Mateo 8

1Kattu naddahut da Jesus kan ya bakulud, napakaru ya totolay nga nevulun kan iggina. 2Hinnian/Asan tolay nga hinnian leproso na nga minang kan iggina nga nappalentud kan ya atubang na, en kunna nga nakimemallak, "Hinnian kan ikaw ya pakapangngua nga makapammapia kan yakan. Nu ikayat mu, awayya nak nga pammapian." 3Sinoyat y Jesus ya ima na, sinukkal na iggina, en kunna nga siminabbag, "On, ikayat ku. Mammapia kan!" Insigida nammapia ya leproso na. 4Y Jesus, kunna nga nakkahi, "Siguraduan mu nga marim kayakayan kan innia laman yaw nga nesimmu kan ikaw, nu azzi angka ipasingan ngin ya baggim kan ya pari, en iyofresim/idedikam ya ofresi nga nemandu y Moises kattun, tase hinnian pamakurug kan ya totolay nga napammapia kan." 5Sangaw, kattu luminabbet da Jesus kan ya poblasion ya Capernaum, hinnian isa nga taga Roma nga kapitan ya matut nga suddalu nga minaranni kan iggina, en kunna nga nakimemallak, 6"Afu, hinnian babbonan ku kan balay nga agga-idda nga mari makaguyu gafu ta grabe ya takit na. Afu, kazzen ta pammapian mu iggina." 7Y Jesus, kunna nga nakkahi, "Annak tase pammapian ku iggina." 8Ngam ya kapitan, kunna nga siminabbag, "Afu, mari mepangngat nga tumallung ka kan ya balek. Kayan mu laman nga mammapia ya babbonan ku, en matumpal ngin. 9On, gafu ta maski yakan, hinnian pakimorayan ku, en hinnian pay suddalu ira nga makimoray kan yakan. Nu kayan ku kan ya isa, 'Angka kannay,' umang iggina. Nu kayan ku kan ya isa, 'Angka kanniaw,' umang iggina. En nu kayan ku kan ya isa nga babbonan ku, 'Kuan mu yaw,' kuan na." 10Nalagat y Jesus kannia nepakagina na kan yan, en kunna nga nakkahi kan ya totolay nga nevulun kan iggina, "Kurug ya kayan ku kan ikayu, maski kan ya Israelita ira, marik peba nakasimmu kan tolay nga megitta ya angngurug na kan ya angngurug na yaw nga tolay nga mari mamba Israelita. 11Kayan ku kan ikayu, napakaru ya mari Israelita nga maggafu kan silawan en kan taggappan, en umang da nga makipanuttud nattaruk kan ira Abraham, Isaac, en y Jacob kan ya bikat ya lamesa kan ya pappatulan y Afu Dios kan langit. 12Ngam kan ya mesipat zinan kan ya pappatulan na, napakaru ya melappak kan ya liwan nga kokopan/kallap, en makatangatangit en mangngarangaritam/mangngaratenget da kannay." 13Sangaw, kunna y Jesus nga nakkahi kan ya kapitan, "Lumabbet kan, en ya kurruan mu, mesimmu." Nammapia ya babbonan na mismu kan yan nga orat nga nepakkahi na. 14Minang da Jesus kan ya balay y Pedro, en kattu siminallung da, nasingan na ya katuangan y Pedro nga babay nga agga-idda nga makkulikug. 15Sinukkal y Jesus ya ima na, nemmang ya kulikug na, en guminangun iggina, en sinerbian na ira. 16Kattu nammazzilam ngin, aru ya ne-angay ya totolay kan y Jesus nga inafunan narakat/napot nga espiritu ira. Kan ya isa nga ergo na laman, pinappaw na ya narakat nga espiritu ira, en pinammapia na ngammin ya makkatakit ira. 17Kannia nepangngua na kan yan, natumpal ya neturak y Isaias nga profeta kattun, "Kinattu na ya tulutulahan tera, en inazzan na ya takatakit tera." 18Kattu nasingan y Jesus ya aru nga totolay kan ya pallehut na, kinahi na kan ya disipulo na ira nga maddakit da nga umang kan ya tangapingit ya dakal nga danum ya Galilea. 