Pakakammuan 6

1Sangaw, nasingan ku ya Kordero nga mallakat kan ya unna kan ya pitu nga timbre nga nezikkat kan ya pabbibbiran. Sangaw, naginak ya isa kan ya appat nga siggamatolay nga kunna nga nakkahi kan kagitta guni addug, "Angka tiaw!" 2Kattu iningan ku, hinnian/asan furaw nga kabayu nga nasingan ku, en hinnian aggatakay nga aggatammit kan vutug/hutug. Neddannan iggina kan korona. Nallawan iggina nga minangngaffut tase mangaffut. 3Sangaw, linakat ya Kordero ya mekaddua nga timbre, en naginak ya mekaddua nga siggamatolay nga kunna nga nangikullet, "Angka tiaw!" 4Sangaw, hinnian malappay/mabbit luminattuad nga raggang nga kabayu. Neddannan ya aggatakay kan dakal nga ispada en kan paka-awayya na nga mangazza kan imamak kan ya utun lusak tase makkarapatapatay ra. 5Sangaw, linakat na ya mekatallu nga timbre, en naginak ya mekatallu nga siggamatolay nga kunna nga nakkahi "Angka tiaw!" En hinnian malappay ngisit nga kabayu nga nasingan ku, en hinnian aggatakay nga aggatammit kan pakkilo. 6Hinnian ngaral nga naginak nga naggafu kan ya pattangngan ya appat nga siggamatolay nga kunna nga nakkahi, "Tangakilo laman nga trigu ya kegatangan ya tandan kan patangalgaw nga attrabahu, en tallu kilo laman nga sebada ya kegatangan ya tandan kan patangalgaw." Sangaw, kinahi na kan ya manaral, "Ngam marim darallan ya denu olivo onu ya daggat vunga ubas." 7Sangaw, linakat na ya mekappat nga timbre, en naginak ya mekappat nga siggamatolay nga kunna nga nakkahi, "Angka tiaw!" 8Hinnian ngilinggilan nga kabayu nga nasingan ku, en hinnian aggatakay nga mangngahan kan Patay, en tunutunuran ya Hades iggina. Neddannan da nga dua kan paka-awayya ra kan ya pakkappat ya totolay kan ya utun lusak, tase patayan da ira kan ispada, kan bisin, kan tulahan en kan tanam/tanang nga aya-ayam nga maddian kan ya utun lusak. 9Sangaw, linakat na ya mekalima nga timbre, en kan ya gannung ya angngiyofresian/angngidedikan, nasingan ku ya gikkaralluan ya totolay nga napatay megafu kan ya angngurug da kan ya ergo y Afu Dios en gafu ta mari ra nemmang nga mangipakapakammu kan yan. 10Kunda nga nakkahi, "O, Katanangan nga Afu nga nasantuan en kurug. Be mang kabayag ya zim ammanunut en ya zim abbalat kan ira nay nga totolay kan ya utun lusak nga namatay kan ikami?" 11Sangaw, neddannan ya kada isa kan ira kan anaddu nga furaw nga sinnun, en nakahi kan ira nga mamangat da peba kan manganannuan addet zi makompleto ya bilang ya wawwahi ra kan pangurug, ira ya kagitta ra nga kohung y Afu Jesus, nga mapatay pay kan kagitta ra. 12Sangaw, linakat na ya mekannam nga timbre, en nallunig kan nasikan, nangngisit ya sinag kan kagitta attal/panis, en narraggang ya nappannu nga vulan kan kagitta daha. 13Ya bittuan ira kan langit, nakkatanag/nakkakabok da kan ya utun lusak kan kagitta ya katanag ya nakkalata nga vunguvunga nga makkatattak/meguyaguy megafu kan bayabbag. 14Napawan ya langit kan kagitta ya kapawan ya pabbibbiran nga nalukut ngin, en nazza ngammin ya bakulud ira en ya fugu ira kan ya gippuestuan da. 15Sangaw, ya patul ira kan ya mundo, ya panakallan ira, ya ofisial ira kan ya suddalu ira, ya ririku, ya makapangngua ira, en ngammin ya totolay nga kohung onu mari kohung, nassussussuk da ngammin kan ya kueba ira en kan ya naddaratanan/nallalatanan ya daddakal nga batu ira kan ya bakulud ira. 16Kunda nga nangikukkullet kan ya bakulud ira en kan ya batu ira, "Mattanag kayu kan ikami tase matavvanan en mesussuk kami senannu mari na kami masingan ya aggatuttud kan ya trono, en mari mesimmu kan ikami ya gazzit ya Kordero. 17On, gafu ta luminabbet ngin ya dakal nga algaw nga angngipasingan da kan ya gazzit da, en innia ya make-attam kan yan?"

will be added

X\