Mateo 4

1Negiya ya Espiritu Santo y Jesus nga naggadang kan ya disierto tase tentasionan y Satanas iggina. 2Mari nanganangan y Jesus kan appattafulu nga algaw en appattafulu nga gabi, en kabalin na yan, nabisin iggina. 3Minang y Satanas kan y Jesus, en kunna nga nakkahi kan iggina, "Nu ikaw ya Anak y Afu Dios, pabbalinan mu ira yaw nga batu kan pan." 4Ngam y Jesus, kunna nga siminabbag kan iggina, "Kayan na kan ya Sagrado nga Turak, 'Mari na kan pan laman ya pakkatolay, nu azzi ngammin pay ya ergo nga maggafu kan ya simuk y Afu Dios.' " 5Sangaw, ne-angay y Satanas y Jesus kan ya nasantuan nga siudad nga Jerusalem, en pinatadag na iggina kan ya alintutuhu ya templo, 6en kunna nga nakkahi, "Nu ikaw ya Anak y Afu Dios, mattuvvu/mattabbraw ka, gafu ta kayan na kan ya Sagrado nga Turak, 'Manduan y Afu Dios ya anghel na ira kan me-annung kan ikaw,' en neturak peba, 'Tarakaban da ka kan ya ima ra tase mari mabiaran ya takam kan batu.' " 7Y Jesus, kunna nga siminabbag, "Kayan na peba kan ya Sagrado nga Turak, 'Marim purban y Afu nga Dios mu.' " 8Sangaw, ne-angay y Satanas y Jesus kan ya pentur ya isa nga atanang nga bakulud, en nepasingan na kan iggina ngammin ya pappatulan kan ya utun lusak en ya kasta ra pay, 9en kunna nga nakkahi kan iggina, "Iddan ku ngammin ira yan kan ikaw nu mappalentud ka en dayarayawan nak." 10Sangaw, y Jesus, kunna nga siminabbag kan iggina, "Satanas, panawan nak! Kayan na kan ya Sagrado nga Turak, 'Y Afu nga Dios mu ya dayarayawan mu, en iggina laman ya passerbian mu.' " 11Sangaw, pinanawan y Satanas y Jesus, en hinnian/asan anghel ira y Afu Dios nga minang nananggaw kan iggina. 12Nekarsel y Juan, en kattu nadumug y Jesus yan, nattoli iggina kan ya probinsia ya Galilea. 13Napanaw iggina kan ya babalay ya Nazaret, en minang naddian kan ya poblasion ya Capernaum nga aranni kan ya dakal nga danum ya Galilea. Yan nga lugar, naddianan ya gakagaka y Zabulon en y Neftali kattun. 14Kattu kiningngua na yan, natumpal ya neturak y Isaias nga profeta kattun, 15"Kan ya lugar nga paddianan ya gakagaka y Zabulon en y Neftali nga aranni kan ya dakal nga danum kan ya taggappan ya Kayan/Wangag Jordan, kan Galilea, lugar ya mari Judio ira, 16ya totolay nga mattolay kan kokopan/kallap, nakasingan da kan dakal nga zilag, en ya totolay nga mattolay kan ya lugar nga alinaw ya patay, nanawahan dan." 17Namegafu kan yan nga algaw, pinegafanan y Jesus ya nangipalapalappat nga kunna, "Mabbabawi kayu gafu ta aranni ngin ya appatul y Afu Dios." 18Kannia annaladalan y Jesus kan ya dappit ya dakal nga danum ya Galilea, nasingan na y Simon en y Andres nga mawwahi nga minaggimmanangat/minaggesesira. Y Simon, nangahanan pay kan Pedro. Maddaggun da nga memmanangat. 19Y Jesus, kunna nga nakkahi kan ira, "Mevulun kayu kan yakan, en pabbalinan ta kayu kan minaggimmanangat kan totolay." 20Insigida nga pinanawan da ya sonsoru ra, en nevulun da kan iggina. 21Nassige ra nga nanaladalan, en nasingan na pay ya dua peba nga mawwahi, y Santiago en y Juan nga anak ira y Zebedeo. Hinnian da kan iggina kan ya barangay ra nga paddaggunan da nga paranan ya sonsoru ra, en inarut na ira. 22Insigida nga pinanawan da ya barangay en ya ama ra, en nevulun da kan iggina. 23Sangaw, inangayan da Jesus ya lugar ira kan ya interu probinsia ya Galilea. Nattuttuldu iggina kan ya sinagoga ra ira, en nepalapalappat na ya napia nga dumug nga me-annung kan ya appatul y Afu Dios. Pinammapia na ya totolay kan ngammin nga klase takit en tulahan da. 24Megafu kan ira yan, nadumudumug iggina addet kan ya nasion ya Siria. Ne-angay ra gafen kan iggina ngammin tu hinnian tulahan en takitan da ira, totolay nga inafunan narakat/napot nga espiritu ira, totolay nga mattukutukaran en paralitiko ira, en pinammapia na ira ngammin. 25Napakaru ya totolay nga ne-evulun kan y Jesus nga naggafu kan ya probinsia ya Galilea, kan ya lugar ya Mafulu nga Siudad, kan ya siudad ya Jerusalem, kan ya probinsia ya Judea, en kan ya lugar ira kan ya tangapingit ya Kayan Jordan.

will be added

X\