19Kallie ya nepaddakit da, hinnian mestru kan ya dorob nga minang kan y Jesus, en kunna nga nakkahi, "Mestru, mevulun nak kan ikaw kan maski kanna be tiaw nga angayan mu." 20Kunna y Jesus nga siminabbag, "Ya aya-ayam kan ya kakayuan, hinnian gibbalonan da; en ya mammanuk ira, hinnian gittuhutan/gissubutan da nga paddianan da; ngam yakan nga Anak Tolay, awan nga mannayun nga paddianan ku nga pakkaturruan." 21Hinnian peba isa nga disipulo na nga kunna nga nakkahi kan iggina, "Mestru, pavulunan nak bitan nga lumabbet, gafu ta annak tanamman y amak." 22Ngam y Jesus, kunna nga siminabbag, "Awan! Mevulun ka kan yakan. Porrian mu, gafu ta ya totolay nga arig natay, ira pe laman ya mangitanam kan ya minatay ra." 23Kattu nattakay y Jesus kan barangay, nevulun ya disipulo na ira kan iggina. 24Mari nabbayag, gavvat nga nabbayabbag kan ya dakal nga danum, en nasukkayan/nasikkuayan ya barangay kan ya daddakal nga palapalung, en mappanget ngin nga lumammad. Ngam aggakaturug y Jesus. 25Sangaw, linukag da iggina nga kunda nga nakkahi, "Afu! Makkalimat teran! Palliaran mu ittera!" 26Ngam y Jesus, kunna nga nakkahi, "Ka-am ta mattalaw kayu? Avva/Hanna ma ya kabissang/kabissut ya angngurug nu." Sangaw, guminangun iggina, nemandu na kan memmang ya angin en ya palapalung, en nakkalma ya danum. 27Nalagat da ngammin, en kunda nga nakkaporovut, "Hanna pano ya klase na yaw nga tolay? On, gafu ta maski ya angin en ya palapalung, parulotan da iggina." 28Sangaw, nakakaddet da Jesus kan ya tangapingit ya dakal nga danum ya Galilea nga lugar ya Gadareno ira. Hinnian dua nga tolay nga inafunan narakat nga espiritu ira, en awan nga tolay nga makapattalebad kannay megafu kan ya nelot nga kamengal da. Naggafu ra kan ya kueba ira nga attanamman nga minang ziminafung kan y Jesus. Minaranni ra kan iggina, 29en kunda nga nangikullet, "O, Anak y Afu Dios, hanna ya kuan mu kan ikami? Angka kazze/pano nga kastigowan ikamin maski mari na peba nga orat?" 30Kan mari kuru arayyu, hinnian napakaru nga bavi nga maddaggun nga mangan. 31Sangaw, nepakimemallak ya narakat nga espiritu ira kan iggina, "Nu pappawan mu ikami, kazzen ta pavulunan mu ikami laman ngin nga umafun kan ira nay nga bavi." 32Kunna y Jesus nga siminabbag, "Angkayun." Gaggafen, napanaw ya narakat nga espiritu ira kan ya dua nga tolay, en minafun da kan ya bavi ira. Nappalapaladdiaw ra gafen ngammin en nakkakkawat da nga nattuvvu/nattabbraw kan ya dakal nga danum, en nakkalimat dan. 33Sangaw, ya manaron ira kan ya bavi ira, nappaladdiaw ra pay nga minang kan ya poblasion, nepadapadumug da ngammin ya nesimmu kan ya bavi ira en kan ya dua nga tolay pay nga dana inafunan ya narakat nga espiritu ira. 34Gaggafen, ngammin ya totolay kan nay nga poblasion, minang da iningan y Jesus, en kattu nasingan da iggina, nepakimemallak da nga panawan na ya lugar da.

will be added

X\