Pakakammuan 21

1Kabalin na yan, nasingan ku ya bahu nga langit en ya bahu nga lusak, gafu ta awan ngin ya dana nga langit en lusak en ya bebay pay. 2Nasingan ku ya bahu nga Jerusalem nga nasantuan nga siudad nga maggafu kan y Afu Dios kan langit nga maddaggun nga mappagukab. Naparan nga megitta kan nobia nga nabistian kan nakakkasta para kan ya nobio na. 3Hinnian/Asan naginak nga ngaral nga nasikan nga naggafu kan ya trono nga kunna nga nakkahi, "Sangaw, hinnian ya paddianan y Afu Dios kan ya dian ya totolay. Maddian igginan kan ya utun ya bahu nga lusak nga dian da, en ira ya totolay na. Y Afu Dios mismu, hinnian ngin kan ira, en iggina ya Dios da. 4Funatan na ngammin ya lullua ra kan ya gimmatan da. Awan ngin nga patay, abbinunga/aggunggul, attangit onu attakit gafu ta napawan ngin ya dana nga ganagannud nga kegafanan na ira yan." 5Y Afu Dios nga aggatuttud kan ya trono, kunna nga nakkahi, "Sangaw, pabahuan ku ngammin nga ganagannud." Kunna peba kan yakan, "Iturak mu yaw, gafu ta mapammakatalakkan en kurug ira yaw nga ergok." 6Kunna peba nga nakkahi kan yakan, "Nabalin ngin! Yakan ya Alfa en ya Omega, ya Gafagafu en ya Ultimu. Ya innia laman nga nawwaw, iddannan ku kan danum nga awan na nga paga nga maggafu kan ya annit/annip nga mangiddan kan angat. 7Ya innia laman nga mangaffut kan narakat/napot, alawatan na ira yan nga bendision en yaw peba, yakan ya Dios na, en anak ku iggina. 8Ngam ira nay nga tarkuk, nallikud kan ya angngurug da, naka-angngua kan narakat, namatay, namabay onu nakilalaki, nassalamangka/nammadyik, naddayarayaw kan rebultu ira, en ngammin ya nalladdud/nabbusid, mattumpal da ngammin kan ya lussung/lissung nga afi nga gumatagatang nga asuffri. Yan ya mekaddua nga patay." 9Sangaw, minang kan yakan ya isa kan ya pitu nga anghel nga aggatammit kan taggirisa ra nga malukung nga napannu kan ya pitu nga panarun. Kunna nga nakkahi, "Mevulun ka kan yakan. Ipasingan ku kan ikaw ya nobia nga ikasal ya Kordero." 10Sangaw, inalak na ya karalluak, en ne-angay nak kan ya utun ya isa nga dakal nga atanang nga bakulud. Uli nepasingan na kan yakan ya nasantuan nga siudad nga Jerusalem nga maggafu kan y Afu Dios kan langit nga maddaggun nga mappagukab. 11Hinnian kan yan ya kekapalat y Afu Dios, en megitta ya kilad na kan ya kilad ya nanginingina nga batu, megitta kan haspe, en nalitilitaw kan kagitta kristal. 12Hinnian dakal en atanang nga pader kan ya pallehut na. Mafulu se dua ya trangka na, en kan kada trangka, hinnian isa nga anghel. Neturak kan ya trangka ira ya gingngahanan ya mafulu se dua nga tribu nga gakagaka ya mafulu se dua nga anak ira y Israel. 13Tallu ya trangka kan ya silawan ya siudad, tallu kan ya zilod, tallu kan ya ziraya, en tallu kan ya taggappan. 14Mafulu se dua ya fundasion ya pader, en kada isa, nangahanan kan ya ngahan ya isa kan ya mafulu se dua nga apostol ira ya Kordero. 15Ya anghel nga nakiergo kan yakan, aggatammit kan vulawan nga paggukud, gafu ta gukuran na ya siudad en ya trangka na ira en ya pader na. 16Ya forma ya siudad, kuadrado, en ya kanaddu na, megitta kan ya kaba na. Ginukud na ya siudad, en duarivu se appattatut nga kilometro ya gukud na. Maggiritta ya kanaddu na, ya kaba na en ya katanang na. 17Ginukud na pay ya pader na, en annammafulu se appat nga metro ya gukud na. Ya paggukud nga ne-usa na, yan balalaman ya iyusa tera nga totolay. 18Napanday ya pader nga nangiyusa ra kan haspe nga nangina nga batu, en ya siudad, puro nga vulawan nga malinaw/maminaw kan kagitta bidru. 19Nadornuan ya fundasion ira ya pader ya siudad kan maddumuruma nga na-angngina nga batu. Haspe ya unna, safiro ya mekaddua, kalsedonia ya mekatallu, esmeralda ya mekappat, 20sardonika ya mekalima, karnelia ya mekannam, krisolito ya mekapitu, berilio ya mekawalu, topasio ya mekasiam, krisoprasio ya mekamafulu, hasinto ya mekamafulu se isa en amatista ya mekamafulu se dua. 21Ya mafulu se dua nga trangka, mafulu se dua nga perlas, en kada trangka, napanday nga nangiyusa ra kan perlas. En ya dalan ya siudad, puro nga vulawan nga ma-alinaw kan kagitta bidru. 22Awan nga templo nga nasingan ku kan ya unag ya siudad, gafu ta y Afu Dios mismu nga Makapangngua en ya Kordero ya templo kannay. 23Mari mawag ngin ya siudad ya sinag onu ya vulan nga mangnawag kannay, gafu ta, ya kekapalat y Afu Dios, mangnawag kannay, en ya Kordero ya allamparan na. 24Ngammin ya totolay ira kan ya nasion ira, manalan da nattaruk kan ya nawag na. En ya patul ira kan ya utun lusak, iyangay ra nattaruk ya kekakua ra kannay. 25Mari vulvua/pulus meserra ya trangka na ira kan algaw, en awan nga gabi kannay ngin. 26En ya totolay kan ya nasion ira, iyangay ra nattaruk ya kekakua ra en ya kedayaw ra kannay. 27Ngam awan vulvua makatallung kannay nga mari narelihiosowan nga narenu onu mangngua kan kappasiran onu malladdud, fera laman ya totolay nga neturak ya gingngahanan da kan ya pabbibbiran ya Kordero nga neturakan ya gingngahanan ya totolay ira nga meddannan kan angat nga awan na nga panda.

will be added

X\