Pakakammuan 11

1Sangaw, neddannan nak kan paggukud nga megitta kan baston, en kunna nga nakkahi ya isa kan yakan, "Manadag ka, en angka gukuran ya templo y Afu Dios en ya angngiyofresian/angngidedikan, en bilangan mu ya maddayarayaw ira kan y Afu Dios nga hinnian/asan kannay. 2Ngam marim tangegukud ya lalantaran ya templo gafu ta kuenta meddan yan kan ya totolay nga mari kua y Afu Dios nga ibatabatay ra laman ya nasantuan nga siudad ya Jerusalem kan appattafulu se dua kan vulan. 3Hinnian dua nga testiguk nga nasinnunan kan gonggoti, en bonan ku ira kan ira nay nga totolay tase ipalapalappat da ya ergok kan ira kan marivu se duangatut se annammafulu kan algaw." 4Ira yaw nga dua nga testigu, me-arig kan ya dua fun nga olivo en kan ya dua nga kandelero nga aggatadag kan ya atubang ya Afu na yaw nga interu utun lusak. 5Nu hinnian tolay nga kakkapan na nga patakitan ira, mappalawan ya gissimukan da kan afi nga manidug kan ira yan nga kontra ra, en mawag kan kunna tian ya kapatay ya innia laman nga kakkapan na nga patakitan ira. 6Hinnian pay pakapangngua ra nga mappemmang kan ya uran tase mari moran kan ya algaw ira nga angngipalapalappat da kan ya ergo y Afu Dios. Hinnian pakapangngua ra peba nga mamabbalin kan ya danum ira kan daha, en mamazapaziyat kan ya totolay kan ya utun lusak kan ngammin nga maddumuruma nga panarun kada ikayat da. 7So nu mabalin dan nga mangipalappat kan ya ergo y Afu Dios, hinnian ayam nga mallawan kan ya avvut nga awan na nga pamandanan nga makiggerra kan ira nga dua nga testigu, en affutan en patayan na ira. 8Matalan/Mabattang ya gibbaggian da kan ya kalsada kan ya dakal nga siudad ya Jerusalem nga lugar nga nepatakkan y Afu ra kan kurut kattun. Megafu kan ya narakat/napot nga kukukuan ya totolay kannay, hinnian peba nesimbulowan/nesennialan nga ngahan na, Sodoma onu Egipto. 9Kan tallu se gaddua nga algaw, hinnian totolay nga naggafu kan maddumuruma nga ginafuan, tribu, perergo en nasion kan ya utun lusak nga umang da girawan ya gibbaggian da, en mari ra ipamavulun ya ketanam da. 10Mayayat ya totolay nga maddian kan ya utun lusak megafu kan ya nekapatay ran. Masseleselebra ra, en makkararegeregalu ra gafu ta natay ngin ira nay nga dua nga testigu, gafu ta ira ya namazapaziyat kan ya totolay nga maddian kan ya utun lusak. 11Ngam kabalin ya tallu se gaddua nga algaw, pagginnolayan y Afu Dios ira, en gumangun da, en nelot/nafulotan ya talaw ya totolay nga makasingan kan ira. 12Sangaw, magina ra ya isa nga nasikan nga ngaral nga maggafu kan langit nga kunna nga makkahi kan ira, "Angkayu tiaw!" En kannia aggiraw ya kontra ra ira, umutun kan langit ya dua nga navukkutan kan kunam. 13Kan yan nga orat, mallunig kan nasikisikan. Ya pakkamafulu ya siudad, makkatomba, en pitu rivu nga totolay ya makkakatay kan nay nga lunig. Nelot ya talaw ya totolay nga matalan, en dayarayawan da y Afu Dios nga hinnian kan langit. 14Nabalin ngin ya mekaddua nga ziyat. Sangaw, mappanget nga lumabbet ya mekatallu. 15Sangaw, nattrumpeta ya mekapitu nga anghel, en hinnian na-assikan nga ngaral ira kan langit nga kunda nga nakkahi, "Ya paka-awayya nga mappatul kan ngammin nga totolay kan ya utun lusak, nabbalin kan kua y Afu tera en ya Cristo nan, en mappatul iggina kan awan na nga panda." 16Sangaw, ya duafulu se appat nga lalakay nga aggatuttud kan ya gittronowan da, nallakab da nga naddayarayaw kan ya atubang y Afu Dios nga kunda, 17"O Afu Dios nga Makapangngua kan ngammin nga aggahinnian kattun en kan sangaw, mappabalat kami kan ikaw gafu ta ne-usam ya dakadakal nga pakapangnguam, en namegafu ka nga mappatul ngin. 18Ya totolay kan ya nasion ira, nekalussaw ra ka, ngam luminabbet ngin ya tiempo nga angngipasingan mu kan ya gazzit mu kan ira en ya tiempo nga ammanunut mu kan ya nakkakatay ira. Yaw peba ya tiempo nga angngiddan mu kan premio kan ya totolay nga minasserbi kan ikaw, ira ya profetam, ya totolem, en ngammin ya mangikakua ira kan ikaw pay, maski alinak onu atanang ya kekuentan da. Yaw pay ngin ya tiempo nga annaral mu kan ya manaradaral ira kan ya utun lusak." 19Sangaw, navukatan ya puerta ya templo y Afu Dios kan langit, en kan ya unag na, nasingan ya kaban nga simbulo ya taratu na kan ya totolay na. Sangaw, nakagunuguni, nakatallatallit, naka-addug, nakalunulunig, en nala-alalahu kan nasikan.

will be added

X\