Mateo 27

1Kattu nammataruk ngin, ngammin ya panakallan kan ya papari en ya lalakay ira nga panakallan kan ya Judio ira, nerergowan da ya appapatay ra kan y Jesus. 2Nepabalud da iggina, nepanaw ra kannay en ne-angay ra kan y Pilato nga gubernador. 3Y Judas nga nangiyalawat kan y Jesus, kattu nammuan na nga nasentensian iggina nga mapatay, nabbabawi iggina kan ya liwat na, en netoli na ya tallufulu aggat nga pirak nga plata kan ya panakallan ira kan ya papari en ya lalakay ira nga panakallan, 4en kunna nga nakkahi, "Nalliwat nak kannia nepangngiyalawat ku kan tolay nga awan na mamba liwat." Kunda nga nakkahi, "Awan nga ammu mi kan yan. Ikaw pe laman ya tumabbag kan yan." 5Nebarad na ya pirak ira nga plata kan ya paratubangan da kan ya lalantaran ya templo, napanaw iggina, minang na ginalutan ya karalong na, en nebesin na iggina pe laman. 6Sangaw, zinumat ya panakallan ira kan ya papari ya pirak ira nga plata, en kunda nga nakkahi, "Igamma ya dorob tera nga mekkua/meppay yaw nga kuartu kan ya tesureria ya templo gafu ta yaw ya paga ya angat ya isa nga tolay nga napatay." 7Sangaw, nerergowan da ya kuan da kan yan nga kuartu, en negatang da kan ya koman ya minappanday kan banga; ginatang da kan para kan attanamman kan dayu ira. 8Gaggafen, nangahanan yan nga koman kan Koman Daha, en yan ya ngahan na addet kan sangaw nga algaw. 9Kannia nepangngua ra kan yan, natumpal ya neturak y Jeremias nga profeta kattun nga kunna, "Inalak da ya tallufulu aggat nga pirak nga plata nga paga ya angat ya isa nga tolay nga nakkara-anahutan ya dudduma/karruan nga Israelita nga pamaga ra kan iggina, 10en negatang da kan ya koman ya minappanday kan banga segun kan ya nemandu y Afu Dios kan yakan." 11Sangaw, nanadag y Jesus kan ya atubang ya gubernador. Inimbistiga na y Jesus nga kunna nga namovut, "Ikaw kazze/pano ya patul ya Judio ira?" Y Jesus, kunna nga siminabbag, "Nakahi mun." 12Sangaw, ya panakallan ira kan ya papari en ya panakallan nga lalakay ira, inakusan da iggina, ngam awan vulvua/pulus netabbag na kan ira. 13Sangaw, y Pilato, kunna nga namovut kan iggina, "Marim kazze nagina ya karu ya pangakusan da kan ikaw?" 14Ngam awan nga netabbag y Jesus, maski isa kan ya nangakusan da kan iggina, en kuru nappabbaw y Pilato kan yan. 15Kada dahun, kan ya Fiesta ya Nepattalebad, aggangngua ya gubernador nga manuelta kan ya innia laman nga presu nga ikiddaw ya totolay. 16Kan yan nga tiempo, hinnian/asan madumudumug nga presu nga mangngahan kan Barabas. 17Kattu narammung ya totolay kan ya atubang y Pilato, kunna nga namovut kan ira, "Innia ya ikayat nu nga sueltan ku, y Barabas onu y Jesus nga makahi kan Cristo?" 18Pinovutan na yan kan ya totolay, gafu ta ammu na nga ne-angay ya konseho y Jesus kan iggina megafu kan ya passil da kan iggina. 19En mari na kan yan laman. Kannia iggina nga aggatuttud kan ya trono nga pamanunutan na, nabbon ya atawa na kan mangikahi kan iggina, "Awan nga kuan mu zinan kan yan nga natunung nga tolay, gafu ta nelot ya nekapazapaziyat ku megafu kan iggina kan ya tatenap ku kattu gabi." 20Sangaw, ya panakallan ira kan ya papari en ya lalakay ira nga panakallan, binensi ra ya totolay nga ikiddaw ra kan y Pilato nga y Barabas ya sueltan na, en ipapatay na y Jesus. 21Kunna manin y Pilato nga namovut kan ira, "Innia kan ira yaw nga dua ya ikayat nu nga sueltan ku?" Kunda nga siminabbag, "Y Barabas." 