Mateo 24

1Nallawan da Jesus kan ya lalantaran ya templo, en kannia annaladalan da nga mapanaw, minaranni ya disipulo na ira kan iggina, en nepasingan da ya napatadag ira nga templo. 2Ngam kunna nga siminabbag kan ira, "Masingan nu ira yan ngammin nga napatadag, azze?/awan kasi? Kurug ya kayan ku kan ikayu, awan vulvua/pulus nattaruk batu nga matalan/mabattang nga makkaporotun, gafu ta makkadabbak da ngammin." 3Sangaw, minang da Jesus kan ya Bakulud Olivo, en kannia iggina nga aggatuttud kannay, minaranni ya disipulo na ira kan iggina nga ira laman, en kunda nga namovut, "Kayan mu kan ikami nu so nu innia ya kesimmu na ira yan nga bahu kinahim. Hanna ya sennial nga mangipasingan kan ikami kan ya annolim kan yaw nga mundo? En hanna ya sennial ya pangultimuan ya mundo?" 4Y Jesus, kunna nga siminabbag, "Mappalan/Memuhud kayu tase awan nga makelohot kan ikayu. 5Kayan ku yaw gafu ta aru nattaruk ya umang nga mangiyusa kan ya ngahan ku nga kunda nga makkahi, 'Yakan ya Cristo,' en aru ya totolay nga awayya ra nga melohot. 6En hinnian/asan nattaruk gerra ira nga mismu magina nu ya guni ra, en hinnian peba gerra ira kan dudduma/karruan nga lugar ira nga madumug nu, ngam mari nu mattalaw, gafu ta mawag kan mesimmu ira yan, ngam mari peba yan ya pangultimuan. 7Hinnian nattaruk nasion ira nga makiggerra kan dudduma nga nasion, en hinnian nattaruk pappatulan ira pay nga makiggerra kan dudduma nga pappatulan. Hinnian nattaruk bisibisin en lunulunig kan maddumuruma nga lugar. 8Ngammin ira yaw nga mesissimmu ya pamegafanan ya azziyariyat nga megitta kan ya attuliwan/appasikal ya babay nga mappanget nga manak. 9"Ya totolay kan ngammin nga nasion, ikalussaw ra kayu nattaruk megafu kan ya angngurug nu kan yakan. Iyalawat da kayu tase pazapaziyatan da kayu, en patayan da kayu. 10Sangaw, aru nattaruk ya mallikud kan ya angngurug da kan yakan, en ikalussaw ra ya wawwahi ra kan pangurug, en iyalawat da ira kan ya mammoray ira. 11Aru ya umang nga makkahi nga profeta ra, ngam laddud/busid da, en aru ya totolay nga awayya ra nga melohot. 12Gafu ta umara-aru ya narakat/napot ira nga makamakua, aru ya totolay nga mallammin ya ayat da kan y Afu Dios en kan ya ikattolay ra. 13Ngam ya innia laman nga tolay nga makakattam kan kapazapaziyat addet kan ya pangultimuan ya attolay na, mapalliad. 14Mepalapalappat yaw nga napia nga dumug nga me-annung kan ya appatul y Afu Dios kan ya interu mundo tase mepakammu kan ya totolay kan ngammin nga nasion, en kabalin na, lumabbet ngin ya pangultimuan." 15"Y Daniel nga profeta kattun, neturak na ya makatantalaw nga manaral nga aggatadag kan ya Nasantuan nga Lugar. Masingan nu yan nattaruk. Ikayu nga mabbibbid kan yaw, antindian nu kan napia. 16Kan yan nga orat, ya totolay kan ya probinsia ya Judea, mawag kan mappaladdiaw ra kan ya kabakuluran. 17En ya innia laman nga tolay nga hinnian kan ya atap ya balay na, mari na zinan tumallung ngin kan ya balay na nga umang mangalak kan hanna laman nga ivulun na. 18En ya innia laman nga hinnian kan ya koman na, mari na zinan manoli ngin nga umang mangalak kan sinnun nga pattallian na kan ya balay na. 19Anakkue/Pakalallak pay ya babbay nga aggabussit onu mappasusu kan ira yan nga algaw. 20Idasadasal nu kan y Afu Dios nga mari mesimmu ira yan kan ya tiempo lammin onu kan ya algaw nga angngilinan nu. 21On, gafu ta, kan ira yan nga algaw, nelot/nafulotan ya kapazapaziyat ya totolay nga awan vulvua negittan na namegafu kattu naparatu ya mundo addet kan sangaw, en kunna tian pay, awan nga mesimmu nga megitta kan yan addet nattaruk. 22Kayan ku yaw gafu ta, nu mari zinan zinisidi y Afu Dios nga pababban na ya bilang ira yan nga algaw, awan zinan tolay nga matalan nga matolay. Ngam para laman kan ya pinili na nga totolay, pababban na ya bilang ira yan nga algaw. 23"Kan ira yan nga algaw, nu hinnian tolay nga makkahi kan ikayu, 'Innan nu, die kanniaw ya Cristo,' onu 'Innan nu, diu kannay iggina,' mari nu mangurug kan iggina. 24Hinnian totolay nga umang nattaruk nga makkahi nga ira ya Cristo onu profeta, ngam laddud da. Mangipasingan da kan mekapakkapalat nga sennial en milagro ira tase melohot ya totolay, en nu awayya na peba, ilohot da maski ya totolay nga pinili y Afu Dios. 25Maggina kayu, ira yaw nga kinahik kan ikayu, dana nakahik kallie ra nga mesimmu. 