Pakakammuan 2

1Nassige y Jesus nga kunna nga nakkahi kan yakan, "Iturak mu yaw kan ya anghel kan ya iglesia kan ya siudad ya Efeso. 'Yakan ya aggatammit kan ya pitu nga bittuan kan ya ziwanan nga imak en manaladalan kan ya pattarangngan ya pitu nga vulawan nga kandelero. Ipakahik ira yaw: 2Ammuk ya kukukuan nu, ya abbannabannag nu en ya appasapasensia nu nga matattam. Ammuk nga tutturiyan nu ya totolay nga narakat/napot, en pinurba nu ira nay nga makkahi nga apostol da, ngam mari ra mamba apostol, en nammuan nu nga laddud/busid da. 3Ammuk nga minappasensia kayu, en natattam kan kapazapaziyat megafu kan yakan nga mari nu molang. 4Ngam hinnian/asan ammarik kan ikayu, ya ayat nu kan yakan kan sangaw, mari megitta ngin kan ya ayat nu kattu gafagafu. 5Dandandamman nu ya ayat nu kattun, en mabbabawi kayu, en uli kukukuan nu ya megitta kan ya kinikkingngua nu kattu gafagafu. Nu mari nu mabbabawi, annak kan ikayu, en azzan ku ya kandelero nu kan ya lugar na. 6Ngam yaw ya napia kan ikayu, ikalussaw nu ya kukukuan ya Nicolaita ira nga ikalussok pay. 7Nu ikayat nu nga mantindian, ginan nu gafen kan napia ya kayan ya Espiritu Santo kan ya iglesia ira. Ikayu nga mangaffut kan ya narakat, pavulunan ta kayu nga kanakanayun mangan kan ya vunga ya kayu nga mangiddan kan angat nga hinnian kan ya Paraiso y Afu Dios.' " 8"Iturak mu yaw kan ya anghel kan ya iglesia kan ya siudad ya Esmirna. 'Yakan nga Unna en Ultimu nga natay kattun, ngam nagginnolay nak balalaman. Ipakahik ira yaw: 9Ammuk ya azziyariyat en kapobre nu, ngam kakurruan na, riku kayu. Ammuk nga paraparakattan da kayu ya totolay nga makkahi kan Judio ra, ngam mari ra mamba Judio, nu azzi isa ra nga sinagoga y Satanas. 10Ngam ikayu, mari nu mattalaw kan ya mappanget nga kapazapaziyat nu. Ginan nu yaw. Pappangetan y Satanas nga ipekarsel ya dudduma/karruan kan ikayu tase purban na kayu, en kan mafulu nga algaw, mapazapaziyat kayu. Ngam massige kayu peba nga mangurug kan yakan maski nu yan ya kapatayan nu, en nu kuan nu yan, iddan ku kan ikayu ya korona nga angat. 11Nu ikayat nu nga mantindian, ginan nu gafen kan napia ya kayan ya Espiritu Santo kan ya iglesia ira. Ikayu nga mangaffut kan ya narakat, mapalliad nattaruk kan infiernu nga makahi kan mekaddua nga patay.' " 12"Iturak mu yaw kan ya anghel kan ya iglesia kan ya siudad ya Pergamo. 'Ya hinnian ispada na nga nataram nga dua ya ngarab na, ipakahik ira yaw: 13Ammuk ya klase ya siudad nga paddianan nu, yan ya dian ya trono y Satanas. Maski kunna tian ya paddianan nu, nasikan ya angngurug nu kan yakan, en mari nu linikuran ya angngurug nu kan yakan maski kattu tiempo y Antipas nga napammakatalakkan nga nanettestigu kan yakan, en napatay iggina kan ya siudad nu nga paddianan y Satanas. 