Mateo 20

1Kunna y Jesus nga nakkahi kan ya totolay, "Megitta ya appatul y Afu Dios kan ya kiningngua ya isa nga makakkua kan ka-ubassan. Naggaggammia iggina nga minang nanaful kan totolay nga tandanan na nga umang mattrabahu kan ya ka-ubassan na. 2Kannia nepakataful na, nakittaratu iggina kan ira nga pagan na ya kada isa kan ira kan ya gagangay nga tandan kan patangalgaw. Sangaw, binon na iran nga mattrabahu. 3Nanoli iggina manin kan ya plasa kan magga-alas nuebe, en nakasingan iggina kan lallaki kannay nga aggatadag nga awan da nga kuan. 4Gaggafen, kunna nga nakkahi kan ira, 'Ikayu pay, angkayu nga mattrabahu kan ya ka-ubassan ku, en pagan ku ya gagangay tandan nu.' Minang da gafen. 5Nanoli iggina manin kan ya plasa kan magga-alas dose en kan magga-alas tres kan giram, en kunna tian pay manin ya kiningngua na. 6Kan magga-alas singko ngin kan giram, nanoli iggina manin kan ya plasa, en nakasingan iggina kan dudduma/karruan nga lallaki nga aggatadag kannay, en kunna nga namovut kan ira, 'Ka-am ta patangalgaw, aggatadag kayu kanniaw nga awan nu nga kuan?' 7"Kunda nga siminabbag, 'Gafu ta awan nga tolay nga mappatrabahu kan ikami.' "Kunna nga nakkahi kan ira, 'Ikayu pay, angkayu gafen nga mattrabahu kan ya ka-ubassan ku.' 8"Kattu maggabi ngin, ya makakkua kan ya ka-ubassan, kunna nga nakkahi kan ya kapatas na, 'Akkulan mun ya mattrabahu ira, en pagan mun ya tandan da. Ponnan mu nga pagan ya napozzan nga pinattrabahuk, en patturunuhan mu ira addet kan ya naponna.' 9Kattu minang ya totolay nga namegafu nga nattrabahu kan magga-alas singko kan giram, napagan ya kada isa kan ira kan ya gagangay nga tandan kan patangalgaw. 10"Sangaw, kattu minang ya totolay nga naponna nga namegafu nga nattrabahu, inabbat da nga mas aru ya alawatan da, ngam inalawat ya kada isa kan ira pe laman ya gagangay nga tandan kan patangalgaw. 11Kattu inalawat da ya tandan da, kunda nga narrerreklamo kan ya makakkua kan ya ka-ubassan, 12'Tangorat laman ya nepattrabahu ira yan nga napozzan, ngam negittam bitu ira pe laman kan ikami nga nattrabahu kan patangalgaw nga natattam kan ya patu ya sinag.' 13"Ngam ya makakkua, kunna nga siminabbag kan ya isa kan ira, 'Kofun, mari ta ka zinarogat. Mari ta kazze/pano nakka-anahutan ya tandan mu kan patangalgaw? 14Alakan mu ya tandan mu en mapanaw kan. Urek nga neddan kan ya napozzan ya megitta kan ya neddan ku kan ikaw. 15Mari kazze mepangngat nga kuan ku ya ikayat ku kan ya kukuak ira? Onu hinnian kazze takit ya nonot mu kan yakan gafu ta vukat ya palad/dakulap ku?' " 16Sangaw, kunna y Jesus nga nakkahi, "Gaggafen, ira nay nga napozzan, maponna nattaruk, en ira nay nga naponna, mapozzan nattaruk." 17Kannia aggangay ra Jesus kan ya siudad ya Jerusalem, ne-arayyu na kan bissang/bissut ya mafulu se dua nga disipulo na kan ya dudduma nga totolay nga ira laman, en kannia ira nga manaladalan, kunna nga nakkahi kan ira, 18"Ginan dak! Maddaggun tera nga umang kan Jerusalem, en sangaw, me-alawat nak nga Anak Tolay kan ya panakallan ira kan ya papari en ya mestru ira kan ya dorob, en sentensian da yakan kan patay. 