1 Hinnian/Asan dudduma/karruan nga Fariseo en Saduceo nga minang kan y Jesus tase purban da iggina kannia angngikiddaw ra nga mangngua iggina kan milagro nga pakasinnan nga naggafu ya pakapangngua na kan y Afu Dios kan langit. 2 Kunna nga siminabbag, "Nu raggang ya langit kannia aggabi nan, kayan nu mamba nga napia ya tiempo kan kamatarukan na. 3 En kan matamataruk, nu raggang ya langit en kokopan/kallap, kayan nu mamba nga moran sangaw. Ammu nu ya kebalinan ya kasinnan ya langit, ngam mari nu vulvua/pulus mantindian ya kebalinan ya masingisingan nu nga mesissimmu kan ya utun lusak kan ira yaw nga algaw. 4 Avva/Hanna ma ya dakkut en kawan angngurug ya totolay nga matolay kan sangaw! Ikayat nu ya makasingan kan milagro, ngam awan nga milagro nga mepasingan kan ikayu nu azzi laman ya milagro nga megitta kan ya nesimmu kan y Jonas kattun." Sangaw, napanaw ra Jesus kan ira. 5 Kattu nakadakit da Jesus kan ya tangapingit ya dakal nga danum ya Galilea, nerandamman ya disipulo na ira nga nalippanan da ya nangivulun kan pan. 6 Y Jesus, kunna nga nakkahi kan ira, "Ginan dak! Mappalan/Memuhud kayu kan ya lebadura ya Fariseo ira en ya Saduceo ira." 7 Nerergowan ya disipulo na ira ya kinahi y Jesus nga kunda, "Siguru, ya gafu na kan kinahi na yan kan ittera, gafu ta awan nga pan nga nevulun tera." 8 Ngam ammu y Jesus ya nerergowan da, en kunna gafen nga nakkahi kan ira, "O, ikayu nga nakafi ya angngurug nu, ka-am ta perergowan nu ya kawan pan kan ikayu? 9 Mari nu kazze/pano peba mantindian? Mari nu kazze kerandamman ya lima nga pan nga nepakan ku kan ya mallimarivu nga lallaki, en nu pia nga basket ya vuna nga pinagampat/inampat nu? 10 En kunna tian pay ya pitu nga pan nga nepakan ku kan ya mappattarivu nga lallaki, en nu pia nga basket ya vuna nga pinagampat nu pay? 11 Ka-am ta mari nu mantindian nga bakkan kan me-annung kan pan ya kinahik kan ikayu, nu azzi nakahik kan mappalan kayu kan ya lebadura ya Fariseo ira en ya Saduceo ira?" 12 Sangaw, nantindian da balalaman nga mari na kan lebadura nga mekivu kan pan ya kinahi na kan ira nga palanan da nu azzi ya tuldu ya Fariseo ira en ya Saduceo ira. 13 Sangaw, minang da Jesus en ya disipulo na ira kan lugar nga aranni kan ya babalay ya Cesarea Filipos. Kunna nga namovut kan ira, "Hanna ya kayan ya totolay nga me-annung kan yakan nga Anak Tolay?" 14 Kunda nga siminabbag, "Hinnian dudduma kan ira nga makkahi nga ikaw kanu y Juan nga Minabbawtiso. Hinnian dudduma peba nga makkahi nga ikaw kanu y Elias. Hinnian dudduma peba nga makkahi nga ikaw kanu y Jeremias onu isa kan ya dudduma peba nga profeta nga natolay kattun." 15 Kunna nga namovut kan ira, "Ngam hanna ya makahi nu nga me-annung kan yakan?" 16 Y Simon Pedro, kunna nga siminabbag, "Ikaw ya Cristo, ya Anak y Afu Dios nga siggamatolay." 17 Y Jesus, kunna nga siminabbag, "Simon nga anak y Jonas, mabendisionan ka, gafu ta bakkan kan tolay ya nangipakammu kan ikaw kan yan nu azzi y Amak nga hinnian kan langit. 18 En kayan ku kan ikaw nga ikaw y Pedro, en kan yaw nga batu, patadaggan ku ya iglesiak, en awan nga makakaffut kan yan, maski ya pakapangngua ya patay. 19 Iddan ku kan ikaw nattaruk ya annusi ira kan ya nelangitan nga pappatulan. Ya hanna laman nga imandum kan ya utun lusak, kunna tian pay, imandu y Afu Dios nga hinnian kan langit. En ya hanna laman nga palussaran mu kan ya utun lusak, kunna tian pay, palussaran y Afu Dios nga hinnian kan langit." 20 Sangaw, nemandu y Jesus kan ya disipulo na ira kan napia nga awan vulvua pangikayanan da nga iggina ya Cristo. 21 Kan nay nga tiempo, pinegafanan y Jesus nga nepakammu kan ya disipulo na ira nga mawag kan umang iggina kan Jerusalem nattaruk tase mattam kan aru nga ammazapaziyat ya lalakay ira nga panakallan, ya panakallan ira kan ya papari en ya mestru ira kan ya dorob kan iggina, en mapatay iggina, ngam magginnolay balalaman kan ya mekatallu nga algaw. 22 Ngam ne-arayyu y Pedro y Jesus kan bissang/bissut tase ira laman, en nevuya na iggina nga kunna, "Afu, pare zinan ta ikallak na ka y Afu Dios, en mari zinan vulvua mesimmu yan kan ikaw." 23 Ngam nabbira y Jesus, en inatubang na y Pedro, en kunna nga nakkahi, "Satanas, panawan nak! Makagurun ka kan yakan, gafu ta bakkan kan ya uray y Afu Dios ya agganonot mu nu azzi ya ikayat ya totolay." 24 Sangaw, kunna y Jesus nga nakkahi kan ya disipulo na ira, "Ya innia laman nga mayat nga me-evulun kan yakan, mawag kan likuran na ya ganagannud nga ikayat ya baggi na, en kattuan na ya kurut na pe laman, en me-evulun kan yakan. 25 Kayan ku yaw gafu ta, ya innia laman nga makkakenga kan ya angat na, mapawan na mamba. Ngam ya innia laman nga mapawan na ya angat na megafu kan yakan, matafulan na balalaman. 26 Hanna ya serbi na kan ya innia laman nga tolay nu matagikukua na ya interu mundo ngam mapawan na mamba ya angat na kan panguzzanan? Awan! Inutil! Hanna ya meddan ya innia laman nga tolay tase meddannan iggina kan angat? 27 Yakan nga Anak Tolay, manoli nak kan ya utun lusak nattaruk nga vulunan ya anghel ku ira, en hinnian kan yakan ya gloria y Amak, en balattan ku ya kada tolay kan ya kinikkingngua na. 28 Kurug ya kayan ku kan ikayu, hinnian dudduma kan ikayu nga hinnian kanniaw nga mari peba matay kallie nu nga makasingan kan ya ammegafu ya appatul ku nga Anak Tolay."
