Roma 1

1Yakan y Pablo nga minasserbi kan y Jesu Cristo. Sinunnak na yakan tase mabbalin kan apostol na, en nelinnay nak nga mangipalapalappat kan ya napia nga dumug y Afu Dios. 2Netabba na yan nga napia nga dumug kattun nga neturak ya profeta na ira kan ya Sagrado nga Turak 3nga me-annung kan ya Anak na. Nu me-annung kan ya nepabbalin na kan tolay, ne-anak iggina nga naggafu kan ya gakagaka y David nga patul kattun. 4Nu me-annung kan ya nasantuan nga espiritu na, napakurug kan pakapangngua kannia nepagginnolay na, nga iggina ya Anak y Afu Dios. Iggina y Afu tera nga Jesu Cristo. 5Megafu kan iggina, nekallak nak y Afu Dios, en pinabbalin nak kan apostol, tase kan ngammin nga nasion, awayya na nga hinnian/asan totolay nga mangurug en mamaraparulot kan ya napia nga dumug, senannu madayarayaw iggina. 6Nesipat kayu pay nga nakkulan y Afu Dios nga nabbalin kan kukua y Jesu Cristo. 7Matturak nak kan ikayu ngammin nga hinnian kan ya iglesia kan Roma nga ayatan y Afu Dios nga inakkulan na nga nabbalin kan nasantuan nga totolay na pay. Pare zinan ta hinnian kan ikayu ya allak en imamak nga maggafu kan y Afu Dios nga Ama tera en kan y Afu tera nga Jesu Cristo. 8Unna kan ngammin, megafu kan y Jesu Cristo, mappabalat nak kan y Afu Dios megafu kan ikayu ngammin gafu ta nadumug ya totolay kan ya interu mundo ya angngurug nu. 9Y Afu Dios nga sesserbian ku kan napafutu kannia angngipalapalappat ku kan ya napia nga dumug nga me-annung kan ya Anak na, iggina ya testiguk nga kanakanayun isipat ta kayu kan ya addasal ku. 10Kada addasal ku, ikikkiddok kan y Afu Dios nga nu uray na, makakangay nak mabbisita kan ikayu balalaman. 11Kuru ikayat ta kayu nga masingan, tase iddannan ta kayu kan ne-eruma nga pakapangngua nga maggafu kan ya Espiritu Santo nga mamasikan kan ikayu, 12ikayat ku nga kayan, makkarapasapasikan tera kan ya angngurug tera. 13Wawwahik ira, ikayat ku nga mammuan nu nga naming aru nga negakkad ku ya umang kan ikayu, ngam addet kan sangaw, natalantan nak. Ikayat ku ya umang kan ikayu tase hinnian pammakapianan nu nga kuenta vunga ya assesserbik kan ikayu nga megitta kan ya hinnian kan ya dudduma/karruan nga mari Judio. 14Annungan ku nga ipalapalappat ya ergo y Afu Dios kan ngammin nga totolay, kan ya makakammu ira kan ya ergo Griego en kan ya mari makakammu ira, kan ya masirib ira en kan ya mari masirib ira. 15Yan ya gafu na kan ikayat ku ya umang mangipalapalappat kan ya napia nga dumug kan ikayu pay nga maddian kan Roma. 16Marik ipasiran ya napia nga dumug, gafu ta yan ya pakapangngua y Afu Dios nga pamalliad na kan ngammin nga mangurug, unna kan ya Judio ira en kan ya mari Judio ira pay. 17Ipakammu y Afu Dios ya kinatunung na en ya pamatunung na kan ya totolay kan yan nga napia nga dumug. Mamegafu yan kan angngurug, en mangultimu balalaman kan angngurug. Kunna kan ya Sagrado nga Turak, "Ya innia laman nga ibilang y Afu Dios kan natunung megafu kan ya angngurug na, matolay." 