Pakakammuan 4

1Kabalin na yan, hinnian/asan manin tanakkuan nga nasingan ku, isa nga puerta kan langit nga aggavukat. En ya ngaral nga megitta kan guni trumpeta nga nakiergo kan yakan nga naginak kattu gafagafu, kunna nga nakkahi, "Umutun ka tiaw, en ipasingan ku kan ikaw ya siguradu nga mesimmu kabalin na ira yaw." 2Insigida nga hinnian nak kan langit, en sangaw, hinnian trono nga nasingan ku, en hinnian aggatuttud kannay. 3Ya kasinnan na, kumikkiltat/kumirikirit nga megitta kan haspe en karnelia nga nangina nga batu. Kan ya pallehut ya trono na, hinnian vullungun/vunglun nga megitta ya kasinnan na kan esmeralda nga nangina nga batu. 4Kan ya pallehut na nay nga trono, hinnian peba duafulu se appat nga trono nga gittutturan ya duafulu se appat nga lalakay nga nabistian kan furaw, en nakoronan da kan vulawan. 5Nakatattallit, nakagunuguni en naka-addug nga naggafu kan ya trono, en hinnian pitu nga gifu nga gumangagangat kan ya atubang ya trono. Ira yaw ya pitu nga espiritu y Afu Dios. 6Kan ya atubang ya trono, hinnian megitta kan bebay nga bidru nga megitta kan kristal ya litaw na. Kan ya pallehut ya trono, hinnian peba appat nga siggamatolay nga napannu kan mata ya interu gibbaggian da kan ya atubang en likud da. 7Ya unna, megitta ya kasinnan na kan leon. Ya mekaddua, megitta kan baka. Ya mekatallu, kamuyumuyung/kamukumukat tolay. En ya mekappat, megitta kan tawi/kali nga makakayakayab. 8Ya kada isa kan ya appat nga siggamatolay, nappayak kan taggi-annam. Napannu kan mata ya utun en ya gannung ya kada payak da. Algaw en gabi, mari ra vulvua/pulus memmang nga makkakkansion, "Nasantuan, nasantuan, nasantuan y Afu Dios nga makapangngua kan ngammin nga aggahinnian kattun, kan sangaw, en kan awan na nga panda." 9Ira yaw nga appat nga siggamatolay, makkakkansion da kan paddayarayaw, pammakakua en pappabalat kan ya aggatuttud kan ya trono nga siggamatolay kan awan na nga panda. Kada angngua ra kan yan, 10ira yan nga duafulu se appat nga lalakay, mallakab da kan ya atubang ya aggatuttud kan ya trono en ittun da ya gikkoronan da kannay, en kunda nga maddayarayaw kan ya siggamatolay kan awan na nga panda, 11"Ikaw nga Afu mi en Dios mi, mepangngat ka nga madayarayaw, me-ekakua en mammuan nga makapangngua ka, gafu ta pinaratum ngammin ya ganagannud, en megafu kan ya urem, naparatu ra en hinnian da."

will be added

X\