22Kunna manin nga namovut y Pilato, "Hanna gafen ya ikayat nu nga kuan ku kan y Jesus nga makahi kan Cristo?" Kunda ngammin nga siminabbag, "Ipepatak mu iggina kan kurut." 23Kunna y Pilato nga namovut, "Ka-am? Hanna kazze ya narakat/napot nga kiningngua na?" Ngam mas kunda nga nangikakkarriaw, "Ipepatak mu iggina kan kurut!" 24Nasingan y Pilato nga awan nga efekto ya kinahi na kan ya totolay. Imbes kan memamak da zinan, pinegafanan da ya naggulugulu lallaman ngin. Nappalak iggina gafen kan danum, en binaggawan na ya ima na kan ya paratubangan ya totolay, en kunna nga nakkahi kan ira, "Bakkan kan yakan ya tumabbag kan ya kapatay yaw nga tolay nu azzi ikayu pe laman." 25En ngammin ya totolay, kunda nga siminabbag, "Ikami en ya gakagaka mi ya tumabbag kan ya kapatay na." 26Sangaw, sinueltan y Pilato y Barabas para kan ira, en kabalin ya nepappalatigu na kan y Jesus, nemandu na kan ya suddalu ira nga ipatak da iggina kan kurut. 27Sangaw, ya suddalu ira ya gubernador, netallung da y Jesus kan ya palasio ya gubernador, en inammung da ngammin ya suddalu ira nga guardia ya palasio kan ya atubang y Jesus. 28Inazzan da ya sinnun na, en binistian da iggina kan anaddu nga raggang. 29Nanalapid da kan korona nga nasasit, en nekorona ra kan ya ulu na. Pinatammitan da ya ziwanan nga ima na kan bilak. Nappalentud da kan ya atubang na, en kunda nga nangaffugete kan iggina, "Diot mi kan ikaw, Patul ya Judio ira!" 30Linusulusaban da iggina, en inalak da ya bilak en nepalapaluk da kan ya ulu na. 31Kabalin da nga nangaffugete kan iggina, inazzan da ya nebisti ra kan iggina, en nesinnun da uli kan iggina ya sinnun na pe laman. Sangaw, nelawan da iggina kan ya palasio tase iyangay ra en ipatak da kan kurut. 32Kattu nallawan da, hinnian tolay nga mangngahan kan Simon nga taga siudad ya Cirene nga nadafung da. Finersa ya suddalu ira nga nepakattu kan iggina ya kurut y Jesus. 33Kattu nakakaddet da kan ya lugar nga nangahanan kan Golgota, ya kebalinan na, Lugar Baritottok, 34iniddannan da y Jesus kan daggat vunga ubas nga nakihuan kan adu, ngam kattu natantaman na, mari na ininum balalaman. 35Inazzan ya suddalu ira ya sinnun na ira, en kattu nepatak da iggina kan ya kurut, narririfan da nga nabbirillayan ya sinnun na ira. 36Sangaw, nanuttud da, en ginuardian da iggina kannay. 37Kan ya utun ya ulu na, nekkua ra ya neturak nga nakusan na, YAW Y JESUS NGA PATUL YA JUDIO IRA 38Hinnian dua pay nga tulisan nga negindan kan y Jesus nga nepatak kan kurut, ya isa kan ya ziwanan na, en ya isa kan ya zimigi na. 39Ya totolay nga nattatalebad kannay, nawwarawarangiwang da, en kunda nga nangaffugete kan iggina, 40"Ikaw nga nakkahi nga darallan mu ya templo en patadaggan mu uli kan tallu nga algaw, nu ikaw ya Anak y Afu Dios, palliaran mu ikaw pe laman ngin en makkazzat ka kan ya kurut!" 41Ya panakallan ira kan ya papari, ya mestru ira kan ya dorob, en ya lalakay ira nga panakallan, kunna tian pay ya nepangngaffugete ra kan iggina nga kunda, 42"Pinalliad na kanu ya dudduma, ngam mari na bitu mapalliad iggina pe laman. Iggina kanu ya patul ya Israel; mazzittag zinan iggina kan ya kurut nan. Nu kuan na yan, mangurug kami kan iggina. 43Nammakatalak iggina kan y Afu Dios, en kinahi na nga iggina ya Anak y Afu Dios. Innan tera gafen nu ikayat y Afu Dios nga palliaran iggina." 44Maski pay ya tulisan ira nga negindan nga nepatak kan kurut kan ya bikat y Jesus, kunna tian pay ya nepangngaffugete ra kan iggina. 