Pakakammuan 3

1"Iturak mu yaw kan ya anghel kan ya iglesia kan ya siudad ya Sardis. 'Yakan nga aggatammit kan ya pitu nga espiritu y Afu Dios en kan ya pitu nga bittuan. Ipakahik ira yaw: Ammuk ya kukukuan nu. Nepadumug nga siggamatolay kayu, ngam kakurruan na, nakkakatay kayun. 2Malukag kayun, en pasikannan nu ya napia nga ganagannud nga natalan/nabattang kan ikayu nga mappanget nga matay gafu ta masingan ku nga mari peba kompleto ya kukukuan nu kan ya paningan ya Dios ku. 3Dandamman nu gafen ya kurug nga tuldu nga nagina en inalawat nu kattun, en paraparulotan nu yan, en mabbabawi kayun gafu ta, nu mari nu malukag, angayan ta kayu nga mari nu ammu ya orat nga allabbet ku nga megitta kan ya allabbet ya akkokot. 4Ngam hinnian/asan pilippipia kan ikayu nga hinnian kan Sardis nga mari ra zinapingan ya gissinnunan da. Makipanalan da kan yakan nattaruk nga nabistian da kan furaw gafu ta mepangngat yan kan ira. 5Ya innia laman nga mangaffut kan narakat/napot, kunna tian ya kabisti na, en marik vulvua/pulus azzan ya ngahan na kan ya neturakan ya gingngahanan ya totolay nga matolay kan awan na nga panda. Kayan ku kan tolek iggina kan ya atubang y Amak en ya anghel na ira. 6Nu ikayat nu nga mantindian, ginan nu gafen kan napia ya kayan ya Espiritu Santo kan ya iglesia ira.' " 7"Iturak mu yaw kan ya anghel kan ya iglesia kan ya siudad ya Filadelfia. 'Yakan ya nasantuan, ya kurug en ya aggatammit kan ya annusi nga kua y David kattun, ya makavukat, en awan vulvua/pulus makaserra kan ya vukatan ku, ya makaserra, en awan vulvua makavukat kan ya serran ku. Ipakahik ira yaw: 8Ammuk ya kukukuan nu. Ammuk nga bissang/bissut laman ya makua nu, ngam maski kunna tian, pinaraparulot nu ya ergok kan ikayu, en mari nu linikuran ya angngurug nu kan yakan. Innan nu! Hinnian puerta nga vinukatan ku kan ya atubang nu nga awan vulvua makaserra. 9Ginan nu yaw! Hinnian totolay kannian nga makkahi nga Judio ra, ngam laddud/busid da gafu ta mari ra mamba Judio, nu azzi isa ra nga sinagoga y Satanas. Ipesimmuk nga umang da nattaruk mappalentud kan ya paratubangan nu, en mammuan da nga inayat ta kayu. 10Gafu ta pinaraparulot nu ya ergok nga natattam kayu, palliaran ta kayu pay nattaruk kan ya tiempo ziyat nga mappanget nga lumabbet kan ya interu mundo nga pamurba kan ngammin nga totolay kan ya utun lusak. 11Manoli nak kan mari mabayag. Kangkamman nu ya angngurug nu, tase awan vulvua makagarut kan ya korona nga premio nu. 12Ya innia laman nga mangaffut kan narakat, pabbalinan ku iggina kan kuenta arihi ya templo ya Dios ku, en mari na vulvua mazza kannay. Imarkak kan iggina ya ngahan ya Dios ku en ya ngahan ya siudad ya Dios ku. Yan ya bahu nga Jerusalem nga maggafu kan ya Dios ku kan langit nga mappagukab nattaruk. Imarkak pay ya bahu nga ngahan ku kan iggina. 13Nu ikayat nu nga mantindian, ginan nu gafen kan napia ya kayan ya Espiritu Santo kan ya iglesia ira.' " 14"Iturak mu yaw kan ya anghel kan ya iglesia kan ya siudad ya Laodicea. 'Yakan nga mangngahan kan Amen, testigu nga mapammakatalakkan en makurug, en naggafanan ngammin ya pinaratu y Afu Dios, ipakahik ira yaw: 15Ammuk ya kukukuan mu. Ammuk nga marim napatu onu nalammin. Pare zinan ta napatu onu nalammin. 16Gafu ta marim napatu onu nalammin, nu azzi nappatay laman, itupprak ta ka. 17Kummu mamba nga makkahi, "Riku nak, en aru ya naganaganansia kun, en awan nga mawag kun," ngam marim ammu nga anakkue, pakallallak, pobre, vulaw en lawan ka. 18Itabarang ku gafen kan ikaw nga gumatang ka kan yakan kan vulawan nga napapuro kan afi tase mabbalin ka kan kurug nga riku. En gumatang ka pay kan yakan kan sinnun nga furaw nga isinnun mu tase mari masingan ya kappasiran nga kawan vulvua sissinnun kan ya baggim. En gumatang ka peba kan yakan kan pangurum kan ya matam tase makasingan ka. 19Ya innia laman nga ayatan ku, tunungan ku en disiplinan ku. Gaggafen, mallallappat ka en mabbabawi ka. 20Ginan mu yaw! Aggatadag nak kan ya puerta, en makatottottok nak nga makkul. Ya innia laman nga makagina kan ya ngaral ku, en vukatan na ya puerta, tumallung nak, en matubang kami nga mangan. 21Ya innia laman nga mangaffut kan narakat, pavulunan ku iggina nga umang makipanuttud kan ya bikat ku kan ya tronok kan kagitta ya nepakkipanuttud ku kan ya bikat y Amak kan ya trono na. 22Nu ikayat nu nga mantindian, ginan nu gafen kan napia ya kayan ya Espiritu Santo kan ya iglesia ira.' "

will be added

X\