Filipos 2

1Nu mapasikan ya ginnonotan nu megafu kan ya neketadday nu kan y Cristo, nu mabanabannayan kayu megafu kan ya ayat na, nu metadday kayu kan ya Espiritu Santo, en nu makkara-iddi-idduk en makkara-alla-allak kayu, 2pabbalinan nu kan kompleto ya payayat ku kannia kapakesa ya ginnonotan nu kannia akkara-aya-ayat nu, en kannia aggiritta nu kan ya giffutuan en gi-urayan nu. 3Mari nu mangngua kan hanna laman megafu kan ya akkelug nu nga mammoray onu mekakua kayu, nu azzi mappakalinak kayu, en ikuenta ya kada isa kan ikayu kan mas atanang ya kekuentan ya kakavulun nu annek/ngam kan ikayu pe laman. 4Mari laman kan interesan nu nga kuan ya pammakapianan nu, nu azzi ya pammakapianan ya kakavulun nu pay. 5Mawag kan hinnian/asan kan ikayu ya appanonot nga megitta kan ya nepappanonot y Jesu Cristo. 6Maski hinnian negagangay nga Kinadios na, ne-ammari na nga nesige ya kegitta na kan y Afu Dios 7nu azzi netuluk na yan. Nabbalin kan kohung ya kekuentan na kannia neke-anak na nga nabbalin kan megitta kan tolay. 8Kannia nepabbalin na kan tolay, nappakalinak en siminuluk iggina nga namaraparulot kan ya uray y Afu Dios addet kan ya nepappatay na, on, addet kan ya nepappatay na kan kurut. 9Megafu kan yan, ne-atanang y Afu Dios iggina kan ya katanangan nga kekakuan na, en nengahan na kan iggina ya ngahan nga mas mekakua annek kan ngammin nga gingngahanan. 10Gaggafen, mappalentud nattaruk kan ya atubang y Jesus ngammin ya hinnian kan langit, kan ya utun lusak en kan ya gukab na nga ikakua ra ya ngahan na. 11Ikahi ra ngammin nattaruk nga Afu y Jesu Cristo, tase madayarayaw y Afu Dios nga Ama tera. 12Gaggafen, ideddukan ku ira, kattu kasan ku kan ikayu, kanakanayun nga namaraparulot kayu; kunna tian pay, mas peba kannia kawan ku kan ikayu, italakkurug nu nga ibalin ya kapalliad nu nga hinnian attalaw en ammakakua nu kan y Afu Dios. 13On, gafu ta y Afu Dios ya mattrabahu kan ikayu nga mappapanonot en mappakua kan ikayu kan ya napia nga uray na. 14Kan ngammin nga kukukuan nu, mari nu maddaladalimudum onu makitutturiya, 15tase awan nga kapaliwatan nu onu narakat/napot nga mekivu kan ya ginnonotan nu nga anak ira y Afu Dios nga awan nga mantiamantia nu. On, gafu ta maddian kayu kan ya mundo nga dian ya totolay nga narakat en minalliwat. Mannawag kayu gafen kan ya dian da kan kagitta zilag ira nga mannawag kan ya mundo, 16nga mangikahakahi kan ira kan ya ergo nga mangiddan kan ya kurug nga attolay. Nu kuan nu yan, hinnian kegafanan ya angngidayok kan ikayu nattaruk kan ya algaw nga annoli y Cristo, gafu ta mammuan kan napia ya pattumpalan ngammin ya nabbannabannahan ku en ya sinaratrabahuk kan ikayu. 17Maski nu mapatay nak nga me-arig ya angat ku kan ya me-ofresi/mededika nga mevurud kan ya iyofresi nu megafu kan ya angngurug nu kan y Afu Dios, maggaragarassia nak, en makipaggaragarassia nak kan ikayu ngammin. 18Kunna tian pay, maggaragarassia kayu zinan, en makipaggaragarassia kayu pay kan yakan. 19Nu uray y Afu Jesus, ikayat ku nga bonan y Timoteo kan ikayu kan mallian tase mammuan ku ya me-annung kan ikayu, en mapayayat nak. 20On, gafu ta, kan ya totolay nga hinnian kan yakan, awan nga megitta kan y Timoteo nga kuru agganonot na ya situasion nu. 21On, gafu ta ira ngammin, yan laman ya interesan da, ya pammakapianan da pe laman imbes kan ya me-annung ira kan y Jesu Cristo. 22Mismu ammu nu nga nepasingan y Timoteo ya pia na nga alale matama kami kannia nepangngipakapakammu mi kan ya napia nga dumug. 23Innanaman ku gafen nga insigida bonan ku iggina kan ikayu so nu mammuan ku ya mesimmu kan yakan kannia kapanunut ku. 24Mammakatalak nak kan y Afu nga mari mabbayag, masueltan nak, en makakangay nak kan ikayu. 25Napanonot ku nga mawag kan palabbetan ku kan ikayu y Epafrodito nga wahi tera nga katrabahuan ku en kagittak nga suddalu nga binon nu nga umang mangibaggi/mangitadag kan ikayu nga manguffun kan yakan. 26Ikayat na nga innan ikayu ngammin, en mavurung iggina megafu kan ya nepakakammu na nga nagina nu kan nattakit iggina. 27Kurug nga nattakit iggina en gunese natay! Ngam nekallak y Afu Dios iggina en yakan pay, gafu ta nu awan, hinnian peba dandam nga ne-amung zinan kan ya dandam ku. 28Yan ya gafu na kan apuran ku nga palabbetan iggina kan ikayu, tase mayayat kayu manin nga maningan kan iggina, en mabannayan ya nonot ku kan me-annung kan ikayu. 29Alaban nu iggina gafen kan dakal nga payayat nga mappabalat kan y Afu Jesus, en ikakua nu iggina en ya innia laman nga megitta kan iggina. 30On, gafu ta gunese natay iggina kannia nepassesserbi na kan y Jesu Cristo nga nesubu/nesibba na ya angat na nga mangibaggi kan ikayu nga manguffun kan yakan.

will be added

X\