Pakakammuan 19

1Kabalin na yan, hinnian/asan naginak nga guni nga, ya kagina na, nasikan nga ngaral ya napakaru nga totolay kan langit nga kunda nga nakkahi, "Aleluia! Ya pamalliad, ya pakapangngua, en ya kedayarayaw, kua ya Dios tera. 2On, gafu ta natunung en kurug ya ammanunut na. Nanawag yan gafu ta pinanunutan nan ya paddumurumug nga minakkilalaki nga kuenta pinabbalin na kan mekasakay/mekarukkut ya utun lusak kannia nepakkilalaki na, en binalat y Afu Dios iggina kan ya nepammaturut ya minakkilalaki kan ya daha ya totolay nga minasserbi kan y Afu Dios, en pinaturut na yan kannia nepammatay na kan ira." 3Kunda nga nakkahi manin, "Aleluia! Mari memmang nga umutu-utun ya atuk kan ya kasidug na nay nga siudad!" 4Ira nay nga duafulu se appat nga lalakay en ya appat nga siggamatolay, nallakab da nga kunda nga naddayarayaw kan y Afu Dios nga aggatuttud kan ya trono na, "Amen! Aleluia!" 5Hinnian ngaral nga naggafu kan ya trono nga kunna nga nakkahi, "Dayarayawan nu ya Dios tera, ikayu ngammin nga minasserbi kan iggina, ikayu nga mangikakua kan iggina nga atanang onu alinak ya kekuentan nu." 6Sangaw, hinnian naginak nga guni nga megitta kan ngaral napakaru nga totolay, en guni ya mavvonomvor nga danum, en ya guni ya na-assikan nga addug nga kunda nga nangikukkullet, "Aleluia! On, gafu ta mappatul ngin y Afu nga Dios tera nga Makapangngua. 7Gaggafen, maggaragarassia tera nga mayayat tera zinan ngin, en dayarayawan tera iggina gafu ta luminabbet ngin ya akkasal ya Kordero, en nabistian ngin ya nobia na. 8Neddannan ya nobia na kan bisti na nga nakakkasta nga seda nga nakilikilad nga awan na nga mantia." Ya nakakkasta nga seda, yan ya ke-angngarrian ya natunung nga kinikkingngua ya totolay y Afu Dios. 9Kunna nga nakkahii ya anghel kan yakan, "Iturak mu yaw! Mabendisionan ya nembitan ira kan ya kaselebra ya akkasal ya Kordero." Kunna peba, "Kurug ngammin ira yan nga bahu nepakammu y Afu Dios kan ikaw." 10Sangaw, nallakab nak nga maddayarayaw kan ya atubang na, ngam kunna nga nakkahi kan yakan, "Marim kuan yan, gafu ta isa nak laman nga minasserbi nga megitta kan ikaw en kan ya wawwahim kan pangurug nga massige nga mangikahi kan ya kurug nga me-annung kan y Jesus. Y Afu Dios ya dayarayawan mu." On, gafu ta, ya kurug nga me-annung kan y Jesus, yan ya ipakapakammu ya Espiritu Santo nga ipakapakammu ya profeta ira. 11Sangaw, nasingan ku nga aggavukat ya puerta kan langit, en hinnian furaw nga kabayu nga nasingan ku kannay. Hinnian aggatakay kan ya kabayu, en ya ngahan na, Mapammakatalakkan en Kurug. Natunung iggina nga mamanunut en makiggerra. 12Megitta ya mata na kan gumatagatang nga afi, en aru ya korona kan ya ulu na. Hinnian ngahan nga neturak kan ya baggi na nga awan nga makakammu kan ya kebalinan na nu azzi iggina pe laman. 13Nabistian iggina kan anaddu nga sinnun nga nedassam kan daha. en mangngahan iggina kan Uvovug y Afu Dios. 14Ya suddalu ira kan langit nga nabistian kan seda nga nakakkasta nga furaw nga awan da nga mantia, tunutunuran da iggina, en aggatakay ra pay kan furaw nga kabayu ira. 15Hinnian nataram nga ispada nga palapalawanan na kan ya simuk na nga iyusa na kannia akkiggerra en angngaffut na kan ya totolay kan ya nasion ira nga manuriya kan iggina. Mammoray iggina nga konsu batuta nga balayang. Iggina ya mangibatabatay kan ya addampitan kan ubas ira nga simbulo ya nelot/nafulotan nga gazzit y Afu Dios nga Makapangngua. 16Hinnian ngahan nga neturak kan ya sinnun na kan ya dian ya uffu na, Patul ya patul ira en Afu ya afu ira. 17Sangaw, hinnian nasingan ku nga anghel nga aggatadag kan ya sinag. Kunna nga nakkahi kan ngammin nga mammanuk ira nga makakayakayab kan ya nattangngan ya langit, "Angkayu marammung kan ya dakal nga langan nga pinaran y Afu Dios. 18Mangan kayu kan pattag patul ira, heneral ira, na-assikan nga suddalu ira, kabayu ira en ya sineti ira kan ira, en ngammin nga totolay ira nga kohung onu mari kohung, totolay nga alinak onu atanang ya kekuentan da." 19Sangaw, nasingan ku nay nga ayam en ya patul ira kan ya utun lusak en ya suddalu ra ira pay. Nattaradday ra nga makiggerra kan nay nga aggatakay kan ya kabayu en kan ya suddalu ira pay nga tumunutunud kan iggina. 20Nagafut nay nga ayam en nay nga falso nga profeta pay nga nevulun kan ya ayam nga naka-angngua kan milagro ira kan ya atubang ya ayam. Ira nay nga milagro ya nepangngilohot na kattun kan ya totolay nga namarkan kan ya marka ya ayam en ya naddayarayaw ira kan ya rebultu nga megitta kan ya ayam. Sangaw, ira nay nga dua, siggamatolay ra nga napatuvvu/napatabbraw kan ya dakadakal nga lussung/lissung afi nga zumozzozzog nga asuffri. 21Ya aggatakay kan ya kabayu, kan ya ispada na nga nallawalawan kan ya simuk na, pinatay na ya suddalu ra ira, en nabattabattug ngammin ya mammanuk ira kan ya gippattaggan da.

will be added

X\