18Y Afu Dios nga maddian kan langit, ipakapakammu na ya gazzit na kan ngammin nga annuriya ya totolay kan iggina en kan ya kinatunung. Tutturiyan da ira yan kannia angngifuwad da kan ya kurug, en kukukuan da yan megafu kan ya dakkut da. 19Hinnian awayya ra nga mammuan nga me-annung kan iggina nga manamanawag kan ira gafu ta iggina mismu ya nangipakammu kan ira, ngam ne-ammari ra. 20Ya awayya ra nga mammuan, hinnian y Afu Dios, en awan nga nepammegafu onu pamandanan ya pakapangngua na en ya kinadios na. Maski mari masingan ya pakapangngua na en ya kinadios na, nammuan da kan manamanawag namegafu kattu nepammaratu na kan ya mundo gafu ta kuenta masingan kan ya pinaratu na ira, en yan ya gafu na kan awan nga keferan da. 21Kakurruan na, maski nu ammu ra nga hinnian kurug nga Afu Dios, mari ra zinayarayaw iggina nga Dios onu nappabalat kan iggina, nu azzi nabbalin kan inutil ya appanapanonot da, en nakokopannan/nakallappan ya ginnonotan da nga awan da nga pattatenap. 22Kayan da nga masirib da, ngam nabbalin da kan ulapa. 23Imbes kan y Afu Dios nga mekapakkapalat nga mari vulvua/pulus matay ya dayarayawan da, dayarayawan da ya rebultu ira nga megitta ya kasinnan da kan tolay nga matay, en mammanuk, ayam en makkarekay ira. 24Gaggafen, ziniha y Afu Dios ira nga maka-angngua kan narakat/napot nga ganagannud nga ikayat ya giffutuan da, en ya narakat nga kukukuan da, kuenta darallan da ya kekakua ya gibbaggian da pe laman. 25Linikuran da ya kurug nga me-annung kan y Afu Dios, en kinurug da ya laddud/busid, en zinayarayaw en sinesserbian da ya naparatu imbes kan ya namaratu nga iggina zinan ya mepangngat nga madayarayaw kan awan na nga panda. Amen. 26Megafu kan ira yan nga kinikkingngua ra, ziniha y Afu Dios ira nga maka-angngua kan kappasiran nga ganagannud nga nayayatan ya gibbaggian da. Maski ya babbay, linikuran da ya negagangay nga akkitawa ra zinan kan lallaki kannia kukukuan da nga mari negagangay, nga ya kagitta ra nga babbay ya ikabbalay ra. 27En kunna tian pay kan ya lallaki, linikuran da ya negagangay nga angngatawa ra zinan kan babbay, gafu ta pakkatakatallan da ya kagitta ra nga lallaki. Kuru kappasiran ya kukukuan da nga parehu nga lallaki. Megafu kan yan, makastigo ra, gafu ta yan ya mepangngat nga kakastigo ya narakat nga kukukuan da. 28Gafu ta ne-ammari ra nga isipat y Afu Dios kan ya appanapanonot da, ziniha na ira gafen nga mappanapanonot kan narakat en maka-angngua ra gafen kan mari mepangngat. 29Hinnian kan ira ngammin ya ganagannud nga narakat: samsam/agum, lussaw, passil, ammatapatay, akkikkiggungut, angngiloholohot, en angngigatagatak/angngigatagatab. Minangngityismis da, 30minammaraparakat da, ikalussaw ra y Afu Dios, en awan da nga ammakakua. Minappakatanang da, palagopog da, minammaraparatu ra, en mari ra makimoray kan ya gimmanakan da. 31Mari ra mantindian ya na-espirituan nga ganagannud, mari ra mapammakatalakkan, en awan da nga ayat kan ya giffamillian da, en awan da nga allak kan ya ikattolay ra. 32Maski ammu ra ya nepakammu y Afu Dios kan ya dorob na nga ya totolay nga maka-angngua kan kunna tian ira, mepangngat nga mapatay, pakakukukuan da peba laman ira yan, en mari na kan yan laman, umanahut da pay kan ya dudduma nga maka-angngua kan ira yan nga narakat.

will be added

X\