45Kan tangnga algaw, nakkokopan/nakkallap ya interu nga lugar kannay addet kan alas tres kan giram. 46Kan magga-alas tres, kunna y Jesus nga nangikarriaw, "Eli, Eli, lama sabaktani," ya kebalinan na, "Dios ku, Dios ku, ka-am ta pinopporrian nak?" 47Ya dudduma nga totolay nga aggatadag kannay, nagina ra iggina nga nakkarriaw, en kunda nga nakkahi, "Inakkulan na y Elias!" 48Sangaw, hinnian isa kan ira nga nappaladdiaw nga minang nangalak kan ispongha nga nedassam na kan nalsam nga vunga ubas. Nekkua na kan ya pansaw ya isa nga takkuel, en negawat na kan ya simuk y Jesus, en nepasappat na kan iggina. 49Ngam ya dudduma, kunda nga nakkahi kan yan nga tolay, "Porrian mu iggina! Innan tera nu umang italak y Elias iggina." 50Sangaw, nakkarriaw manin y Jesus kan nasikan, en natay igginan. 51Sangaw, nallunig, nakkagaddua ya batu ira, en ya kurtina nga aggabesin kan ya unag ya templo, napissang nga nakkaddua, namegafu kan ya utun addet kan ya gukab. 52Navvukat ya netanamman ya nakkakatay ira, en aru ya totolay y Afu Dios nga nakkakatay kattun nga nagginnolay. 53Nallawan da kan ya netanamman da kabalin ya nepagginnolay y Jesus, en minang da kan Jerusalem nga nasantuan nga siudad, en napakaru ya nakasingan kan ira kannay. 54Ya kapitan en ya suddalu na ira nga nagguardia kan y Jesus, kattu natenap da ya lunig en nasingan da ya nesissimmu, nelot ya talaw ra, en kunda nga nakkahi, "Kurug nga Anak ya Dios yaw nga tolay!" 55Hinnian pay aru nga babbay kannay nga naggiraw kan mediu arayyu. Ira yan ya babbay nga ne-evulun en nassesserbi kan ira Jesus namegafu peba kan ya probinsia ya Galilea. 56Ya dudduma kan ira yan nga babbay, y Maria Magdalena, y Maria nga ina y Santiago en y Jose, en ya ina ya anak ira y Zebedeo. 57Kattu maggireram ngin, hinnian riku nga tolay nga mangngahan kan Jose nga isa pay nga nangurug kan y Jesus nga taga babalay ya Arimatea nga luminabbet kannay. 58Kallie na yan, minang iggina kan y Pilato, en nekiddaw na kan iggina ya angngalak na kan ya baggi y Jesus. Sangaw, nemandu y Pilato nga meddan ya baggi na kan iggina. 59Sangaw, inalak y Jose ya baggi na, en vinukkutan na kan narenu nga lino nga tela, 60en nepetanam na kan ya attanamman na nga bahu nepakokkob na nga sinan kueba kan ya dadap. Sangaw, nangarolig da kan dakal nga batu nga netallab da kan ya attallungan kan ya netanamman na, en napanaw ran. 61Hinnian da Maria Magdalena en ya isa nga Maria kannay nga aggatuttud kan mediu arayyu kan ya netanamman na. 62Kan kamatarukan na, yan ya algaw nga angngilinan da, ya panakallan ira kan ya papari en ya Fariseo ira, narammung da kan ya atubang y Pilato, 63en kunda nga nakkahi, "Mekakua nga Gubernador, kerandamman mi ya kinahi na nay nga minalladdaladdud/minabbusubusid nga tolay kattu katolay na peba. Kinahi na nga kabalin ya tallu nga algaw, magginnolay kanu iggina. 64Gaggafen, ipaguardiam ya netanamman na addet kan ya mekatallu nga algaw, gafu ta marakat laman nu umang kokotan ya disipulo na ira ya baggi na, en kayan da kan ya totolay nga nagginnolay iggina. Nu mesimmu yan, mabbalin kan mas narakat yan nga pangilloko annek/ngam kan ya unna." 65Y Pilato, kunna nga nakkahi, "Hinnian guardia nu ira. Ipaguardia nu ya netanamman na kan ya panda mawayya nu." 66Gaggafen, minang da kan ya netanamman na, en nesiguradu ra kan napia kannia nepannimbre ra kan ya batu en kannia nepappaguardia ra kan yan.

will be added

X\