Roma 10

1Wawwahik ira, ya ikayat ya futuk en ya idasadasal ku kan y Afu Dios, ya kapalliad ya kasijudiok ira. 2Awayyak nga testiguan nga ikakayat da nga sesserbian y Afu Dios, ngam ya assesserbi ra, mari segun kan ya kurug nga pakakammu. 3Ikayat ku nga kayan, gafu ta mari ra ammu ya angngibilang y Afu Dios kan natunung ya totolay, en gafu ta sinafataful da ya kebilang da kan natunung megafu kan ya ammaraparulot da pe laman kan ya dorob na, mari ra gafen siminuluk kan ya angngibilang y Afu Dios kan natunung da. 4Y Cristo ya katumpalan ya dorob, tase mebilang kan natunung ngammin ya mangurug ira kan iggina. 5Kunna tiaw ya neturak y Moises kattun kan me-annung kan ya kebilang ya tolay kan natunung megafu kan ya dorob: "Ya innia laman nga mamaraparulot kan ira yan, matolay iggina megafu kan ira yan." 6Ngam yaw ya kayan ya Sagrado nga Turak nga me-annung kan ya kinatunung nga maggafu kan angngurug nga kunna, "Marim povutan kan ya nonot mu nu innia ya umutun kan langit" (nga mangizittag kan y Cristo). 7"En marim povutan pay nu innia ya mazzittag kan ya avvut nga awan nga pamandanan na," (nga mangalak kan y Cristo kan ya dian ya gikkaralluan ya nakkakatay ira.) 8Ngam yaw ya kayan na, "Aranni kan ikaw ya ergo y Afu Dios, en hinnian kan ya simuk mu en kan ya futum." Yan ya ergo nga me-annung kan angngurug nga ipalapalappat mi. 9Nu kayan ya simuk mu nga Afum y Jesus, en nu kurruan mu kan ya futum nga pinagginnolay y Afu Dios iggina, mapalliad ka. 10On, gafu ta, kan ya futu ya tolay, mangurug iggina tase mebilang kan natunung, en kan ya simuk na, kayan na ya angngurug na tase mapalliad iggina. 11Kunna kan ya Sagrado nga Turak, "Ya innia laman nga mangurug kan iggina, mari mapasiranan." 12On, gafu ta awan nga padduman ya Judio en ya mari Judio. On, gafu ta isissa laman ya Dios nga Afu ngammin ya totolay, en iddannan na kan aru nga bendision ngammin ya mangakkul ira kan iggina. 13On, gafu ta kunna kan ya Sagrado nga Turak, "Ya innia laman nga mangakkul kan ya ngahan y Afu, mapalliad." 14Ngam annianna/kunnasi/manna ya angngakkul ya totolay kan iggina nu mari ra mamba mangurug kan iggina? En annianna ya angngurug da kan iggina nu mari ra peba nagina ya me-annung kan iggina? En annianna ya pakagina ra nu awan nga umang mangipalappat kan yan kan ira? 15En annianna pay ya angngipalappat da nu mari ra mabon? Kunna kan ya Sagrado nga Turak, "Avva/Hanna ma ya kasta ya taka ya tolay nga umang mangipalappat kan napia nga dumug." 16Ngam mari na kan ngammin nga nakagina ya namarulot kan ya napia nga dumug. On, gafu ta kunna tiaw ya neturak y Isaias, "Afu, innia ya nangurug kan ya nepalappat mi?" 17Gaggafen, maggafu ya angngurug kan ya aggina, en ya aggina, maggafu kan ya ergo nga me-annung kan y Cristo. 18Ngam povutan ku, mari ra kazze/pano nagina ya ergo? Siguradu nga nagina ra, gafu ta kunna kan ya Sagrado nga Turak, "Nakakaddet ya ngaral da kan ya interu mundo, en nakakaddet ya ergo ra kan ya pamandanan ya lusak." 19Povutan ku manin, ya Israelita ira, mari ra kazze nantindian yan? Y Moises ya unna nga nangikahi kan ya tabbag y Afu Dios nga kunna, "Pamassilan ta kayu nattaruk kan totolay nga mari nasion; pallussawan ta kayu nattaruk kan totolay nga nakafi ya pakantindi ra." 20En y Isaias, nagutuk/naturid/nataggad nga nangikahi pay kan ya ergo y Afu Dios nga me-annung kan yaw nga kunna, "Ira nay nga totolay nga mari nanaful kan yakan, natafulan dak; Ira nay nga totolay nga mari namovut kan me-annung kan yakan, nepakammuk yakan pe laman kan ira." 21Ngam nepeturak na yaw nga me-annung kan ya Israelita ira nga kunna, "Patapatangalgaw nga sinoyat ku ya imak kan ya totolay nga minannuriya en minarrebelde."

will be added

X\