Mateo 25

1Nassige y Jesus nga kunna nga nakkahi, "Nattaruk nu manoli nak nga Anak Tolay kan ya utun lusak, meparig ya appatul y Afu Dios kan mafulu nga mammaginganay nga nangivulun kan ya gi-allamparanan da nga umang dumafung kan ya nobio. 2Lima kan ira, kurang ya appanonot da, en lima pay kan ira, masirib. 3Ya lima nga kurang ya appanonot da, kattu inalak da ya gi-allamparanan da, awan nga nevulun da nga reserba ra nga denu olivo para kan ya gi-allamparanan da. 4Ngam ya lima nga masirib, nangivulun da kan reserba nga denu. 5Sangaw, nabayag ya nepallabbet ya nobio, en kannia attalattaron da kan iggina, mallollomad da, en sangaw, nakakaturug da. 6Kan tangnga gabi, hinnian/asan kunna nga nangikullet, 'O, hinnian ngin ya nobio! Angkayu dafungan igginan!' 7Sangaw, nakkalukag ya mafulu nga mammaginganay, en pinegafanan da nga pinaran ya gi-allamparanan da. 8"Sangaw, ya lima nga kurang ya appanonot da, kunda nga nakkahi kan ya lima nga masirib, 'Kazzen ta iddannan nu ikami kan denu olivo nu, gafu ta nofutan kami, en maddap ya gi-allamparanan min!' 9"Ngam ya lima nga masirib, kunda nga siminabbag, 'Awan! Mari na awayya, gafu ta maffugab, mari makalannat ya denu mi kan ittera ngammin. Angkayu gumatang kan para kan ikayu pe laman.' 10Kannia ira nga minang guminatang, luminabbet ya nobio. Ya lima nga masirib nga nakaparan, nevulun da kan iggina nga siminallung kan ya balay nga pabbodan, en sangaw, naserran ya puerta ngin. 11"Mari nabbayag, luminabbet ya lima nga mammaginganay nga kurang ya appanonot da, en kunda nga nangikullet, 'Afu! Afu! Kazzen ta patallungan mu ikami!' 12"Ngam ya nobio, kunna nga siminabbag, 'Kurug ya kayan ku kan ikayu, mari ta kayu inamammu.' " 13Kan ya pangultimuan ya pangngarrian y Jesus, kunna nga nakkahi, "Gaggafen, mawag kan siggaparan kayu kan ya annolik, gafu ta mari nu ammu ya algaw onu ya orat na." 14"Ya mesimmu nattaruk nu manoli nak kan ya utun lusak, meparig kan ya mesimmu kan yaw nga pangngarrian ku. Hinnian tolay nga naggannukat nga umang kan isa nga lugar. Kallie na nga napanaw, nepakkul na ya kohung na ira, en nekatalak na kan ira ya kukua na ira, 15segun kan ya makua ya kada isa. Iniddannan na ya isa nga kohung na kan lima nga talento, ya mekaddua, dua, en ya mekatallu, isa. Kabalin na, napanaw igginan. 16"Sangaw, ya tolay nga nangalawat kan lima nga talento, minang na insigida nenigosio, en nakaganansia iggina kan lima nga talento. 17Kunna tian pay ya kiningngua ya nangalawat kan dua nga talento, en nakaganansia pay iggina kan dua nga talento. 18Ngam ya nangalawat kan isa nga talento, minang nakkokkob kan ya lusak, en nesussuk na ya kuartu ya afu na kannay. 19"Kabalin ya anaddu nga tiempo, luminabbet ya afu ra. Nepakkul na ira, en pinovutan na nu hanna ya kiningngua ra kan ya kuartu na nga nekatalak na kan ira. 20Sangaw, ya tolay nga nangalawat kan lima nga talento, minaranni kan iggina nga nangivulun kan ya lima peba nga naganansia na en kunna nga nakkahi, 'Afu, iniddannan nak kan lima nga talento. Die peba ya lima nga talento nga naganansiak.' 21"Ya afu na, kunna nga siminabbag, 'Napia ya kiningnguam. Napia en mapammakatalakkan ka nga kohung. Gafu ta napammakatalakkan ka kan bissang/bissut, tunnakkan ta ka nga ingkargadu kan mas aru peba, en makipayayat ka kan yakan nga afum.' 22"Sangaw, nappatubbat nga minaranni kan iggina ya nangalawat kan dua nga talento, en kunna nga nakkahi kan ya afu na, 'Afu, iniddannan nak kan dua nga talento. Die peba ya dua nga talento nga naganansiak.' 23"Ya afu na, kunna nga siminabbag, 'Napia ya kiningnguam. Napia en mapammakatalakkan ka nga kohung. Gafu ta napammakatalakkan ka kan bissang, tunnakkan ta ka nga ingkargadu kan mas aru peba, en makipayayat ka kan yakan nga afum.' 24"Sangaw, nappatubbat pay nga minaranni kan iggina ya nangalawat kan isa nga talento, en kunna nga nakkahi, 'Afu, ammuk nga istrikto ka. Mangapa-apit ka kan marim nemula, en maka-alak ka kan marim nabbannahan. 