Pakakammuan 12

1Sangaw, hinnian/asan kuru mekapakkapalat nga nappasingan kan langit, isa nga babay nga nasinnunan kan ya sinag, nabbatay kan ya vulan, en nakkorona kan mafulu se dua nga bittuan. 2Aggabussit iggina, en nakkarriaw megafu kan ya takit ya attuliwan/appasikal na kannia aggatattam na kannia agganak na. 3Sangaw, hinnian manin mekapakkapalat nga nappasingan kan langit, isa nga dakal nga raggang nga dragon. Pitu ya ulu na nga nakkorona ya kada isa, en mafulu ya tagud na. 4Nekiwag na ya ifut na, en inalak na ya pakkatallu ya bittuan ira kan langit, en nelappak na ira kan ya utun lusak. Sangaw, nanadag ya dragon kan ya atubang ya babay nga mappanget nga mangiyanak, tase alakan na ya anak na so nu mallawan, en kanan na. 5Nanak iggina kan lalaki, en insigida nga nadukkam ya anak na, en ne-angay kan y Afu Dios nga hinnian kan ya trono na. Iggina ya mabbalin kan mammoray kan ngammin nga nasion ira, en istrikto ya ammoray na nga alale aggatammit kan balayang nga baston nga simbulo/sennial ya paka-awayya na. 6Nappaladdiaw ya babay nga minang kan disierto. Hinnian paddianan na kannay nga dana nepaparan y Afu Dios nga katanggawan na kan marivu se duangatut se annammafulu kan algaw. 7Sangaw, hinnian gerra kan langit. Y Miguel en ya kakavulun na nga anghel ira, nakiggerra ra kan ya dragon en kan ya kakavulun na pay nga anghel ira. 8Naffut ya dragon en ya kakavulun na, en awan ngin nga lugar da kan langit. 9Ya dakadakal nga dragon, iggina balalaman tu ziriyan nga nappasingan kan y Eva kattun. Mangngahan iggina kan Diablo onu Satanas, en iggina ya minangngilohot kan ngammin nga totolay kan ya utun lusak. Iggina en ya anghel na ira nga nevulun kan iggina, napatavvar da/napatabbraw ra kan langit, en napatuvvu ra kan ya utun lusak. 10Sangaw, hinnian nasikan nga ngaral nga naginak nga naggafu kan langit nga kunna nga nakkahi, "Luminabbet ngin ya ammalliad y Afu Dios kan ya totolay na en ya pakapangngua na nga mammoray en ya paka-awayya ya Cristo na pay. On, gafu ta pinatuvvu nan y Satanas nga mangaka-akusa kan ya wawwahi tera kan pangurug kan ya atubang y Afu Dios kan algaw en kan gabi. 11Inaffut da iggina megafu kan ya daha ya Kordero, en megafu peba kan ya nepangngikahakahi ra kan ya ergo y Afu Dios. Maski natantalaw ra kan ya angngurug da, mari ra kinengan ya gi-angattan da, maski mattumpal da kan patay. 12Ikayu gafen nga maddian kan langit, maggaragarassia kayu. Ngam ikayu nga maddian kan ya utun lusak en kan ya bebay, pakallallak kayu gafu ta napatuvvu ya diablo kan ya dian nu nga nelot/nafulotan ya gazzit na gafu ta ammu na nga ababba ya tiempo nan." 13Kattu nammuan ya dragon nga napatuvvu igginan kan ya utun lusak, zinaddag na nay nga babay nga nanak kan lalaki. 14Ngam neddan kan ya babay ya dua nga payak ya dakadakal nga tawi/kali, tase makakayab iggina nga umang kan ya disierto nga katanggawan na kan tallu se gaddua kan dahun, tase melisi iggina kan ya dragon. 15Nangitupprak ya dragon kan danum nga alale kayan/wangag tase me-anud ya babay. 16Ngam inuffunan ya lusak iggina. Nagganganga ya lusak nga alale vinukatan na ya simuk na, en sinalunsum na ya danum nga netupprak ya dragon. 17Sangaw, naggazzit ya dragon kan ya babay, en napanaw iggina tase umang makiggerra kan ya dudduma/karruan nga gakagaka ya babay, ira ya mamaraparulot kan ya mandu ira y Afu Dios en massige nga mangurug kan ya nepakammu nga me-annung kan y Jesus. 18Sangaw, nanadag ya dragon kan ya dappit ya bebay.

will be added

X\