26Gaggafen, nu hinnian makkahi kan ikayu nga kunna, 'Hinnian ya Cristo kan ya disierto,' mari nu umang kannay. En nu hinnian makkahi nga kunna, 'Hinnian iggina kan ya unag ya balay,' mari nu mangurug. 27Kayan ku yaw gafu ta, ya annolik nga Anak Tolay, megitta kan tallit nga maggafu kan ya silawan en masingan addet kan ya taggappan. 28Maski kanna be tiaw ya lugar nga hinnian natay nga baggi, yan pay ya lugar nga parammungan ya gayang ira." 29"Kabalin ya tiempo nga azziyariyat, insigida makkokopan/makkallap ya sinag, mari mannawag ya vulan ngin, en ya bittuan ira kan langit, makkatanag/makkakabok dan, en maguyag ya makapangngua ira nga hinnian kan langit. 30Kan yan nga tiempo, ya sennial ku nga Anak Tolay, lumattuad kan langit. Sangaw, ngammin ya totolay kan ya utun lusak, mabbinunga/gumunggul ra gafu ta nelot ya talaw ra, gafu ta manoli nak nga Anak Tolay, en masingan dak kan ya kunam ira nga hinnian pakapangnguak en nelot ya kekapalat ku. 31Hinnian nagallu nga guni trumpeta nattaruk, en bonan ku ya anghel ku ira kan ya appat nga duhu ya lusak tase ammungan da ya totolay nga pinili y Afu Dios, mamegafu kan ya pamegafanan ya langit addet kan ya pamandanan na." 32"Hinnian pangngarrian nga me-annung kan ya kayu nga igos nga mammuan nu. Nu masingan nu nga mamegafu ya pangapanga na nga mattarengit ngin nga maddon, yan ya pakakammuan nu nga aranni ngin ya tiempo patu. 33Kunna tian pay, nu masingan nu nga mesimmu ngin ira yan nga ganagannud nga bahu kinahik kan ikayu, yan ya pakakammuan nu nga aranni igginan kan ya puerta. 34Kurug ya kayan ku kan ikayu, mesissimmu ngammin ira yan nga ganagannud kallie ya ipappatay ngammin ya totolay nga matolay kan sangaw. 35Mapawan nattaruk ya langit en ya lusak, ngam ya ergok ira, mari ra vulvua mapawan." 36"Awan vulvua makakammu kan yan nga algaw onu orat, maski ya anghel ira kan langit onu yakan nga Anak ya Ama. Iggina laman ya makakammu. 37Ya nesissimmu kattun kattu katolay y Noe, megitta kan yan pay ya mesissimmu kan ya algaw ira kallie ya annolik nga Anak Tolay. 38Kattu nay nga tiempo kallie ya zivak/alum, nangamangan en namippissa ya totolay, naratawa en ne-atawa ra addet kan ya algaw nga nepattallung da Noe kan ya dakadakal nga barangay, 39en mari ammu ya totolay ya mappanget nga mesimmu kan ira addet zi nazivak da, en nakkalimat da ngammin. Megitta kan yan pay, malannatan ya totolay nattaruk kannia annolik nga Anak Tolay. 40"Nattaruk kan yan nga tiempo, nu hinnian dua nga lallaki kan ya koman, malak ya isa, ngam matalan ya isa. 41En nu hinnian dua nga babbay nga makka-uffun nga maggiling, malak ya isa, ngam matalan ya isa. 42Gaggafen, kanakanayun nga siggaparan kayu zinan, gafu ta mari nu ammu ya algaw nga annolik nga Afu nu. 43Ngam takkilalan nu yaw. Nu ammu zinan ya makabbalay ya orat kan gabi nga aggangay ya isa nga akkokot, mari na zinan makkaturug, tase mari na ituluk nga matallung ya balay na. 44Mawag gafen kan kanakanayun nga siggaparan kayu, gafu ta manoli nak nga Anak Tolay kan orat nga mari nu nammuan." 45"Innia ya mekatalak en masirib nga kohung nga sinunnak ya amo na nga ingkargadu kan ya balay na kannia kawan na nga yan nga kohung ya mangiddan kan ya kakavulun na kan ya kanan da kan ya gagangay nga orat? 46Iggina ya kohung nga madatangngan ya amo na kannia allabbet na nga mamaraparulot kan ya nepakua na kan iggina. Mapalad iggina. 47Kurug ya kayan ku kan ikayu, tunnakkan na iggina nga ingkargadu kan ngammin nga kukua na. 48Ngam nu narakat yan nga kohung, en nu kunna kan ya nonot na, 'Mabayag peba ya allabbet ya amok,' 49en nu pegafanan na sangaw nga palapalukan ya kakavulun na nga kohung, en nu makipangapangan en maki-ini-inum iggina kan ya aggillellaw ira, 50madatangngan nattaruk ya amo na iggina kan algaw nga mari na ekspektan en kan orat nga mari na ammu. 51Sangaw, nelot ya angngastigo ya amo na kan iggina, en ipetadday na iggina kan ya appen napia ira. Ya totolay nga hinnian kannay, mattangatangit en mangngarangaritam/mangngaratenget da."

will be added

X\