25Megafu kan ira yan, nattalaw nak kan ikaw, en minang ku nesussuk ya kuartum kan ya unag ya lusak. Die ya kuartum.' 26"Ngam ya afu na, kunna nga siminabbag, 'Narakat/Napot en talakag ka nga kohung! Ammum kazze/pano nga mangapa-apit nak kan marik nemula, en maka-alak nak kan marik nabbannahan? 27Nebangkum zinan gafen laman ngin ya kuartuk, tase sangaw, kannia kasan kun, malawat ku zinan yan en ya tuhu na pay.' 28Kunna nga nakkahi kan ya dudduma/karruan nga kohung na, 'Alakan nu ya talento kan iggina, en iddan nu kan ya tolay nga hinnian mafulu nga talento na. 29Kayan ku yaw gafu ta, kada tolay nga dana hinnian kua na, mas aru peba ya meddan kan iggina, en mas umaru ya hinnian kan iggina. Ngam ya tolay nga awan na nga kua, maski ya bissang nga hinnian kan iggina, malak peba kan iggina. 30Sangaw, ilappak nu kan ya liwan nga kokopan/kallap yaw nga kohung nga awan na nga serbi. Ya maddian ira kannay, mattangatangit en mangngarangaritam/mangngaratenget da.' " 31"Nattaruk nu manoli nak nga Anak Tolay nga mekapakkapalat kan yaw nga mundo nga vulunan ngammin ya anghel ira, manuttud nak kan ya mekapakkapalat nga tronok. 32Ngammin ya totolay kan ya mundo, maparammung da kan ya atubang ku. Pakkasinnan ku ira kan dua nga grupo kan kagitta ya angngisinna ya isa nga minappastor kan ya karneru ira en ya kazzing ira. 33Paddianan ku ya natunung ira nga arig karneru kan ya ziwanan ku, en paddianan ku ya narakat ira nga arig kazzing kan ya zimigik. 34Sangaw, yakan nga patul, kungku nga makkahi kan ya totolay nga hinnian kan ya ziwanan ku, 'Ikayu nga binendisionan y Amak, tumallung kayu kan ya pappatulan y Afu Dios nga naparan para kan ikayu namegafu kattu nekaparatu ya mundo. 35On, gafu ta, kattu nabisin nak, pinakan dak; kattu nawwaw nak, pinenum dak; kattu minang nak nga dayu kan ya lugar nu, inalaba rak kan ya gibbalayan nu; 36kattu mawag ku ya sinnun, iniddannan dak; kattu nattakit nak, sinanggaw rak; en kattu nekarsel nak, minang dak nga binisita.' 37"Sangaw, ya natunung ira, kunda nga mamovut, 'Afu, kannia kazze ya nepakasingan mi kan ikaw nga nabisin, en pinakan mi ikaw, onu nawwaw, en pinenum mi ikaw? 38En kannia ya nepakasingan mi kan ikaw nga dayu kan ya lugar mi, en inalaba mi ikaw kan ya gibbalayan mi, onu mawag mu ya sinnun, en iniddannan mi ikaw? 39En kannia ya nepakasingan mi kan ikaw nga nattakit onu nekarsel, en binisita mi ikaw?' 40"En yakan nga patul, kungku nga tumabbag, 'Kurug ya kayan ku kan ikayu, nu kiningngua nu ya kunna tian ira kan ya innia laman nga wahik kan pangurug nga kalinakkan kan kekuentan, kuenta kiningngua nu yan kan yakan pay.' 41"Sangaw, kungku nga makkahi pay kan ya totolay nga hinnian kan ya zimigik, 'Ikayu nga neged/nebanu/nelunud y Afu Dios, umarayyu kayu kan yakan! Angkayu kan ya afi nga mari vulvua/pulus maddap kan awan na nga panda nga naparan para kan y Satanas en ya anghel na ira. 42On, gafu ta, kattu nabisin nak, mari rak pinakan; kattu nawwaw nak, mari rak pinenum; 43kattu minang nak nga dayu kan ya lugar nu, mari rak inalaba kan ya gibbalayan nu; kattu mawag ku ya sinnun, mari rak iniddannan; en kattu nekarsel nak onu nattakit nak, mari rak binisita.' 44"Sangaw, ya totolay nga hinnian kan ya zimigik, kunda nga mamovut kan yakan, 'Afu, kannia kazze ya nepakasingan mi kan ikaw nga nabisin, onu nawwaw, onu dayu kan ya lugar mi, onu mawag mu ya sinnun, onu nattakit, onu nekarsel en mari mi inuffunan ikaw?' 45"Sangaw, kungku nga tumabbag, 'Kurug ya kayan ku kan ikayu, gafu ta mari nu inuffunan ya innia laman nga tolay nga kalinakkan kan kekuentan, kuenta mari rak pay inuffunan.' 46Sangaw, mabon ira yan nga totolay kan ya kakastigowan da kan awan na nga panda. En ya natunung ira, umang da kan ya paddianan da kan awan na nga panda."

will be added

X\