Pakakammuan 1

1Yaw ya nepakammu y Jesu Cristo nga me-annung kan ya mesissimmu nattaruk, en mari na awayya kan mari ra mesimmu. Nepakammu y Afu Dios ira yan kan iggina tase ipakammu na kan ya kohung na ira. Nepakammu na ira yan kannia nepabbon na kan ya isa nga anghel na kan yakan nga kohung na. 2Ipakammuk gafen kan ikayu ya ergo y Afu Dios, yaw nga nepakammu y Jesu Cristo kan yakan, en ngammin nga nasingan ku. 3Ya tolay nga mangibibbid en ya totolay nga maggina kan yaw nga ergo nga naggafu kan y Afu Dios en mamaraparulot kan ya neturak kanniaw, mabendisionan, on, gafu ta aranni ngin ya kesissimmu ngammin ira yaw. 4Yakan y Juan, en iturak ku yaw kan ya iglesia ira y Jesus nga hinnian/asan kan pitu nga siudad kan ya probinsia ya Asia. Pare zinan ta hinnian kan ikayu ya allak en imamak nga maggafu kan y Afu Dios nga hinnian kattun, kan sangaw, en kan awan na nga panda, kan ya pitu nga espiritu nga hinnian kan ya atubang ya trono y Afu Dios, 5en kan y Jesu Cristo nga mapammakatalakkan nga testigu. Kan ngammin nga nakkakatay ira, iggina ya unu-unna nga nagginnolay en iggina ya mammoray kan ngammin nga papatul kan ya utun lusak. Ayatan na ittera, en megafu kan ya daha na, sinueltan na ittera kan ya paka-awayya ya liwaliwat tera kan ittera. 6Pinabbalin na ittera kan totolay nga pammorayan na en kan papari nga massesserbi kan y Afu Dios nga Ama na. Pare zinan ta madayarayaw en mappatul iggina kan awan na nga panda. Amen! 7Maggina kayu! Mattoli iggina nattaruk nga mavulunan kan kunukunam, en ngammin ya totolay, mesipat ya nanuddug ira kan iggina, masingan da iggina. En ngammin ya totolay kan ngammin nga nasion ira, mattangatangit da nattaruk megafu kan iggina. Siguradu, mesissimmu ngammin ira yan! Amen! 8"Yakan ya Alfa en ya Omega," kunna y Afu Dios nga Makapangngua kan ngammin. Hinnian iggina kattun, kan sangaw, en kan awan na nga panda. 9Yakan y Juan nga wahi nu kan pangurug. Kannia neketadday tera kan y Jesus, megitta nak kan ikayu nga mapazapaziyat en mesipat kan ya appatul na en matattam kan ziyat. Nabon nak nga alale presu kan yaw nga fugu ya Patmos gafu ta nepalapalappat ku ya ergo y Afu Dios, yan ya kurug nga sinestiguan y Jesus. 10Kan ya isa nga algaw y Afu, minafun ya Espiritu Santo kan yakan, en naginak ya isa nga nasikan nga ngaral nga megitta kan trumpeta kan ya likud ku. 11Kunna nga nakkahi kan yakan, "Iturak mu kan isa nga papel ya masingan mu, en ipe-angem kan ya iglesia ira y Cristo nga hinnian kan ira yaw nga pitu nga siudad: Efeso, Esmirna, Pergamo, Tiatira, Sardis, Filadelfia en Laodicea." 12Sangaw, nabbira nak, tase innan ku nu innia ya nakiergo kan yakan, en kattu nabbira nak, hinnian pitu nga vulawan nga kandelero nga nasingan ku kan unna. 13Hinnian megitta kan Anak Tolay kan ya pattarangngan da nga nasinnunan kan ananaddu, en aggabanda ya tagang na kan vulawan. 14Furaw ya ulu na en ya ahuk na nga megitta kan furaw nga dudut karneru onu alalahu. Megitta ya mata na kan gumatagatang nga afi. 15Megitta ya taka na kan tubbaha nga napapuro kan afi en nagigitan. Megitta ya ngaral na kan ya guni ya avvonomvor ya aru nga danum. 16Hinnian pitu nga bittuan nga aggatammit na kan ya ziwanan nga ima na. Hinnian nataram nga ispada nga dua ya ngarab na nga nallawan kan ya simuk na, en megitta ya nawag ya muyung/mukat na kan ya nawag ya sinag kan tangnga algaw. 17Kattu nasingan ku iggina, natomba nak kan ya atubang na nga alale natay nak. Ngam nepotun na ya ziwanan nga ima na kan yakan, en kunna nga nakkahi, "Marim mattalaw. Yakan ya unna en ya ultimu, 18en ya siggamatolay. Natay nak kattun, ngam kan sangaw, matolay nak kun kan awan na nga panda. Hinnian kan yakan ya annusi ira ya patay en ya Hades. 19Iturak mu gafen ya ganagannud nga nasingan mu, ya ganagannud nga maddaggun en ya ganagannud nga mesissimmu nattaruk. 20Yaw ya sekreto nga kebalinan ya pitu nga bittuan nga nasingan mu kan ya imak en ya pitu nga vulawan nga kandelero. Ya pitu nga kandelero, ira ya iglesia kan ira yan nga pitu nga siudad. En ya pitu nga bittuan, ira ya anghel kan ira yan nga pitu nga iglesia."

will be added

X\