19Sangaw, iyalawat da yakan kan ya totolay nga mari Judio. Uyu-uyawan, latalatiguan, en ipatak da yakan kan kurut. Ngam kan ya mekatallu nga algaw, magginnolay nak balalaman." 20Sangaw, ya ina y Santiago en y Juan nga anak y Zebedeo, nevulun na ira nga minang da kan y Jesus, en nappalentud iggina kan ya atubang na gafu ta hinnian ikiddaw na. 21Y Jesus, kunna nga namovut, "Hanna ya ikayat mu?" Kunna nga nangikiddaw kan iggina, "Kazzen ta nattaruk nu mappatul ka, panutturan mu ira yaw nga dua nga anak ku kan ya bikat mu, ya isa kan ya ziwanan mu en ya isa kan ya zimigim." 22Ngam y Jesus, kunna nga siminabbag kan ya mawwahi, "Mari nu ammu ya ikiddaw nu. Awayya nu kazze nga attamman ya kapazapaziyat nu nga megitta kan ya kapazapaziyat ku?" Kunda nga siminabbag kan iggina, "Awayya mi." 23Y Jesus, kunna nga nakkahi, "Kurug nga attamman nu ya kapazapaziyat nu nga megitta kan ya kapazapaziyat ku. Ngam awan nga paka-awayyak nga maddisidi nu innia ya manuttud kan ya ziwanan ku en kan ya zimigik, ngam naparan ira yan nga meddan kan ira nay nga pinili y Dios Amak." 24Kattu nagina ya mafulu nga disipulo ya nekiddaw ya ina ya dua, nallussaw ra kan ya dua nga mawwahi. 25Inakkulan gafen y Jesus ira nga umaranni ra kan iggina, en kunna nga nakkahi, "Ya mammoray ira kan ya mari Judio ira, ammu nu nga ikayat da nga ipasingan ya pakapangngua ra kan ya totolay nga pammorayan da; en ya panakallan ira kan ira, ikayat da nga iyuray ya totolay nga hinnian kan ya paka-awayya ra. 26Ngam mari nu zinan kuan ya kunna tian. Ya innia laman kan ikayu nga mayat nga me-atanang ya kekuentan na, mawag kan mabbalin iggina kan minasserbi kan ikayu. 27En ya innia laman pay nga tolay nga mayat nga mabbalin kan panakallan, mawag kan mabbalin iggina kan kohung nu. 28Megitta yan kan ya kuan ku nga Anak Tolay nga minang kan ya utun lusak nga mari na kan tase maserbian nu azzi tase masserbi, en ipamavulun ku nga mapatay nak para kan ya katavvut ya maru." 29Kannia appanaw ra Jesus kan ya poblasion ya Jerico, napakaru ya totolay nga nevulun kan ira. 30Hinnian dua nga vulaw nga aggatuttud kan ya bikat ya dalan. Kattu nammuan da nga mattalebad y Jesus kan ya dian da, kunda nga nangikukkullet, "Afu, Gaka y David, kazzen ta ikallak mu ikami!" 31Ngam ya totolay kan ya ammung, nevuya ra ira tase mari ra makassag. Ngam mas lallaman ngin nga nekukkullet da kan y Jesus, "Afu, Gaka y David, kazzen ta ikallak mu ikami!" 32Sangaw, nemmang y Jesus, nepakkul na ira, en kunna nga namovut, "Hanna ya ikayat nu nga kuan ku para kan ikayu?" 33Kunda nga siminabbag, "Afu, ikayat mi nga makasingan kami." 34Sangaw, nekallak y Jesus ira, en sinukkal na ya gimmatan da. Nerame ra nga nakasingan, en nevulun da kan iggina.

will be added

X\