Filemon 1

1Medduk nga Filemon, yakan y Pablo nga presu megafu kan ya assesserbik kan y Jesu Cristo. Yakan en y Timoteo nga wahi tera kan pangurug, diot mi kan ikaw nga iddukan mi nga megitta kan ikami nga minasserbi kan y Afu Dios, 2en diot mi pay kan y Apia nga wahi tera kan pangurug en kan y Arkipo nga megitta kan ikami nga kuenta suddalu y Jesu Cristo, en kan ya iglesia pay nga marammung kan ya balay nu. 3Pare zinan ta hinnian/asan kan ikayu ya allak en imamak nga maggafu kan y Afu Dios nga Ama tera en kan y Jesu Cristo nga Afu tera. 4Kanakanayun nga kerandamman ta ka kannia addasadasal ku, en mappabalat nak kan y Afu Dios megafu kan ikaw, 5gafu ta nadumug ku ya angngurug mu kan y Afu Jesus en ya angngayat mu kan ngammin nga totolay y Afu Dios. 6Idasadasal ku nga, ya angngipakammum kan ya kurruan mu, padakallan na ya pakakammu ya totolay kan ngammin nga napia nga hinnian kan ittera megafu kan ya neketadday tera kan y Cristo. 7Wahi, megafu kan ya ayat mu, nelot/nafulotan ya payayat ku en nekapasikan ya nonot ku, gafu ta mabannayan ya giffutuan ya totolay y Afu Dios megafu kan ikaw. 8Megafu kan ira yan, awayya na nga nagutuk/naturid/nataggad nak nga mammandu kan ikaw megafu kan ya neketadday tera kan y Jesu Cristo nga kuan mu ya mepangngat. Maski nu kunna tian nak, 9megafu kan ya akka-ayat ta, ipakimallak ku kan ikaw laman ngin nga kuan mu ya ikiddok kan ikaw. Dandamman mu nga yakan y Pablo nga lalakay ngin en presu megafu kan ya nepassesserbik kan y Jesu Cristo. 10Hinnian ipakimallak ku kan ikaw me-annung kan y Onesimo nga anak ku kan pangurug, gafu ta nabbalin nak kan kuenta ama na kannia kasan ku kan karsel. 11Mari kuru napia ya nepasserbi na kan ikaw kattun, ngam kan sangaw, nanguli ngin en nabbalin kan napia ya asserbi na kan ikaw en kan yakan pay. 12Pattollian ku iggina kan ikaw, en kuenta nepevulun ku kan iggina ya futuk, 13maski zinan ikayat ku nga paddianan iggina be laman kan yakan kanniaw nga kuenta talim nga manguffun kan yakan kannia kasan ku kan karsel megafu laman kan ya angngituttulduk kan ya napia nga dumug. 14Ngam marik ikayat nga kuan yaw nu marim bitan ipamavulun, tase ya napia nga kuan mu, marim mafersa, nu azzi megafu kan ya urem pe laman. 15Maffugab ya gafu na kan awan iggina kan ikaw kan ababba nga tiempo laman, tase manoli iggina kan ikaw kan mannanayun. 16Mari na kan kohung laman, ngam mas napia annek/ngam kan kohung ngin; wahim igginan kan pangurug nga medduk kan ittera, nepatalluaring kan yakan, ngam mas peba kan ikaw megafu kan ya kasan na kan ikaw en ya neketadday nu kan y Afu Jesus. 17Gaggafen, nu ikuenta nak nga kagittam kan pangurug, alawatan mu iggina kan kagitta ya angngalawat mu kan yakan. 18Ngam nu hinnian narakat/napot nga kiningngua na kan ikaw onu hinnian gatut na kan ikaw, yakan ya pattukian mu. 19Yakan, Pablo, ya mismu matturak kan yaw kan ikaw. Yakan ya mappaga kan ikaw. Mari zinan mawag kan iparandam ku kan ikaw nga gatut mu kan yakan ya angat mu. 20Gafu ta kurug yan, wahi, napia nu pagustuan nak megafu kan ya neketadday tera kan y Afu Jesus. Banabannayan mu ya futuk megafu kan ya neketadday tera kan y Cristo. 21Kan yakan nga matturak kan yaw, mammakatalak nak nga makuam ya ikiddok kan ikaw, en mas peba kan yan, makuam. 22Isa peba, ikiddok kan ikaw nga mangiparan ka kan paddianan ku, gafu ta innanaman ku nga masueltan nak megafu kan ya dasadasal nu, en makatoli nak kan ikayu. 23Y Epafras nga kavulun ku nga nekarsel megafu kan ya nepassesserbi na kan y Jesu Cristo, ipe-addet na ya diot na kan ikaw. 24Ira Marcos, Aristarco, Demas, en y Lucas nga katrabahuan ku, ipe-addet da pay ya diot da kan ikaw. 25Pare zinan ta hinnian kan ikayu ya allak y Afu Jesu Cristo.

will be added

X\