Pakakammuan 15

1Sangaw, hinnian/asan manin mekapakkapalat en ne-eruma nga nasingan ku kan langit, pitu nga anghel nga agaggirisa ra kan panarun kan ya totolay ira. Ira yan ya ultimu nga panarun nga katumpalan ya gazzit y Afu Dios. 2Hinnian peba nasingan ku nga alale bebay nga bidru nga nakihuan kan afi. Kan ya dappit na, aggatadag ira nay nga totolay nga nangaffut kan ya ayam, kan ya rebultu nga megitta kan iggina en ya nomiro ya ngahan na. Aggatammit da kan arpa nga neddan y Afu Dios kan ira. 3Kakkansionan da ya kansion y Moises nga minasserbi kan y Afu Dios kattun, en ya kansion ya Kordero pay nga kunna tiaw: "O Afu Dios nga Makapangngua, daddakal en mekapakkapalat ya kukukuan mu! O Patul ya nasion ira, natunung en kurug ya aggangnguam! 4O Afu, innia ya mari mattalaw kan ikaw, onu mari maddayarayaw kan ya ngahan mu? On, gafu ta ikaw laman ya isissa nga nasantuan. Ya totolay kan ngammin nga nasion, umang da ka dayarayawan, gafu ta nepakammu kan ira ya natunung nga kukukuan mu!" 5Kabalin na yan, nasingan ku nga navukatan ya puerta ya templo nga paddianan y Afu Dios kan langit. 6Nallalawan ya pitu nga anghel kan ya templo, en nevulun da ya pitu nga pamazapaziyat da. Nabistian da kan narenu nga nakilad nga seda, en nabbanda ya gittagangan da kan vulawan. 7Sangaw, isa kan ira nay nga appat nga siggamatolay nga nasingan ku, iniddannan na ya pitu nga anghel kan taggirisa ra nga vulawan nga malukung nga napannu kan ya gazzit y Afu Dios nga siggamatolay kan awan na nga panda. 8Sangaw, napannu ngin ya templo kan atuk nga naggafu kan ya makatulang nga nawag en ya pakapangngua y Afu Dios. Awan nga makatallung kan ya templo addet zi matumpal ya pitu nga pamazapaziyat nga ipesimmu ya pitu nga anghel.

will be added

X\