Pakakammuan 17

1Kabalin na ira yan, hinnian/asan isa kan ya pitu nga anghel nga aggatammit kan taggirisa ra nga malukung nga minang kan yakan nga kunna nga nakkahi, "Mevulun ka kan yakan, gafu ta ipasingan ku kan ikaw ya kakastigo ya paddumurumug nga minakkilalaki nga ke-angngarrian ya dakadakal nga siudad nga hinnian kan ya dian ya aru nga danum. 2Ya patul ira kan ya utun lusak, binabay ra iggina, en ya totolay kan ya utun lusak, alale nellaw ra kan ya binarayang nga simbulo/sennial ya akkilalaki na." 3Inalak yan nga anghel ya karalluak, en ne-angay nak kan disierto. Hinnian nasingan ku nga babay nga aggatuttud kan raggang nga ayam nga pitu ya ulu na en mafulu ya tagud na nga napannu ya interu baggi na kan neturak nga ngahan ira nga maka-insulto kan y Afu Dios. 4Nabbisti ya babay kan kulor ubi en kan raggang, en nalahas kan vulawan, kan perlas ira, en kan dudduma/karruan peba nga na-angngina nga batu. Aggatammit iggina kan vulawan nga tasita nga napannu kan mekasakay/mekarukkut nga ke-angngarrian ya narakarakat/napanapot nga kukukuan na nga kesimbulowan ya akkilalaki na. 5Neturak ya ngahan na kan ya frente na, ngam mari mantindian ya kurug nga kebalinan na, "Babilonia nga dakadakal nga siudad, ina ya minakkilalaki ira en kegafanan ya mekasakay ira nga makamakua kan ya utun lusak." 6En nasingan ku nga nellaw ya babay kan ya daha ya totolay y Afu Dios, ikayat na nga kayan, ya daha ya nepapatay na megafu kan ya nepangngikahakahi ra kan ya angngurug da kan y Afu Jesus. Kuru nappabbaw nak kattu nasingan ku ya babay. 7Ngam pinovutan ya anghel kan yakan, "Ka-am ta nappabbaw ka? Kayan ku kan ikaw ya mari peba mantindian nga me-annung kan ya babay en ya ayam nga aggatakayan na nga pitu ya ulu na en mafulu ya tagud na. 8Ya ayam nga nasingan mu, natolay kattun, ngam mari na matolay kan sangaw. Mappanget nga umutun nga mallawan kan ya avvut nga awan na nga pamandanan, en umang kan ya kadarallan na. Ya totolay nga maddian kan ya utun lusak nga mari neturak ya gingngahanan da kan ya neturakan ya gingngahanan ya totolay nga meddannan kan angat nga awan na nga panda, en neturak da kannay kallie ya nekaparatu ya mundo, mappabbaw ra kannia pakasingan da kan ya ayam gafu ta natolay kattun, mari na matolay kan sangaw, en lumattuad manin. 9"Mawag kan masirib ya appanonot mu kan ira yaw. Ya pitu nga ulu na, pitu nga balabbakulud nga nanutturan ya babay. Pitu pay nga patul ya ke-angngarrian ya pitu nga ulu na. 10Natay ngin ya lima, maddaggun nga mammoray ya isa, en mari peba luminabbet ya isa, ngam nattaruk nu lumabbet iggina, mari mabbayag ya appatul na. 11Yan nga ayam nga natolay kattun, ngam awan kan sangaw, iggina ya mekawalu nga patul nga isa kan ira yan nga pitu, en umang iggina kan ya kadarallan na. 12"Ya mafulu nga tagud nga nasingan mu, mafulu nga patul nga mari peba namegafu nga mappatul, ngam meddannan da nattaruk kan paka-awayya ra nga makipappatul kan ya ayam kan mari mabbayag. 13Isissa ya gakkad da, en ituluk da nattaruk ya pakapangngua en paka-awayya ra kan ya ayam. 14Makiggerra ra en ya suddalu ra ira nattaruk kan ya Kordero, ngam affutan na ira gafu ta iggina ya Afu ya afu ira en ya Patul ya patul ira. Ya kakavulun na, ira ya nakkulan, napili en mapammakatalakkan, hinnian da kan iggina." 15Hinnian peba nepakammu ya anghel kan yakan, "Ya danum ira nga nasingan mu nga nanutturan ya minakkilalaki, ira ya totolay kan maddumuruma nga ginafuan, rasa, nasion en perergo. 16En ira nay nga nasingan mu nga mafulu nga patul nga ke-angngarrian ya mafulu nga tagud en ya ayam pay, ikalussaw ra nattaruk nay nga minakkilalaki. Pabbalinan da nattaruk nga awan nga kukua na onu sissinnun na. Kanan da ya pattag na, en siduhan da peba ya baggi na. 17Kuan da ira yan gafu ta pappanonotan y Afu Dios ira nga kuan da ira yan, en kannia angngua ra kan ira yan, matumpal ya uray na. Kuan na yan kannia angngua na kan mattaradday ya gakkad da, en ituluk da ya paka-awayya ra nga mappatul kan ya ayam addet zi matumpal ya kinahi y Afu Dios. 18Ya babay nga nasingan mu, iggina ya simbulo ya dakadakal nga siudad nga mammoray kan ya patul ira kan ya utun lusak."

will be added

X\