Mateo 19

1Sangaw, kattu nabalin ngin y Jesus nga nangituldu kan ira yan, napanaw ra kan ya probinsia ya Galilea en minang da kan ya probinsia ya Judea en kan ya tangapingit ya Kayan/Wangag Jordan. 2Napakaru ya totolay nga nevulun kan iggina, en pinammapia na ya makkatakit ira. 3Hinnian/Asan dudduma/karruan nga Fariseo nga minang kan y Jesus tase purban da iggina kan ya kayan na. Kunda gafen nga namovut, "Mepangngat kazze/pano nu igungay ya innia laman nga lalaki ya atawa na kan maski hanna laman nga kegafanan?" 4Kunna y Jesus nga siminabbag, "Mari nu kazze peba nabibbid yaw kan ya Sagrado nga Turak? Y Afu Dios, kattu namaratu iggina kan tolay kattu gafagafu, pinaratu na ira nga lalaki en babay? 5En kunna nga nakkahi, 'Megafu kan yan, panawan ya innia laman nga lalaki ya ama na en ya ina na, en metadday kan ya atawa na, tase mabbalin da nga dua kan kuenta isa nga baggi.' 6Gaggafen, mari ra nga dua ngin nu azzi isa ran nga baggi. Ya pinattadday y Afu Dios, mari zinan paggungayan tolay." 7Sangaw, ya Fariseo ira, kunda nga namovut kan y Jesus, "Ka-am gafen ta nepamavulun y Moises nga awayya na kan ya innia laman nga lalaki nga iddannan na ya atawa na kan neturakan ya angngigungay na kan iggina, en igungay nan?" 8Y Jesus, kunna nga siminabbag, "Nepamavulun y Moises nga igungay nu ya gi-attawan nu gafu ta nataggat ya giffutuan nu. Ngam kattu pinaratu y Afu Dios ya totolay, bakkan kan yan ya ikayat na. 9Kayan ku kan ikayu, ya innia laman nga lalaki nga igungay na ya atawa na, mebilang iggina kan mamabay nu mangatawa iggina kan tanakkuan, fera laman nu nakilalaki ya atawa na, en ya nepakkilalaki na ya kegafanan ya angngigungay na kan iggina." 10Ya disipulo na ira, kunda nga nakkahi kan iggina, "Nu kunna tian ya situasion ya matawa, mas napia gafen laman ngin nu mari vulvua/pulus mangatawa ya innia laman nga lalaki." 11Y Jesus, kunna nga nakkahi kan ira, "Mari na kan ngammin nga totolay ya makakua kan yan nga nakahi nu azzi ya totolay laman nga iniddannan y Afu Dios kan paka-awayya nga mangngua kan ira yan. 12On, gafu ta maddumuruma ya kegafanan ya zi angngatawa ya innia laman nga lalaki. Hinnian dudduma nga ne-anak nga hinnian diferensia ya gibbaggian da; hinnian dudduma nga mari mangatawa gafu ta nakafun da; en hinnian dudduma nga mari mangatawa gafu ta ikayat da nga sesserbian y Afu Dios kan ya appatul na. Ya innia laman nga lalaki nga makaparulot kan ira yaw, paraparulotan na zinan." 13Sangaw, hinnian totolay nga nangiyangay kan ya gi-anakan da ira kan y Jesus tase ipotun na ya ima na kan ira, en idasal na ira, ngam ya disipulo na ira, ginamman da ira yan nga totolay. 14Ngam y Jesus, kunna nga nakkahi kan ya disipulo na ira, "Pavulunan nu ya abbing ira nga me-angay kan yakan, en mari nu gamman ira, gafu ta, ya totolay nga megitta kan ira yaw nga abbing, ira ya mesipat kan ya appatul y Afu Dios." 15Sangaw, nepotun na ya ima na kan ira, en kabalin na, napanaw ra Jesus kannay. 16Hinnian tolay nga minang kan y Jesus, en kunna nga namovut, "Mestru, hanna ya napia nga kuan ku tase hinnian angat ku nga awan na nga panda?" 17Kunna y Jesus nga siminabbag, "Ka-am ta pinovutan mu kan yakan ya me-annung kan ya napia? Isissa laman ya napia. Nu ikayat mu nga hinnian angat mu nga awan na nga panda, paraparulotan mu ya dorob ira y Afu Dios." 18Ya tolay, kunna nga namovut, "Hanna ira yan?" Y Jesus, kunna nga siminabbag, "Marim mamatay; marim mamabay onu makilalaki; marim makkokot; marim mattestigu kan laddud/busid; 19ikakuam ya amam en ya inam, en ayatan mu ya ikattolem kan kagitta ya angngayat mu kan ya baggim pe laman." 20Ya tolay, kunna nga siminabbag, "Mestru, pinaraparulot ku ngammin ira yan ngin. Hanna peba ya kurang ku?" 21Y Jesus, kunna nga siminabbag, "Nu ikayat mu nga awan mu nga pakkurangan, angka ilaku ngammin ya kukuam, en iddan mu ya pallakuan mu kan ya pobre ira, gafu ta nu kuan mu yan, hinnian karikum nattaruk kan langit. Kabalin na, manoli ka en me-evulun ka kan yakan." 22Kattu nagina na yan, napanaw iggina nga nakkarandam, gafu ta rikiriku iggina. 23Sangaw, y Jesus, kunna nga nakkahi kan ya disipulo na ira, "Kurug ya kayan ku kan ikayu, kuru maziyat ya attallung ya riku nga tolay kan ya pappatulan y Afu Dios. 24Uli, kayan ku kan ikayu, mas nalohon ya attallung ya kamellio kan ya lattuk dahum annek/ngam kan ya attallung ya riku nga tolay kan ya pappatulan y Afu Dios." 25Kattu nagina ya disipulo na ira yan, nelot/nafulotan ya nepakkapalat da, en kunda nga namovut kan iggina, "Innia gafen ya mapalliad?" 26Iningan y Jesus ira, en kunna nga siminabbag, "Mari mapalliad ya tolay ya baggi na pe laman, ngam y Afu Dios, makua na ngammin." 27Sangaw, y Pedro, kunna nga nakkahi, "Pinanawan mi ngammin ya kukua mi tase me-evulun kami kan ikaw. Hanna sangaw gafen ya premio mi?" 28Y Jesus, kunna nga siminabbag, "Kurug ya kayan ku kan ikayu, nattaruk nu manuttud nak nga Anak Tolay kan ya mekapalat nga tronok nga mammoray kan ya bahu nga mundo, ikayu nga ne-evulun kan yakan kan yaw nga mundo, manuttud kayu pay kan mafulu se dua nga trono nga mamanunut kan ya mafulu se dua nga tribu kan ya nasion ya Israel. 29En ya innia laman nga tolay nga pinanawan na ya balay na, ya wawwahi na nga lallaki onu babbay, ya ama na onu ya ina na, ya anak na ira, onu ya lusak na ira megafu laman kan ya assesserbi na kan yakan, mangalawat iggina kan mamim matut kan ira yan nga pinanawan na kan yaw nga mundo en kan angat nga awan na nga panda nattaruk kan langit. 30Ngam aru ya totolay nga atanang ya kekuentan da kan yaw nga mundo, ngam me-alinak da nattaruk mamba; en aru ya totolay nga alinak ya kekuentan da kan yaw nga mundo, ngam me-atanang da nattaruk balalaman."

will be added

X\