tera me-annung kan ya allak en ya kestrikto y Afu Dios. Istrikto iggina kan ya totolay nga mari mangurug, ngam ikallak na kayu basta massige kayu nga mammakatalak kan ya allak na. Nu awan, matappang kayu pay. 23En ya dudduma, awayya ra nga uli metuvvud nu mari ra isige ya zi ra angngurug, gafu ta awayya uli ituvvud y Afu Dios ira. 24On, gafu ta, ikayu nga mari Israelita nga kuenta pangapanga nga natappang kan kayu olivo nga nororay nga nattuhu, nu netuvvud kayu kan ya kayu nga nemula, maski mari negagangay yan nga makua, yammanno ya uli ketuvvud ya pangapanga na pe laman nga natappang kan ya fungut da pe laman. 25Sangaw, wawwahik ira, hinnian sekreto nga ikayat ku nga ipakammu kan ikayu nga mari Israelita, tase mari nu abbattan nga masirib kayu. Iggina yaw, nataggat ya ginnonotan ya dudduma nga Israelita addet zi fustu nattaruk ya karu ya bilang nu nga mari Israelita nga mapalliad. 26Kabalin na, mapalliad ngammin ya Israelita ira. Kunna kan ya Sagrado nga Turak, "Maggafu nattaruk ya Mamalliad kan Sion, en azzan na ya dakkut kan ya gakagaka y Jacob. 27En yaw ya taratuk kan ira nattaruk nu pakoman ku ya liwaliwat da." 28Nu me-annung kan ya napia nga dumug, ya Israelita ira, nabbalin da kan kontra y Afu Dios, en nesimmu yan kan ira para kan ya pammakapianan nu nga mari Israelita. Ngam nu me-annung kan ya nekapili ra kan totolay na, megafu kan ya ginafu ra, iddukan na ira balalaman. 29On, gafu ta mari pollianan y Afu Dios ya hinnian kan ya nonot na nga me-annung kan ya pillian en bendisionan na ira. 30Ikayu nga mari Israelita, mari nu nangurug kan y Afu Dios kattun, ngam kan sangaw, nekallak na kayu megafu kan ya zi nepammarulot ya Israelita ira. 31Kunna tian pay, mari ra mamarulot kan sangaw, en ya pattumpalan na, ikallak na ira pay nattaruk megafu kan ya angngikallak na kan ikayu. 32Pinabbalin y Afu Dios ngammin ya totolay nga kuenta presu kan ya zi ra nepammaraparulot, tase awayya na nga ikallak na ira ngammin. 33O, avva/hanna ma ya kadakal ya sirib en ya pakakammu y Afu Dios! Mari membistigan ya kegafanan ya plano na ira, en mari matafulan ya angngua na kan ya uray na. 34"Innia ya makakammu kan ya nonot y Afu Dios? Innia ya nattabarang kan iggina?" 35"Innia ya nonna nga nangiddan kan hanna laman kan iggina, tase mawag kan balattan na iggina?" 36Ngammin nga ganagannud, y Afu Dios ya namaratu en ya mappanayun kan ira, en hinnian da tase sesserbian da iggina. Madayarayaw iggina kan awan na nga panda. Amen.

will be added

X\