14Ngam hinnian pilippipia laman nga ammarik kan ikayu. Hinnian dudduma kan ikayu nga mamuluvulun kan ya netuldu y Balaam nga natolay kattun. Iggina ya nangituldu kan y Balak kan palliwatan na ya Israelita ira kannia angngan da kan karne nga ne-ofresi/nededika kan rebultu ira en kannia ammabay ra. 15En yaw peba, hinnian dudduma kan ikayu nga mamuluvulun kan ya tuldu ya Nicolaita ira. 16Gaggafen, ibabawi nu yan. Nu mari nu mabbabawi, annak kan ikayu kan mari mabayag, en makiggerra nak kan ikayu nga mari mabbabawi nga usan ku ya ispadak nga hinnian kan ya simuk ku. 17Nu ikayat nu nga mantindian, ginan nu gafen kan napia ya kayan ya Espiritu Santo kan ya iglesia ira. Ikayu nga mangaffut kan ya narakat, iddannan ta kayu nattaruk kan manna nga narimanan. En ya kada isa kan ikayu nga mangaffut, iddannan ku peba kan furaw nga batu nga neturakan ya bahu nga ngahan nga awan nga tanakkuan nga makakammu nu azzi laman ya tolay nga mangalawat.' " 18"Iturak mu yaw kan ya anghel kan ya iglesia kan ya siudad ya Tiatira. 'Yakan ya Anak y Afu Dios nga megitta ya matak kan gumatagatang nga afi, en megitta ya takak kan tubbaha nga nagigitan. Ipakahik ira yaw: 19Ammuk ya kukukuan nu, ya ayat nu, ya angngurug nu, ya assesserbi nu, en ya appasapasensia nu, en ammuk nga mas aru peba ya kukukuan nu kan sangaw annek/ngam kattu gafagafu. 20Ngam yaw ya ammarik kan ikayu. Papavulunan nu y Jezebel, yan nga babay nga makkahi kan profeta iggina, ngam awan mamba. Iloholohot na ya kohung ku ira, nga ituttuldu na kan awayya ra maddallaw en mangan kan konforme nga ne-ofresi kan rebultu ira. 21Iniddannan ku iggina kan tiansa nga mabbabawi, ngam ne-ammari na nga likuran ya akkilalaki na. 22Ginan nu yaw nga kuan ku sangaw kan iggina. Pattakitan ku iggina nga kuenta ilappak ku iggina nga mazziyat kan ya kattri, en ya kidallaw na ira, nelot/nafulotan ya ammazapaziyat ku kan ira pay nu mari ra ibabawi ya annallaw ra kan iggina. 23En patapatayan ku ya anak na ira Mammuan ngammin ya iglesia ira gafen nga yakan ya makakammu kan ngammin nga hinnian kan ya ginnonotan en ya giffutuan ya totolay, en mammuan da peba nga balattan ku ya kada isa kan ikayu segun kan ya kinikkingngua na pe laman. 24'Ngam hinnian dudduma kan ikayu kan ya iglesia kan Tiatira nga mari mamulun kan nay nga tuldu na en mari nakakammu kan ira nay nga makahi kan adalam nga tuttuldu y Satanas. Yaw ya kayan ku kan ikayu nga awan nga tanakkuan nga ipakuak kan ikayu nga kuenta pakadammattan nu, 25nu azzi yaw laman, isigisige nu ya angngurug nu addet kannia annolik. 26Ya innia laman nga mangaffut kan ya narakat en maka-angngua kan ya urek addet kan ya pangultimuan, iddannan ku iggina nattaruk kan paka-awayya nga mammoray kan ya nasion ira, 27nga megitta kan ya paka-awayya nga nalawat ku kan y Amak. En istrikto ya ammoray na kan ira nga alale balayang nga baston ya iyusa na kannia angngastigo na kan ya mari mamarulot ira nga alale mamakkabakka iggina kan banga ira. 28En iddan ku kan iggina ya bittuan nga nangahanan kan Angngarannian. 29Nu ikayat nu nga mantindian, ginan nu gafen kan napia ya kayan ya Espiritu Santo kan ya iglesia ira.' "

will be added

X\